Amazon Great Indian Festival | అమెజాన్ గ్రేట్ ఇండియన్ ఫెస్టివల్ సేల్‌కు డేట్ ఫిక్స్.. భారీ ఆఫర్లు..

Amazon Great Indian Festival | అమెజాన్ ఇండియా తన ప్రతిష్ఠాత్మక వార్షిక సేల్ ఈవెంట్ అమెజాన్ గ్రేట్ ఇండియన్ ఫెస్టివల్ తేదీని ప్రకటించింది. అక్టోబర్ 8 నుంచి ఈ సేల్ ప్రారంభం కానుంది. ఫ్లిప్‌కార్ట్ బిగ్ బిలియన్ డేస్ సేల్‌కు ఒక రోజు ముందుగానే అమెజాన్ తన ఫెస్టివల్ సేల్‌ను ప్రారంభించనుంది. ఫ్లిప్‌కార్ట్ సేల్ అక్టోబర్ 9 నుంచి ప్రారంభం కానుంది. గ్రేట్ ఇండియన్ ఫెస్టివల్‌లో స్మార్ట్‌ఫోన్లు, కన్స్యూమర్ ఎలక్ట్రానిక్స్, గృహోపకరణాలు, ఫ్యాషన్, బ్యూటీ ఉత్పత్తులు, కిచెన్‌వేర్, రోజువారీ అవసరాల వస్తువులతోపాటు పలు ప్రధాన విభాగాలపై ప్రత్యేక ధరలు, డిస్కౌంట్లు అందుబాటులో ఉండనున్నాయి. పలు కొత్త ఉత్పత్తుల లాంచ్‌లను కూడా ఈ సందర్భంగా నిర్వ‌హించ‌నున్నారు.

10 శాతం ఇన్‌స్టంట్ డిస్కౌంట్‌..

బ్యాంకింగ్ ఆఫర్లలో భాగంగా స్టేట్ బ్యాంక్ ఆఫ్ ఇండియా క్రెడిట్, డెబిట్ కార్డులతోపాటు ఈఎంఐ లావాదేవీలపై 10 శాతం తక్షణ డిస్కౌంట్ అందించనున్నట్లు అమెజాన్ తెలిపింది. ప్రైమ్ సభ్యులకు ఎంపిక చేసిన ఉత్పత్తులపై అదనంగా 10 శాతం వరకు డిస్కౌంట్ లభించనుంది. సేల్‌లో బ్లాక్‌బస్టర్ డీల్స్, టాప్ 100 డీల్స్, మెగా డీల్స్ వంటి ప్రత్యేక ఆఫర్ విభాగాలు ఉండనున్నాయి. సాయంత్రం సమయంలో ప్రత్యేక డిస్కౌంట్లు కూడా అందుబాటులోకి రానున్నాయి. బై మోర్ సేవ్ మోర్, ఎక్స్చేంజ్ మేళా, నో-కాస్ట్ ఈఎంఐ వంటి కొనుగోలు సదుపాయాలను కూడా అమెజాన్ అందిస్తోంది. ఫెస్టివల్ సందర్భంగా అమెజాన్ ప్రైమ్ వీడియోలోనూ ప్రత్యేక కార్యక్రమాలు ప్రసారం కానున్నాయి. భారతీయ భాషల్లో ప్రాంతీయ కంటెంట్‌తోపాటు ఒరిజినల్ కార్యక్రమాలతో కూడిన ప్రత్యేక ఫెస్టివ్ కేటలాగ్‌ను ప్రైమ్ వీడియో అందుబాటులోకి తీసుకురానుంది.

1.60 ల‌క్ష‌ల ఉద్యోగ అవ‌కాశాలు..

పండుగ సీజన్‌లో పెరగనున్న ఆర్డర్లను నిర్వహించేందుకు అమెజాన్ తన కార్యకలాపాల నెట్‌వర్క్‌లో 1.6 లక్షలకు పైగా సీజనల్ ఉద్యోగ అవకాశాలను కల్పించనున్నట్లు తెలిపింది. సుమారు 400 నగరాల్లో ఈ ఉద్యోగాలు అందుబాటులో ఉండనున్నాయి. ఇందులో ప్రధాన నగరాలతోపాటు టైర్-2, టైర్-3 నగరాలు కూడా ఉన్నాయి. ఫెస్టివ్ సీజన్ డిమాండ్‌ను ఎదుర్కొనేందుకు అమెజాన్ దేశీయ మౌలిక సదుపాయాలను కూడా విస్తరించింది. 20 కొత్త ఫుల్‌ఫిల్‌మెంట్ సెంటర్లు, ఆరు సార్ట్ సెంటర్లు, 150 లాస్ట్-మైల్ డెలివరీ స్టేషన్లను తన నెట్‌వర్క్‌లో చేర్చింది. గతేడాది కాలంలో 3 లక్షలకు పైగా కొత్త విక్రేతలను చేర్చుకోవడంతో అమెజాన్‌లో నమోదైన విక్రేతల సంఖ్య 20 లక్షలకు పైగా చేరింది. డెలివరీ విషయంలోనూ అమెజాన్ ప్రత్యేక ఏర్పాట్లు చేసింది. 10 లక్షలకు పైగా ఉత్పత్తులకు అదే రోజు డెలివరీ సదుపాయం, 40 లక్షలకు పైగా ఉత్పత్తులకు మరుసటి రోజు డెలివరీ సదుపాయం అందించనున్నట్లు కంపెనీ తెలిపింది. మిగిలిన ఉత్పత్తులకు ప్రైమ్ షిప్పింగ్ సహా సాధారణ డెలివరీ సేవలు కొనసాగనున్నాయి.

60కి పైగా న‌గ‌రాల్లో అమెజాన్ నౌ సేవ‌లు..

అమెజాన్ తన క్విక్-కామర్స్ సేవ అమెజాన్ నౌ ను కూడా ఫెస్టివల్ సీజన్‌లో మరింత విస్తరించనుంది. ప్రస్తుతం 60కి పైగా నగరాల్లో ఈ సేవ అందుబాటులో ఉంది. జలంధర్, తిరుపతి, వరంగల్, ధార్వాడ్, వెల్లూరు, బెర్హంపూర్ వంటి మెట్రో కాని నగరాల్లోనూ అమెజాన్ నౌ సేవలు అందుతున్నాయి. అమెజాన్ నౌ ద్వారా కిరాణా సరుకులు, తాజా పండ్లు, కూరగాయలు, వ్యక్తిగత సంరక్షణ ఉత్పత్తులు, ఎంపిక చేసిన చిన్న గృహోపకరణాలను వేగంగా డెలివరీ చేయనున్నారు. దీపావళికి ముందే అమెజాన్ నౌ సేవలను 100 నగరాలకు విస్తరించాలని అమెజాన్ లక్ష్యంగా నిర్ణ‌యించుకుంది. ప్రధాన మొబైల్ అప్లికేషన్‌లోని ప్రత్యేక విభాగం ద్వారా ప్రాంతాన్ని బట్టి ఈ సేవలను వినియోగించుకోవచ్చు.