Health Insurance | హెల్త్ ఇన్సూరెన్స్ ఉన్నా..బిల్లుపై 10 శాతం భ‌రించాల్సిందే..?

Health Insurance | ఆరోగ్య బీమా పాలసీదారులకు భారీ మార్పు రాబోతుందా? ఆసుపత్రి ఖర్చుల్లో కొంత భాగాన్ని పాలసీదారులే భరించేలా కొత్త ప్రతిపాదనను బీమా రంగం పరిశీలిస్తోంది. తాజా నివేదిక ప్రకారం ఆరోగ్య బీమా పాలసీదారులు తమకు అర్హత ఉన్న ఆసుపత్రి చికిత్స ఖర్చుల్లో 10 శాతం వరకు చెల్లించాల్సి వ‌స్తుంది. ఈ ప్రతిపాదనకు ఆమోదం లభిస్తే 2027 జనవరి 1 నుంచి అమల్లోకి వచ్చే అవకాశం ఉంది. అయితే ప్రతి క్లెయిమ్‌కు పాలసీదారు చెల్లించాల్సిన మొత్తం గరిష్ఠంగా రూ.5 లక్షలకు పరిమితం చేయాలని ప్రతిపాదించారు. దీనికి ప్రతిఫలంగా వార్షిక ప్రీమియం తగ్గే అవకాశం ఉంటుందని టైమ్స్ ఆఫ్ ఇండియా ఒక క‌థ‌నంలో పేర్కొంది.

ఖ‌ర్చుల్లో 10 శాతం భరించాలా..?

ఈ ప్రతిపాదనను జనరల్ ఇన్సూరెన్స్ కౌన్సిల్ పరిశీలిస్తోంది. ఇందులో ఆసుపత్రుల ఎంపానెల్‌మెంట్‌ను అన్ని బీమా సంస్థలకు ఒకే విధంగా చేసే విధానం, అలాగే బీమా సంస్థలు-ఆసుపత్రుల మధ్య తలెత్తే వివాదాలను పరిష్కరించేందుకు ప్రత్యేక వ్యవస్థను ఏర్పాటు చేయడం వంటి అంశాలు కూడా ఉన్నాయి. ఈ ప్రతిపాదన అమల్లోకి వస్తే సమగ్ర ఆరోగ్య బీమా పాలసీలు ఉన్నవారు కూడా అర్హత ఉన్న ఇన్‌పేషెంట్ ఆసుపత్రి చికిత్స ఖర్చుల్లో 10 శాతం భరించాల్సి ఉంటుంది. ప్రమాదాల కారణంగా జరిగే ఆసుపత్రి చికిత్స కూడా ఇందులోకి వస్తుంది. క్యాష్‌లెస్ చికిత్స ద్వారా క్లెయిమ్‌ చేసినా, రీయింబర్స్‌మెంట్‌ ద్వారా క్లెయిమ్‌ చేసినా ఈ నిబంధన వర్తించే అవకాశం ఉంది.

గ‌రిష్ట ప‌రిమితి రూ.5 ల‌క్ష‌లు..

ప్రతిపాదన ప్రకారం అర్హత ఉన్న క్లెయిమ్ మొత్తంలో 10 శాతాన్ని పాలసీదారు చెల్లించాలి. అయితే ప్రతి క్లెయిమ్‌కు ఈ చెల్లింపు గరిష్ఠంగా రూ.5 లక్షలకే పరిమితం అవుతుంది. ఉదాహరణకు ఆసుపత్రి బిల్లు రూ.5 లక్షలు కాగా, అర్హత ఉన్న క్లెయిమ్ మొత్తం కూడా రూ.5 లక్షలైతే పాలసీదారు రూ.50 వేలు చెల్లించాల్సి ఉంటుంది. అదే అర్హత ఉన్న క్లెయిమ్ మొత్తం రూ.60 లక్షలు అయితే 10 శాతం ప్రకారం రూ.6 లక్షలు అవుతుంది. కానీ ప్రతిపాదిత పరిమితి కారణంగా పాలసీదారు చెల్లించాల్సింది గరిష్ఠంగా రూ.5 లక్షలే. ఈ ప్రతిపాదన రిటైల్ ఇండెమ్నిటీ ఉత్పత్తులు, రిటైల్-అండర్-గ్రూప్ పాలసీలు, కాంబినేషన్ ఉత్పత్తుల్లోని ఇండెమ్నిటీ భాగాలు, అంతర్గత మైగ్రేషన్, పోర్టబిలిటీ వ్యాపారాలకు వర్తించేలా రూపొందిస్తున్నట్లు నివేదిక తెలిపింది. అయితే ఔట్‌పేషెంట్ చికిత్స క్లెయిమ్‌లు ఈ ప్రతిపాదన పరిధిలోకి రావు.

