Anil Ambani ED Action | 2 చార్టర్డ్ విమానాలు, 6 ప్లాట్లు జప్తు.. అనిల్ అంబానీ గ్రూప్‌పై ఈడీ పంజా: రూ.510 కోట్ల విలువైన ఆస్తులు సీజ్!

Anil Ambani ED Action | త్రినేత్ర న్యూస్ : ప్రముఖ పారిశ్రామికవేత్త అనిల్ అంబానీకి చెందిన రిలయన్స్ గ్రూప్ సంస్థలపై కేంద్ర దర్యాప్తు సంస్థ ఎన్‌ఫోర్స్‌మెంట్ డైరెక్టరేట్ (ED) మరోసారి తీవ్రస్థాయిలో విరుచుకుపడింది. రిలయన్స్ హోమ్ ఫైనాన్స్, రిలయన్స్ కమ్యూనికేషన్స్ బ్యాంక్ మోసం కేసుల్లో మనీ లాండరింగ్ నిరోధక చట్టం (PMLA) కింద ఏకంగా రూ.510 కోట్ల విలువైన చర, స్థిరాస్తులను ఈడీ అటాచ్ చేసింది. సీజ్ చేసిన ఆస్తుల్లో లగ్జరీ చార్టర్డ్ ఎయిర్‌క్రాఫ్ట్‌లు, విలాసవంతమైన ప్లాట్లు, పవన విద్యుత్ కేంద్రాలు, భారీ బ్యాంక్ డిపాజిట్లు ఉండటం దేశవ్యాప్తంగా కార్పొరేట్ వర్గాల్లో తీవ్ర సంచలనం సృష్టిస్తోంది.

సీజ్ చేసిన ఆస్తుల్లో ఏమేమి ఉన్నాయంటే?

ఈడీ విడుదల చేసిన అధికారిక ప్రకటన ప్రకారం జప్తు చేసిన ఆస్తుల వివరాలిలా ఉన్నాయి.

రెండు చార్టర్డ్ విమానాలు: వీఐపీ ప్రయాణాల కోసం వినియోగించే 2 ప్రత్యేక విమానాలు.

భూములు, ఆఫీస్ స్పేస్: మహారాష్ట్రలోని కీలక ప్రాంతాల్లో ఉన్న 6 ఖరీదైన ల్యాండ్ పార్సిల్స్ (ప్లాట్లు), ఒక కార్పొరేట్ ఆఫీస్ ప్రాంగణం.

విండ్‌మిల్లులు, డిపాజిట్లు: తమిళనాడులో ఉన్న 2 పవన విద్యుత్ ప్రాజెక్టులు (Windmills), పలు బ్యాంకుల్లోని ఫిక్స్‌డ్ డిపాజిట్లు, షేర్ మార్కెట్ పెట్టుబడులు.

రిలయన్స్ హోమ్ ఫైనాన్స్ లిమిటెడ్ / రిలయన్స్ కమర్షియల్ ఫైనాన్స్ లిమిటెడ్ కేసుకు సంబంధించి రూ.263.05 కోట్ల విలువైన ఆస్తులను, రిలయన్స్ కమ్యూనికేషన్స్ లిమిటెడ్ బ్యాంక్ ఫ్రాడ్ కేసుకు సంబంధించి రూ.247.12 కోట్ల విలువైన ఆస్తులను దర్యాప్తు సంస్థ జప్తు చేసింది.

రూ.23,100 కోట్లకు చేరిన మొత్తం సీజ్ విలువ

ఈ తాజా చర్యతో అనిల్ అంబానీ గ్రూప్‌నకు సంబంధించి పీఎంఎల్‌ఏ (PMLA), ఫెమా (FEMA) చట్టాల కింద ఈడీ ఇప్పటివరకు అటాచ్ చేసిన మొత్తం ఆస్తుల మార్కెట్ విలువ అక్షరాలా రూ.23,100 కోట్లకు చేరుకుంది.

సీబీఐ ఢిల్లీ, ఢిల్లీ పోలీసుల ఆర్థిక నేరాల విభాగం (EOW), ముంబై ఈఓడబ్ల్యూ నమోదు చేసిన పలు ఎఫ్‌ఐఆర్‌ల ఆధారంగా ఈడీ దర్యాప్తును ముమ్మరం చేసింది. రిలయన్స్ కమ్యూనికేషన్స్, రిలయన్స్ ఇన్‌ఫ్రాస్ట్రక్చర్, రిలయన్స్ పవర్, రిలయన్స్ కేపిటల్ సహా గ్రూప్‌లోని ఆరు కీలక కంపెనీలపై విచారణ కొనసాగుతోంది. ఈ కేసుల దర్యాప్తులో భాగంగా ఇప్పటివరకు 10 మందిని ఈడీ అధికారులు అరెస్ట్ చేశారు.

ప్రజాధనాన్ని విదేశాలకు మళ్లించారు: ఈడీ సంచలన ఆరోపణలు

బ్యాంకులు, ఆర్థిక సంస్థల నుంచి తీసుకున్న వేల కోట్ల ప్రజాధనాన్ని అంబానీ గ్రూప్ పక్కదారి పట్టించిందని ఈడీ స్పష్టం చేసింది. కార్పొరేట్ ఆస్తులను కాపాడుకోవడానికి దివాలా చట్టాన్ని (IBC Law) నిబంధనలకు విరుద్ధంగా దుర్వినియోగం చేశారని పేర్కొంది.

భారతీయ బ్యాంకుల నుంచి తీసుకున్న భారీ రుణాలను కాగితాలకే పరిమితమైన షెల్ కంపెనీల ద్వారా విదేశీ ట్యాక్స్ హెవెన్లకు (పన్ను తక్కువగా ఉండే దేశాలకు) తరలించారని ఏజెన్సీ ఆరోపించింది. అలా మళ్లించిన నిధులలో అత్యధిక భాగాన్ని కంపెనీ ప్రమోటర్లు, వారి కుటుంబ సభ్యుల వ్యక్తిగత విలాసాల కోసం ఉపయోగించుకున్నారని ఈడీ తన దర్యాప్తు నివేదికలో తీవ్ర ఆరోపణలు చేసింది.

ఆరోపణలను ఖండించిన అనిల్ అంబానీ

గతంలో ఈపీఎఫ్‌వో (EPFO) ప్రావిడెంట్ ఫండ్ సంస్థకు రూ.1,816.22 కోట్ల నష్టం కలిగించారనే ఆరోపణలపై రిలయన్స్ క్యాపిటల్, అనిల్ అంబానీలపై సీబీఐ కేసు నమోదు చేసిన సంగతి తెలిసిందే. అయితే, ఈ ఆరోపణలన్నింటినీ అనిల్ అంబానీ తీవ్రంగా తోసిపుచ్చారు.

రిలయన్స్ క్యాపిటల్‌లో అనిల్ అంబానీ కేవలం నాన్-ఎగ్జిక్యూటివ్ డైరెక్టర్‌గా మాత్రమే బాధ్యతలు నిర్వర్తించారని, నవంబర్ 2021లో రిజర్వ్ బ్యాంక్ ఆఫ్ ఇండియా (RBI) బోర్డును రద్దు చేసి అడ్మినిస్ట్రేటర్‌ను నియమించిందని ఆయన అధికార ప్రతినిధి స్పష్టం చేశారు. తాము ఎలాంటి అవకతవకలకు పాల్పడలేదని, చట్టపరంగా తమకున్న అన్ని హక్కులను ఉపయోగించుకుని నిజాలను నిరూపించుకుంటామని అనిల్ అంబానీ తరఫు ప్రతినిధి పేర్కొన్నారు.