Copper Prices | రాగి ధరల దూకుడు.. ఈ మెటల్‌ స్టాక్స్‌కు భారీ లాభాల ఛాన్స్..

Copper Prices | అత్యవసర పరిశ్రమల నుంచి పెరుగుతున్న డిమాండ్‌, సరఫరా పరిమితంగా ఉండడం వంటి కారణాలతో దీర్ఘకాలంలో రాగి ధరలు అధిక స్థాయిల్లో కొనసాగే అవకాశం ఉందని ఆదిత్య బిర్లా క్యాపిటల్‌ నివేదిక పేర్కొంది. రాగి ధరలు రికార్డు స్థాయిలకు సమీపంలో కొనసాగుతున్న నేపథ్యంలో హిందుస్తాన్‌ కాపర్‌, నేషనల్‌ అల్యూమినియం కంపెనీ లిమిటెడ్‌ (నాల్కో), వేదాంత అల్యూమినియం మెటల్‌, వేదాంత లిమిటెడ్‌, హిందుస్తాన్‌ జింక్‌ వంటి నాన్‌-ఫెరస్‌ మెటల్‌ కంపెనీల షేర్లు ఈ పరిస్థితి నుంచి ప్రయోజనం పొందే అవకాశం ఉందని నివేదిక తెలిపింది. కొత్త గనుల సరఫరా పరిమితంగా ఉండడం, వ్యూహాత్మక డిమాండ్‌ పెరగడం, సరఫరా గొలుసు భద్రతపై దృష్టి పెరగడం వంటి అంశాల కలయికతో సంప్రదాయ డిమాండ్‌ ఆధారిత చక్రాలకు భిన్నమైన కమోడిటీ సైకిల్‌ ఏర్పడుతోంద‌ని ఆదిత్య బిర్లా క్యాపిటల్‌ తన నివేదికలో పేర్కొంది.

నాన్‌-ఫెర‌స్ మెట‌ల్ షేర్ల‌లో బూమ్‌..

కొత్త డిమాండ్‌ మార్గాలు ఏర్పడడం, కొత్త గనుల అభివృద్ధి ప్రాజెక్టులు పరిమితంగా ఉండడం, విస్తరణ ప్రణాళికలు ఆలస్యం కావడం వంటి అంశాలు రాగి మార్కెట్‌ను దీర్ఘకాలిక సరఫరా లోటులోకి నెట్టే అవకాశం ఉందని బ్రోకరేజ్‌ తెలిపింది. ఈ పరిణామాలు రాగి ధరలను అధిక స్థాయిల్లో కొనసాగించేందుకు మద్దతు ఇస్తాయ‌ని పేర్కొంది. కమోడిటీ సైకిల్‌ విస్తరిస్తున్న కొద్దీ నాన్‌-ఫెరస్‌ మెటల్‌ షేర్లు ప్రయోజనం పొందే అవకాశం ఉందని ఆదిత్య బిర్లా క్యాపిటల్‌ తెలిపింది. ముఖ్యంగా హిందుస్తాన్‌ కాపర్‌ (హెచ్‌సీపీ), నేషనల్‌ అల్యూమినియం కంపెనీ లిమిటెడ్‌ (నాల్కో), వేదాంత అల్యూమినియం మెటల్‌ (వీఏఎంఎల్‌), హిందుస్తాన్‌ జింక్‌ (హెచ్‌జెడ్), వేదాంత లిమిటెడ్‌ (వీఈడీఎల్‌) వంటి కంపెనీలకు వివిధ పారిశ్రామిక లోహాల్లో ఉన్న ఎక్స్‌పోజర్‌ కారణంగా ప్రయోజనం ఉంటుంద‌ని నివేదిక పేర్కొంది. అయితే వేదాంత లిమిటెడ్‌పై బ్రోకరేజ్‌ రేటింగ్‌ ఇవ్వలేదు.

భారీగా రాబ‌డి..

ప్రపంచ మెటల్స్‌, మైనింగ్‌ రంగం గత కొన్నేళ్లుగా గణనీయంగా విస్తరించిందని, ఈ కమోడిటీ సైకిల్‌ ఇంకా ప్రారంభ దశలోనే ఉందని బ్రోకరేజ్‌ అభిప్రాయపడింది. ఈ నేపథ్యంలో నేషనల్‌ అల్యూమినియం కంపెనీ లిమిటెడ్‌, హిందుస్తాన్‌ కాపర్‌, హిందుస్తాన్‌ జింక్‌, గుజరాత్‌ మినరల్‌ అండ్‌ డెవలప్‌మెంట్‌ కార్పొరేషన్‌ (జీఎండీసీ) వంటి సంస్థలు అరుదైన లోహాలు, కీలక ఖనిజాల విభాగాల్లో తమ సామర్థ్యాలను పెంచుకుంటున్నాయని నివేదిక తెలిపింది. నాన్‌-ఫెరస్‌ మెటల్‌ కంపెనీలు ఈ పరిణామాలకు ప్రత్యక్షంగా ప్రయోజనం పొందే అవకాశం ఉందని, బలమైన ఆదాయ వృద్ధి కూడా వీటికి మద్దతుగా నిలుస్తుంద‌ని పేర్కొంది. అక్టోబర్ 1న‌ బీఎస్‌ఈలో నాల్కో షేర్‌ ధర 2.38 శాతం తగ్గి రూ.334.15 వద్ద ముగిసింది. కంపెనీ మార్కెట్‌ క్యాపిటలైజేషన్‌ రూ.61,371.05 కోట్లుగా ఉంది. ఈ షేర్‌ ఏడాదిలో 55 శాతం, రెండేళ్లలో 49 శాతం, మూడేళ్లలో 243 శాతం రాబడిని అందించింది.

3 ఏళ్ల‌లో 200 శాతం లాభాలు..

హిందుస్తాన్‌ కాపర్‌ షేర్‌ ధర బీఎస్‌ఈలో 2.28 శాతం తగ్గి రూ.461.95 వద్ద ముగిసింది. కంపెనీ మార్కెట్‌ క్యాపిటలైజేషన్‌ రూ.44,671.67 కోట్లుగా ఉంది. ఈ షేర్‌ ఏడాదిలో 37 శాతం, రెండేళ్లలో 32 శాతం, మూడేళ్లలో 184 శాతం రాబడిని అందించింది. వేదాంత అల్యూమినియం మెటల్‌ షేర్ గ‌త సెష‌న్‌లో 2.46 శాతం తగ్గి రూ.402.85 వద్ద ముగిసింది. గత మూడు నెలల్లో ఈ షేర్‌ 10.87 శాతం క్షీణించింది. హిందుస్తాన్‌ జింక్‌ షేర్‌ ధర 1.49 శాతం తగ్గి రూ.556.85 వద్ద ముగిసింది. ఈ మెటల్‌ షేర్‌ ఏడాదిలో 15.7 శాతం, రెండేళ్లలో 7 శాతం, మూడేళ్లలో 80 శాతం రాబడిని అందించింది. వేదాంత షేర్‌ ధర 2.70 శాతం తగ్గి రూ.251.90 వద్ద ముగిసింది. ఈ మెటల్‌ షేర్‌ ఏడాదిలో 50 శాతం, రెండేళ్లలో 35 శాతం, మూడేళ్లలో 214 శాతం రాబడిని అందించింది. అయితే ఈ స్టాక్స్‌లో పెట్టుబ‌డులు పెట్టేవారు ముందుగా నిపుణుల స‌ల‌హా తీసుకోవ‌డం మంచిది.