HDFC Bank | హెచ్‌డీఎఫ్‌సీ బ్యాంకులో రహస్య సమాచారం లీక్‌..? ఇద్దరు సీనియర్ అధికారులపై విచారణ..

HDFC Bank | హెచ్‌డీఎఫ్‌సీ బ్యాంకులో కీలక వ్యాపార వ్యూహాలు, మార్కెట్‌పై ప్రభావం చూపే అవకాశం ఉన్న సున్నితమైన సమాచారం బయటివారికి చేరిందన్న ఆరోపణలపై అంతర్గత విచారణ కొనసాగుతోంది. ఈ వ్యవహారంపై సమగ్ర సమీక్ష పూర్తయ్యాక తదుపరి చర్యలు తీసుకుంటామని బ్యాంకు మీడియాకు వెల్లడించింది. త‌మ‌ విధానాలకు అనుగుణంగా, ఈ వ్యవహారానికి సంబంధించిన అన్ని వాస్తవాలను సేకరించి, పరిశీలించేందుకు ప్రస్తుతం అంతర్గత సమీక్ష కొనసాగుతోంద‌ని బ్యాంకు ప్రతినిధి తెలిపారు. విచారణ ప్రక్రియకు, ఇందులో సంబంధం ఉన్న వ్యక్తుల గోప్యతకు భంగం కలగకుండా కొనసాగుతున్న సమీక్షపై తాము అదనపు వివరాల‌ను వెల్లడించబోమని స్ప‌ష్టం చేశారు. విచారణ పూర్తయిన తర్వాత అందులో వెల్లడయ్యే అంశాల ఆధారంగా తగిన చర్యలు తీసుకుంటామని పేర్కొన్నారు.

ఇద్ద‌రు సీనియ‌ర్ అధికారుల పాత్ర‌..

నైతిక ప్రవర్తన, సమర్థవంతమైన పాలనకు సంబంధించి తమ ప్రవర్తనా నియమావళికి కట్టుబడి ఉన్నామని హెచ్‌డీఎఫ్‌సీ బ్యాంకు పునరుద్ఘాటించింది. నిబంధనల ఉల్లంఘనకు సంబంధించిన ఆరోపణలను తాము తీవ్రంగా పరిగణిస్తామని తెలిపింది. బ్లూమ్‌బెర్గ్‌ కథనం ప్రకారం బ్యాంకుకు చెందిన ఇద్దరు సీనియర్ అధికారులు రహస్య వ్యాపార వ్యూహాలను, మార్కెట్‌పై ప్రభావం చూపే అవకాశం ఉన్న సమాచారాన్ని బ్యాంకు వెలుపలి వ్యక్తులతో పంచుకున్నట్లు అంతర్గత విచారణలో గుర్తించారు. ఈ వ్యవహారం గోప్యమైనది కావడంతో తమ పేర్లను వెల్లడించవద్దని కోరిన వ్యక్తులను ఉటంకిస్తూ బ్లూమ్‌బెర్గ్‌ ఈ వివరాలను ప్రచురించింది. ఈ ఇద్దరు అధికారులు బ్యాంకులో కీలక వ్యాపార విభాగాలు, విధులకు సంబంధించిన బాధ్యతలు నిర్వహిస్తున్నట్లు కథనం పేర్కొంది. బ్యాంకులోని కొందరు ఉన్నతాధికారులు సమాచార లీకేజీపై ఆందోళన వ్యక్తం చేయడంతో ఈ విచారణ ప్రారంభమైనట్లు తెలిపింది.

స‌మాచారం దుర్వినియోగం అయిందా..

బయటకు వెళ్లినట్లు ఆరోపణలు ఎదుర్కొంటున్న సమాచారాన్ని ఎవరైనా దుర్వినియోగం చేశారా? అనే అంశాన్ని కూడా బ్యాంకు పరిశీలిస్తున్నట్లు బ్లూమ్‌బెర్గ్‌ వెల్లడించింది. హెచ్‌డీఎఫ్‌సీ బ్యాంకులో నాయకత్వ మార్పు జరగనున్న తరుణంలో ఈ పరిణామం చోటుచేసుకుంది. ఐసీఐసీఐ గ్రూప్‌లో సుదీర్ఘ అనుభవం ఉన్న అనుప్‌ బాగ్చీ అక్టోబర్‌ 27న బ్యాంకు ముఖ్య కార్యనిర్వహణ అధికారి (సీఈఓ)గా బాధ్యతలు చేపట్టనున్నారు. ఈ ఏడాది మార్చిలోనూ బ్యాంకు నాయకత్వంలో కీలక మార్పు చోటుచేసుకుంది. అప్పటి ఛైర్మన్‌ అతాను చక్రవర్తి తన వ్యక్తిగత విలువలకు, బ్యాంకులోని కొన్ని విధానాలకు మధ్య విభేదాలు ఉన్నాయంటూ పదవికి రాజీనామా చేశారు. ఆ తర్వాత హెచ్‌డీఎఫ్‌సీ బ్యాంకు నియమించిన స్వతంత్ర న్యాయ సమీక్షలో ఆయన వ్యక్తం చేసిన ఆందోళనలకు ఆధారాలు లభించలేదని బ్లూమ్‌బెర్గ్‌ కథనం పేర్కొంది. ప్రస్తుతం కొనసాగుతున్న విచారణలో వెల్లడయ్యే అంశాల ఆధారంగానే బ్యాంకు తదుపరి చర్యలు తీసుకోనుంది. అయితే, సమాచార లీకేజీ ఆరోపణలు ఎదుర్కొంటున్న అధికారులపై తుది నిర్ణయం ఇంకా వెలువడలేదు.