Gold Wealth | బంగారం దూకుడు.. భారీగా పెరిగిన భారతీయ కుటుంబాల సంపద..!

ధరల పెరుగుదలతో పెరిగిన విలువ రూ.117లక్షల కోట్ల మేర పెరిగినట్లు అంచనా హెచ్డీఎఫ్సీ మ్యూచువల్ ఫండ్ నివేదిక Gold Wealth | బంగారం ధరలు గతేడాది నుంచి విపరీతంగా పెరుగుతున్నాయి. గతంలో ఎన్నడూ లేనివిధంగా ధరల పైకి కదులుతూ రావడంతో దేశంలోని కుటుంబాల సంపద అనూహ్యంగా పెరిగింది. పసిడి రేటు పెరగడంతో భారతీయ కుటుంబాల సంపద సుమారు గత ఏడాదిలో రూ.117 లక్షల కోట్ల మేర పెరిగినట్లు అంచనా. దాంతో ప్రజల ఖర్చు సామర్థ్యం సైతం గణనీయంగా వృద్ధి చెందింది. హెచ్డీఎఫ్సీ మ్యూచువల్ ఫండ్ విడుదల చేసిన తాజా నివేదిక ప్రకారం.. పుత్తడి మరోసారి భద్రమైన పెట్టుబడిగా తనను తాను నిరూపించుకుంది. ప్రపంచవ్యాప్తంగా నెలకొన్న రాజకీయ ఉద్రిక్తతలు, అంతర్జాతీయ అస్థిరత, కరెన్సీల్లో మార్పులు పెట్టుబడిదారులను బంగారం ఆకర్షించింది. దాంతో భారతీయ కుటుంబాలకు మేలు జరిగింది. ఈ ధరల పెరుగుదలతో దేశవ్యాప్తంగా కోట్లాది కుటుంబాలకు చెందిన బంగారు ఆభరణాలు, నాణేలు, బార్ల విలువ ఒక్కసారిగా పెరిగింది. గ్రామీణ ప్రాంతాల నుంచి పట్టణాలు, మహానగరాల వరకు అన్ని వర్గాల కుటుంబాల సేవింగ్స్ బలపడినట్లు నివేదిక చెబుతోంది. ముఖ్యంగా కుటుంబాల్లో ఎక్కువగా బంగారం దాచుకునే మహిళలకు ఆర్థికంగా మరింత భరోసా ఇచ్చింది. నిపుణుల అభిప్రాయం ప్రకారం.. ఇది ప్రస్తుతం కాగితాల మీద ఉన్న లాభమే అయినప్పటికీ, భవిష్యత్తులో ఈ ఆస్తిని వినియోగం పెంచడానికి, అప్పులు తీర్చడానికి, కొత్త పెట్టుబడులకు ఉపయోగించుకునే అవకాశాలున్నాయి. ఈ పరిణామం బ్యాంకింగ్ రంగానికి ఊతమివ్వనుండగా, పాలసీ నిర్ణయాలు తీసుకునే వారికి కొత్త సవాళ్లను తెస్తోంది. ఈ పరిస్థితిని ఆర్బీఐ నిశితంగా గమనిస్తోంది. హెచ్డీఎఫ్సీ మ్యూచువల్ ఫండ్ విడుదల చేసిన నివేదిక ప్రకారం, గత 25 ఏళ్లలో బంగారం ధరల పెరుగుదల వల్ల ఇంత పెద్ద స్థాయిలో కుటుంబాల సంపద పెరగడం ఇదే తొలిసారి. 2025 క్యాలెండర్ సంవత్సరంలో బంగారం ధర 10 గ్రాములకు సగటున రూ.58,310 పెరిగి.. దాదాపు 73 శాతం వరకు వృద్ధిని నమోదు చేసింది. ఈ పెరుగుదలతో బంగారం మీద తీసుకునే రిటైల్ రుణాలు కూడా భారీగా పెరిగాయి. 2025 సంవత్సరం భారత స్టాక్ మార్కెట్లకు పెద్దగా కలిసిరాలేదని నివేదిక పేర్కొంది. నిఫ్టీ సూచీ అంతర్జాతీయ మార్కెట్లతో పోలిస్తే దాదాపు 25 శాతం తగ్గింది. ఇది దాదాపు మూడు దశాబ్దాల్లోనే చెత్త ప్రదర్శనగా విశ్లేషకులు పేర్కొంటున్నారు. ఈ పరిస్థితుల్లో బంగారం 2025లో నిజంగా ఒక సేఫ్ హావెన్ అసెట్గా నిలిచిందని నిపుణులు అభిప్రాయపడ్డారు. మొత్తంగా చూస్తే 2025లో అనిశ్చిత మార్కెట్ పరిస్థితుల్లో బంగారం భారతీయ పెట్టుబడిదారులకు బలమైన రక్షణ కవచంగా నిలిచింది.