మిన‌హాయించ‌డం కూడా వీలు కాదా..

అలాగే ఈ 10 శాతం కో-పేను రైడర్లు లేదా ఎండార్స్‌మెంట్ల ద్వారా మినహాయించడం, తగ్గించడం లేదా మార్చడం సాధ్యం కాదని ప్రతిపాదనలో పేర్కొన్నట్లు సమాచారం. పాలసీదారు చెల్లించాల్సిన 10 శాతం మొత్తాన్ని మరో ఆరోగ్య బీమా పాలసీ ద్వారా కూడా తిరిగి పొందేందుకు వీలు ఉండదు. పెరుగుతున్న వైద్య ఖర్చులు, సమగ్ర ఆరోగ్య బీమా ఉన్నప్పుడు చికిత్స ఖర్చులు పెరుగుతున్నాయన్న బీమా రంగం ఆందోళనల నేపథ్యంలో ఈ ప్రతిపాదన వచ్చింది. సమగ్ర బీమా కవరేజీ ఉన్న రోగులకు ఖర్చు విషయంలో పెద్దగా ఆలోచన ఉండకపోవడంతో ఆసుపత్రులు అదనపు డయాగ్నస్టిక్ పరీక్షలు చేయించడం, అవసరమైన విధానాలను సూచించడం లేదా ఆసుపత్రిలో ఉండే కాలాన్ని పెంచడం వంటి చర్యలకు పాల్పడే అవకాశం ఉందని పరిశ్రమ వర్గాలు భావిస్తున్నాయి.

ఖ‌ర్చుల‌ను నియంత్రించేందుకే..?

టైమ్స్ ఆఫ్ ఇండియా పేర్కొన్న కౌన్సిల్ నోట్ ప్రకారం, బీమా ఉన్న రోగులు చికిత్స ఖర్చుల విషయంలో తక్కువగా స్పందిస్తారనే భావన కారణంగా ఓవర్‌బిల్లింగ్, ప్రొవైడర్-ఇండ్యూస్డ్ డిమాండ్ పెరుగుతుంద‌ని పరిశ్రమ అభిప్రాయపడుతోంది. అధిక కేటగిరీ గదులను ఎంచుకోవడం వల్ల కూడా మొత్తం ఆసుపత్రి బిల్లు పెరుగుతుంది. ఎందుకంటే వైద్యుల ఫీజులు, విధానాల ఛార్జీలు చాలా సందర్భాల్లో గది అద్దెకు అనుసంధానమై ఉంటాయి. అందువల్ల వైద్య ఖర్చులను నియంత్రించేందుకు తీసుకోవాలని భావిస్తున్న ఇతర చర్యలతో పాటు ఈ కో-పేమెంట్ ప్రతిపాదనను కూడా పరిశీలిస్తున్నారు. దీన్ని ఆరోగ్య బీమా పాలసీల్లో ఒక్కటే మార్పుగా కాకుండా, ఆసుపత్రి ఖర్చులను నియంత్రించే విస్తృత చర్యల్లో భాగంగా పరిగణిస్తున్నారు. అన్ని బీమా సంస్థలకు ఒకే విధమైన ఆసుపత్రుల ఎంపానెల్‌మెంట్‌ను ప్రవేశపెట్టాలని కూడా ప్రతిపాదించారు. దీనితోపాటు ఫలితాల ఆధారిత ఒప్పందాలు, బీమా సంస్థలు-ఆసుపత్రుల మధ్య ఫిర్యాదుల పరిష్కార వేదికను ఏర్పాటు చేసే అంశం కూడా ఉంది.

