Large Cap Stocks | FIIల భారీ అమ్మకాలు.. మార్కెట్‌ను కుదిపేసిన 10 దిగ్గజ స్టాక్స్..

Large Cap Stocks | భారతీయ ఈక్విటీ మార్కెట్‌ల‌లో విదేశీ సంస్థాగత ఇన్వెస్టర్లు (FII) భారీగా నిధులు వెనక్కి తీసుకుంటుండటం కొనసాగుతోంది. 2024 చివరి నుంచి ఇప్పటివరకు దాదాపు 53 బిలియన్ డాలర్ల విలువైన భారతీయ షేర్లను FIIలు విక్రయించారు. ఈ భారీ అమ్మకాల ప్రభావంతో పలు బ్లూచిప్ స్టాక్స్ తీవ్ర ఒత్తిడిని ఎదుర్కొంటున్నాయి. మరోవైపు దేశీయ సంస్థాగత ఇన్వెస్టర్లు (DII) మార్కెట్‌కు ప్రధాన బలంగా మారినా, FIIల ఎగ్జిట్ మార్కెట్ రాబడులపై ప్రభావం చూపుతోంది. సెప్టెంబర్ 2024 నుంచి మే 2026 వరకు ఎంఎస్‌సీఐ ఇండియా సూచీ దాదాపు 8 శాతం పడిపోయింది. దేశంలోని అతిపెద్ద ప్రైవేట్ బ్యాంక్ హెచ్‌డీఎఫ్‌సీలో మార్చి 2026 త్రైమాసికంలో అత్యధిక FII అమ్మకాలు నమోదయ్యాయి. డిసెంబర్ 2025 నుంచి మార్చి 2026 మధ్య విదేశీ ఇన్వెస్టర్లు 47.95 కోట్ల షేర్లను విక్రయించారు. మొత్తం నెట్ సెల్ విలువ రూ.41,449 కోట్లుగా నమోదైంది. ఈ కాలంలో స్టాక్ ధర 26.20 శాతం క్షీణించింది.

కోట‌క్ మ‌హీంద్రా బ్యాంకుపై అధిక ఒత్తిడి..

కోటక్ మహీంద్రా బ్యాంక్ కూడా FIIల భారీ అమ్మకాల జాబితాలో చోటు దక్కించుకుంది. ప్రైవేట్ బ్యాంకింగ్ రంగంలో ఒత్తిడి కొనసాగుతున్న నేపథ్యంలో విదేశీ ఇన్వెస్టర్లు ఈ స్టాక్‌లో వాటాలను తగ్గించినట్లు మార్కెట్ వర్గాలు చెబుతున్నాయి. దేశంలోని ప్రముఖ టెలికాం సంస్థ భారతి ఎయిర్‌టెల్‌లో గత త్రైమాసికంలో FIIలు 5.87 కోట్ల షేర్లను విక్రయించారు. మొత్తం నెట్ సెల్ విలువ రూ.11,287 కోట్లుగా నమోదైంది. ఈ కాలంలో స్టాక్ ధర 15.35 శాతం పడిపోయింది. ఐసీఐసీఐ బ్యాంక్‌లో కూడా విదేశీ ఇన్వెస్టర్లు వాటాలను గణనీయంగా తగ్గించారు. డిసెంబర్ 2025 నుంచి మార్చి 2026 మధ్య 8.18 కోట్ల షేర్లను విక్రయించారు. నెట్ సెల్ విలువ రూ.10,973 కోట్లుగా ఉండగా, స్టాక్ 10.20 శాతం క్షీణించింది. ఫుడ్ డెలివరీ రంగానికి చెందిన ఎటర్నల్ (జొమాటో)లో మార్చి 2026 త్రైమాసికంలో 35.09 కోట్ల షేర్లను FIIలు విక్రయించారు. ప్రైమ్ ఇన్ఫోబేస్ డేటా ప్రకారం నెట్ సెల్ విలువ రూ.9,147 కోట్లుగా నమోదైంది. ఈ కాలంలో స్టాక్ ధర 17.65 శాతం తగ్గింది.

ఐటీ రంగంలోనూ..

దేశంలోని ప్రముఖ ఐటీ దిగ్గజం ఇన్ఫోసిస్‌లో కూడా విదేశీ ఇన్వెస్టర్లు వాటాలను తగ్గించారు. గత త్రైమాసికంలో 5.76 కోట్ల షేర్లను విక్రయించగా, నెట్ సెల్ విలువ రూ.8,112 కోట్లుగా నమోదైంది. స్టాక్ ధర 22.58 శాతం పడిపోయింది. ముకేష్ అంబానీ నేతృత్వంలోని రిలయన్స్ ఇండస్ట్రీస్‌లో కూడా FII ల‌ అమ్మకాలు కొనసాగాయి. మార్చి 2026తో ముగిసిన త్రైమాసికంలో 5.54 కోట్ల షేర్లను విక్రయించారు. నెట్ సెల్ విలువ రూ.7,815 కోట్లుగా ఉండగా, స్టాక్ ధర 14.42 శాతం తగ్గింది. దేశంలోని అతిపెద్ద కార్ల తయారీ సంస్థ మారుతీ సుజుకీ ఇండియాలో 0.52 కోట్ల షేర్లను FIIలు విక్రయించారు. ప్రైమ్ ఇన్ఫోబేస్ డేటా ప్రకారం నెట్ సెల్ విలువ రూ.7,409 కోట్లుగా నమోదైంది. ఈ కాలంలో స్టాక్ 26.30 శాతం క్షీణించింది.

యుద్ధం ముగిస్తే చ‌క్క‌ని అవ‌కాశం..

టాటా కన్సల్టెన్సీ సర్వీసెస్ కూడా FIIల అమ్మకాల ప్రభావాన్ని ఎదుర్కొంది. ఐటీ రంగంలో గ్లోబల్ అనిశ్చితులు, వృద్ధి మందగమన భయాలు విదేశీ ఇన్వెస్టర్లను అప్రమత్తం చేస్తున్నాయి. దేశంలోని ప్రముఖ నిర్మాణ సంస్థ లార్సెన్ అండ్ టుబ్రోలో మార్చి 2026 త్రైమాసికంలో 1.74 కోట్ల షేర్లను FIIలు విక్రయించారు. నెట్ సెల్ విలువ రూ.6,631 కోట్లుగా నమోదైంది. ఈ కాలంలో స్టాక్ ధర 14.19 శాతం పడిపోయింది. అయితే యుద్ధం నేప‌థ్యంలో ఆయా షేర్ల ధ‌ర‌లు మ‌రింత క్షీణించాయి. ఈ క్ర‌మంలో యుద్ధం ముగింపు గ‌న‌క చోటు చేసుకుంటే పెట్టుబ‌డిదారుల‌కు ఇది చ‌క్క‌ని అవ‌కాశంగా నిలుస్తుంద‌ని విశ్లేష‌కులు చెబుతున్నారు. అయితే మార్కెట్ స్థితిగ‌తులు, కంపెనీ ప‌రిస్థితుల‌ను బ‌ట్టి పెట్టుబ‌డులు పెట్టాల‌ని, ఆర్థిక నిపుణుల స‌ల‌హా తీసుకోవాల‌ని వారు సూచిస్తున్నారు.