Nashik Robbery Video | ప్రాణాలకు తెగించి పోరాడిన సిబ్బంది.. జ్యువెలరీ షాపులో దొంగలకు చుక్కలు

Nashik Robbery Video | త్రినేత్ర.న్యూస్ : మహారాష్ట్రలోని నాసిక్ (Nashik)లో శుక్రవారం రాత్రి ఓ భారీ దోపిడీ యత్నం విఫలమైంది. హిరావాడి ప్రాంతంలోని 'న్యూ సమృద్ధి జ్యువెలర్స్' (New Samruddhi Jewellers) లోకి నలుగురు సాయుధ దొంగలు చొరబడగా.. షాపులోని సిబ్బంది ప్రాణాలకు తెగించి వారిని ఎదిరించారు. సినిమా యాక్షన్ సీన్‌ను తలపించే ఈ ఉదంతం మొత్తం అక్కడున్న సీసీటీవీ (CCTV) కెమెరాల్లో రికార్డ్ అయింది.

పక్కా ప్లాన్‌తో ఎంట్రీ.. కానీ

శుక్రవారం రాత్రి సుమారు 9 గంటల సమయంలో దొంగలు షాపులోకి ఎంట్రీ ఇచ్చారు. తమను ఎవరూ గుర్తుపట్టకుండా ఉండేందుకు చాలా జాగ్రత్తలు తీసుకున్నారు. తలకు క్యాప్‌లు, ముఖానికి మాస్క్‌లు ధరించారు. వారిలో ఒక దొంగ ఏకంగా హెల్మెట్ పెట్టుకుని వచ్చాడు. అప్పటికి షాపులో ముగ్గురు సిబ్బంది పనిచేస్తున్నారు. ఒక్కసారిగా లోపలికి వచ్చిన దుండగుల్లో ఒకడు తన దగ్గరున్న పిస్టల్ (Pistol) తీసి సిబ్బందికి గురిపెట్టాడు.

బెదరని సిబ్బంది.. భీకర ఫైట్

తుపాకీ చూడగానే ఓ ఉద్యోగి భయంతో కిందకు వంగి దాక్కునే ప్రయత్నం చేయగా.. మిగతా ఇద్దరు మాత్రం ఏమాత్రం వెనక్కి తగ్గలేదు. ప్రాణభయాన్ని పక్కనపెట్టి దొంగలపై వీరోచితంగా తిరగబడ్డారు. ఇద్దరూ కలిసి ఆ నలుగురు దొంగలతో భీకరంగా ఫైట్ (Fight) చేశారు. సిబ్బంది ఊహించని ఈ ప్రతిఘటనతో కంగుతిన్న దొంగలు.. దోపిడీ ప్లాన్‌ను వదిలేసి, తోకముడిచి అక్కడినుంచి పరారయ్యారు.

సిబ్బందికి తీవ్ర గాయాలు.. దర్యాప్తు ముమ్మరం

దొంగలను అడ్డుకునే క్రమంలో జరిగిన ఈ పెనుగులాటలో ఒక ఉద్యోగికి తీవ్ర గాయాలయ్యాయి. దుండగులు అతని తలపై తుపాకీ వెనుక భాగంతో (Pistol butt) పదే పదే బలంగా కొట్టారు. గాయపడిన ఆ ఉద్యోగిని వెంటనే ట్రీట్‌మెంట్ (Treatment) కోసం జిల్లా ప్రభుత్వ ఆసుపత్రికి తరలించారు.

సమాచారం అందుకున్న పోలీసులు వెంటనే ఘటనా స్థలానికి చేరుకున్నారు. సీసీటీవీ ఫుటేజ్‌ను విశ్లేషించి, నిందితులను పట్టుకునేందుకు మల్టిపుల్ టీమ్స్‌ను రంగంలోకి దించారు. ప్రాణాలకు తెగించి దొంగలను ఎదిరించిన సిబ్బంది ధైర్యాన్ని స్థానికులు, నెటిజన్లు తీవ్రంగా అభినందిస్తున్నారు.

#Watch | Attempted robbery foiled by employees in a Nashik jewellery store pic.twitter.com/ccFN4vgtz5

— NDTV (@ndtv) May 16, 2026