21st January 2026 Gold And Silver Rates | ప‌ట్ట‌ప‌గ్గాల్లేని ప‌సిడి.. ఒక్క రోజే రూ.5వేలు పెరిగిన బంగారం ధ‌ర‌..

21st January 2026 Gold And Silver Rates | జనవరి 21న బులియన్ మార్కెట్‌లో బంగారం, వెండి ధరలు మరోసారి రికార్డు స్థాయికి చేరాయి. అంతర్జాతీయ మార్కెట్ల ధోరణికి అనుగుణంగా, సుర‌క్షిత‌మైన‌ పెట్టుబడులకు డిమాండ్ పెరగడం, డాలర్ బలహీనపడటంతో బంగారం ధర 10 గ్రాములకు రూ.1.55 లక్షల మార్కును దాటగా, వెండి ధర కిలోకు రూ.3.25 లక్షలకుపైగా ట్రేడ్ అవుతోంది. అమెరికా అధ్యక్షుడు డొనాల్డ్ ట్రంప్ గ్రీన్‌ల్యాండ్‌పై తన వైఖరితో యూరప్‌తో వాణిజ్య యుద్ధం మళ్లీ చెలరేగే పరిస్థితులు ఏర్పడటం, నాటో కూటమిలో అనిశ్చితి పెరగడం వంటి అంశాలు పెట్టుబడిదారులను బంగారం వైపు మళ్లించాయి. ఎంసీఎక్స్ ఫ్యూచర్స్ మార్కెట్‌లో ఫిబ్రవరి 5, 2026 కాంట్రాక్టుకు గాను బంగారం ధర బుధవారం 3.53 శాతం పెరిగి 10 గ్రాములకు రూ.1,55,886 వద్ద ట్రేడ‌వుతోంది. అదే విధంగా మార్చి 5, 2026 కాంట్రాక్టుకు వెండి ధర 0.69 శాతం పెరిగి కిలోకు రూ.3,25,903 వ‌ద్ద ట్రేడ్ అవుతోంది.

స్పాట్ మార్కెట్ ధ‌ర‌లు..

ముంబై స్పాట్ మార్కెట్‌లో 24 క్యారెట్ల బంగారం ధర 10 గ్రాములకు రూ.1,54,800గా నమోదై ఆల్‌టైమ్ హైని తాకింది. 22 క్యారెట్ల బంగారం ధర రూ.1,41,900గా ఉంది. ఈ ధరల్లో జీఎస్టీ, మేకింగ్ ఛార్జిలు కల‌ప‌లేదని వ్యాపార వర్గాలు తెలిపాయి. అదే సమయంలో వెండి ధర కూడా కిలోకు రూ.3,25,100కు చేరి సరికొత్త రికార్డు నెలకొల్పింది. దేశంలోని ప్రధాన నగరాల్లో కూడా బంగారం ధరలు దాదాపు ఇదే స్థాయిలో కొనసాగుతున్నాయి. ఢిల్లీ, జైపూర్‌లలో 10 గ్రాముల‌ 24 క్యారెట్ల బంగారం ధ‌ర‌ రూ.1,54,950గా ఉండగా, హైదరాబాద్, చెన్నై, బెంగళూరు, ముంబై, కోల్‌కతా, పుణే వంటి నగరాల్లో రూ.1,54,800 వద్ద కొన‌సాగుతోంది. 22 క్యారెట్ల బంగారం ధరలు ఎక్కువ నగరాల్లో రూ.1,41,900 నుంచి రూ.1,42,050 మధ్య కొనసాగుతున్నాయి.  కాగా మంగ‌ళ‌వారం 24 క్యారెట్ల బంగారం ధ‌ర 10 గ్రాముల‌కు రూ.1,49,780 ఉండ‌గా బుధ‌వారం అది ఏకంగా రూ.5వేలు పెర‌గ‌డం విశేషం.

అంత‌ర్జాతీయంగా..

అంతర్జాతీయ మార్కెట్‌లో బంగారం ధర ఔన్సుకు 4,800 డాలర్లను దాటి కొత్త గరిష్ఠాన్ని నమోదు చేసింది. యూఎస్ స్పాట్ గోల్డ్ ధర 1.2 శాతం పెరిగి ఔన్సుకు 4,821.26 డాలర్లకు చేరగా, ఫ్యూచర్స్ ధరలు 4,813.50 డాలర్లకు పెరిగాయి. అయితే వెండి ధర స్వల్పంగా తగ్గి ఔన్సుకు 93.59 డాలర్లకు చేరింది, అయితే అంతకుముందు రోజు ఇది 95.87 డాలర్ల రికార్డు స్థాయిని తాకింది. క్యాపిటల్.కామ్ సీనియర్ మార్కెట్ అనలిస్ట్ కైల్ రోడా మాట్లాడుతూ, ట్రంప్ తీసుకుంటున్న నిర్ణయాల వల్ల అమెరికాపై నమ్మకం తగ్గుతోందని, ముఖ్యంగా యూరప్ దేశాలపై టారిఫ్‌లు విధిస్తానని హెచ్చరించడం, గ్రీన్‌ల్యాండ్‌ను స్వాధీనం చేసుకోవాలన్న ఒత్తిడి పెంచడం వంటి అంశాలు భౌగోళిక రాజకీయ ఉద్రిక్తతలను పెంచుతున్నాయని అన్నారు. ఈ నేపథ్యంలో పెట్టుబడిదారులు డాలర్, ట్రెజరీ బాండ్లను విక్రయించి బంగారంలో పెట్టుబడులు పెడుతున్నారని ఆయన వివరించారు.

మ‌రింత పెర‌గ‌నున్న డిమాండ్‌..?

భారతదేశంలో బంగారం ధరలు ప్రధానంగా అంతర్జాతీయ మార్కెట్ రేట్లు, దిగుమతి సుంకాలు, పన్నులు, రూపాయి-డాలర్ మారకపు విలువల ఆధారంగా మారుతుంటాయి. దేశంలో బంగారం కేవలం పెట్టుబడిగానే కాకుండా సంస్కృతి, సంప్రదాయాల్లో భాగంగా భావించబడుతుంది. ముఖ్యంగా వివాహాలు, పండుగల సమయంలో బంగారానికి ఉన్న డిమాండ్ మరింత పెరుగుతుంది. మారుతున్న మార్కెట్ పరిస్థితుల్లో పెట్టుబడిదారులు బంగారం, వెండి ధరలపై నిశితంగా దృష్టి పెట్టాలని నిపుణులు సూచిస్తున్నారు. అంతర్జాతీయ రాజకీయ పరిణామాలు, డాలర్ కదలికలు, వడ్డీ రేట్ల మార్పులు వంటి అంశాలు రాబోయే రోజుల్లో కూడా బులియన్ మార్కెట్‌పై ప్రభావం చూపే అవకాశముందని అంచనా వేస్తున్నారు.