అధిక ప్రీమియం చెల్లిస్తే ఎలా..

జనరల్ ఇన్సూరెన్స్ కౌన్సిల్ 4,300కు పైగా ఆసుపత్రులకు ప్రామాణిక ఎంపానెల్‌మెంట్ విధానాన్ని తీసుకురావాలని భావిస్తోంది. ఆసుపత్రుల చికిత్స రేట్లకు బెంచ్‌మార్క్‌లను ఏర్పాటు చేయడం, ఇష్టానుసారంగా బిల్లులు వసూలు చేయడాన్ని అరికట్టడం దీని లక్ష్యంగా ఉంది. అలాగే ఆసుపత్రులతో చేసుకునే ఒప్పందాలను క్లినికల్, విధానాల వారీగా వచ్చే ఫలితాలకు అనుసంధానం చేయాలని ప్రతిపాదిస్తున్నారు. దీంతో పాలసీదారులకు మరింత ప్రామాణికమైన ఆసుపత్రుల నెట్‌వర్క్ అందుబాటులోకి వ‌స్తుంది. అదే సమయంలో ఆసుపత్రులతో రేట్లపై చర్చించే సమయంలో బీమా సంస్థలు ఒకే విధమైన బెంచ్‌మార్క్‌లను ఉపయోగించే అవకాశం ఉంటుంది. అయితే ఈ ప్రతిపాదనపై కొన్ని ఆందోళనలు కూడా వ్యక్తమవుతున్నాయి. అధిక ప్రీమియం చెల్లించి పూర్తి స్థాయి కవరేజీ పొందేందుకు సిద్ధంగా ఉన్న కస్టమర్లకు కూడా తప్పనిసరిగా కో-పే విధించాలా అనే ప్రశ్నలు తలెత్తుతున్నాయి.

వెలువ‌డాల్సిన నిర్ణ‌యం..

గతంలో ఒక సాధారణ బీమా సంస్థలో కార్యకలాపాల విభాగానికి నేతృత్వం వహించిన ఆరోగ్య బీమా నిపుణుడు శ్రీరాజ్ దేశ్‌పాండే మాట్లాడుతూ కస్టమర్లకు ఎంపిక ఉండాలని అభిప్రాయపడ్డారు. తక్కువ ప్రీమియంతో డిడక్టిబుల్ ఉన్న పాలసీని ఎంచుకునే అవకాశం ఒకటి, పూర్తి పరిహారం అందించే పాలసీ కోసం అధిక ప్రీమియం చెల్లించే అవకాశం మరొక‌టి ఉండాలని ఆయన పేర్కొన్నారు. ప్రజలు తమ వైద్య ఖర్చులకు పరిహారం పొందేందుకే బీమా తీసుకుంటారని అన్నారు. అధిక ప్రీమియం చెల్లించి ఎక్కువ సమ్ ఇన్సూర్డ్ పొందేందుకు సిద్ధంగా ఉన్న కస్టమర్లు తప్పనిసరిగా చికిత్స ఖర్చులో కొంత భాగాన్ని భరించాల్సిన అవసరం ఉండకూడదని అభిప్రాయపడ్డారు. ఇదే సమయంలో అన్ని బీమా సంస్థలు కలిసి పూర్తి పరిహారం అందించే పాలసీలను ఇవ్వకూడదని నిర్ణయిస్తే పోటీపై ప్రభావం పడే అవకాశం ఉందని మరో పరిశ్రమ అధికారి ఆందోళన వ్యక్తం చేశారు. అయితే ఈ 10 శాతం కో-పే ప్రతిపాదన ఇంకా జనరల్ ఇన్సూరెన్స్ కౌన్సిల్ పరిశీలనలోనే ఉంది. ఇది తుది నిర్ణయం కాదు. 2027 జనవరి 1 నుంచి అన్ని ఆరోగ్య బీమా పాలసీలకు ఈ 10 శాతం కో-పే తప్పనిసరిగా అమల్లోకి వస్తుందని ఇప్పటివరకు ఎలాంటి అధికారిక నిర్ణయం వెలువడలేదు.