Stock Markets | లాభాల్లో కొన‌సాగుతున్న దేశీయ స్టాక్ మార్కెట్లు.. యుద్ధం ముగింపుపై పెట్టుబ‌డిదారుల ఆశ‌లు..

Stock Markets | దేశీయ‌ ఈక్విటీ మార్కెట్లు ఈ వారం సానుకూలంగా ప్రారంభమయ్యాయి. గ్లోబల్ మార్కెట్లలో బలమైన సంకేతాలు, మధ్యప్రాచ్యంలో ఉద్రిక్తతలు తగ్గే సూచనలు ఇన్వెస్టర్ సెంటిమెంట్‌ను మెరుగుపర‌చాయి. సోమవారం ప్రారంభ ట్రేడింగ్‌లోనే పలు రంగాల్లో కొనుగోళ్ల ఆసక్తి కనిపించింది. బీఎస్ఈ సెన్సెక్స్ 1,546 పాయింట్లు పెరిగి రోజువారీ గరిష్ట స్థాయి 77,210.85ను తాకగా, నిఫ్టీ50 సూచీ 169 పాయింట్లు ఎగబాకి 23,945.45 వరకు చేరింది. మిడ్‌క్యాప్, స్మాల్‌క్యాప్ సూచీలు సుమారు 1 శాతం చొప్పున పెరిగి బెంచ్‌మార్క్‌లను మించి ప్రదర్శన చూపించాయి. మార్కెట్‌లో అన్ని సెక్టార్‌లు గ్రీన్‌లో ట్రేడ్ అయ్యాయి. మెటల్స్, ఫార్మా, ఐటీ, ఆటో, ఎఫ్‌ఎంసీజీ రంగాలు లాభాలకు నాయకత్వం వహించాయి. సెన్సెక్స్‌లో స‌న్ ఫార్మా, అదానీ పోర్ట్స్ ప్రధాన లాభదాయక స్టాక్స్‌గా నిలిచాయి. కాగా యాక్సిస్ బ్యాంకు నాలుగో త్రైమాసిక ఫ‌లితాల అనంతరం నష్టాల్లో ట్రేడ్ అవుతోంది. మొత్తం సూచీలో కేవలం ఐదు స్టాక్స్ మాత్రమే ఎరుపులో ఉన్నాయి.

విదేశీ మార్కెట్ల‌లో బ‌ల‌మైన సంకేతాలు..

విదేశీ మార్కెట్ల నుంచి వచ్చిన బలమైన సంకేతాలు దేశీయ మార్కెట్లకు మద్దతు ఇచ్చాయి. ఆసియా మార్కెట్లు గ్రీన్‌లో ట్రేడ్ కాగా, గత వారం చివర్లో ఎస్ అండ్ పీ 500, నాస్డాక్ కంపోజిట్ రికార్డ్ స్థాయిల వద్ద ముగిశాయి. ఇది గ్లోబల్ ఇన్వెస్టర్లలో విశ్వాసాన్ని పెంచింది. మధ్యప్రాచ్య పరిస్థితుల్లో కూడా కొంత ఊరట కనిపిస్తోంది. పాకిస్తాన్ మధ్యవర్తిత్వంతో ఇరాన్, అమెరికాకు కొత్త ప్రతిపాదనను సమర్పించింది. ఇందులో హోర్ముజ్ జ‌ల‌సంధిని తిరిగి ప్రారంభించడం, ప్రస్తుత ఘర్షణలను తగ్గించడం వంటి అంశాలు ఉన్నాయి. అణు చర్చలు తరువాత దశలో కొనసాగనున్నట్లు తెలుస్తోంది. గత వారం పాకిస్తాన్‌లో జరగాల్సిన చర్చలు విఫలమైనప్పటికీ, తాజా పరిణామాలు మార్కెట్లలో ఆందోళనను తగ్గించాయి. ముఖ్యంగా ఇంధ‌న‌ సరఫరా, ద్ర‌వ్యోల్బ‌ణంపై ఉన్న భయాలు కొంత మేర తగ్గాయి.

స్వ‌ల్పంగా పెరిగిన చ‌మురు ధ‌ర‌లు, బ‌ల‌ప‌డ్డ రూపాయి..

గ్లోబల్ మార్కెట్ల నుంచి వచ్చిన సానుకూల సంకేతాలతోపాటు దేశీయ మార్కెట్లు కూడా బలంగా ప్రారంభమయ్యాయి. అయితే ఇన్వెస్టర్లు ఇప్పుడు భౌగోళిక‌ పరిణామాలపై మరింత స్పష్టత కోసం ఎదురు చూస్తున్నారు. అలాగే ఈ వారం రాబోయే మాక్రో ఎకనామిక్ డేటా కూడా మార్కెట్ దిశను నిర్ణయించే అవకాశముంది. అయితే ఈక్విటీ మార్కెట్ల‌లో ర్యాలీ కొన‌సాగుతున్న‌ప్ప‌టికీ చ‌మురు ధ‌ర‌లు మాత్రం స్వ‌ల్పంగా పెరిగాయి. అంత‌ర్జాతీయ మార్కెట్‌లో బ్రెంట్ క్రూడ్ ధ‌ర బ్యారెల్‌కు 0.53 డాల‌ర్ల మేర పెరిగి 100 వ‌ద్ద ఉండ‌గా, డ‌బ్ల్యూటీఐ క్రూడ్ ధ‌ర బ్యారెల్‌కు 0.42 డాల‌ర్లు పెరిగి 93 వ‌ద్ద ఉంది. ఇక అమెరికా డాల‌ర్‌తో పోలిస్తే భార‌త రూపాయి మార‌కం విలువ స్వ‌ల్పంగా పెరిగింది. 0.02 పైస‌లు లాభ‌ప‌డ్డ రూపాయి అమెరికా డాల‌ర్‌కు 94.19 వ‌ద్ద ఉంది.