TPCC Leader Jagga Reddy | సోడా తాగారు.. కష్టాలు విన్నారు.. స్పాట్‌లోనే లక్ష ఇచ్చారు: జగ్గారెడ్డి ఔదార్యం

TPCC Leader Jagga Reddy | త్రినేత్ర.న్యూస్ : రాజకీయ నాయకులు హామీలు ఇవ్వడం సహజం. కానీ కొందరు మాత్రమే కష్టాల్లో ఉన్నవారిని చూడగానే చలించిపోయి, అప్పటికప్పుడు సాయం చేస్తారు. టీపీసీసీ వర్కింగ్ ప్రెసిడెంట్, సంగారెడ్డి మాజీ ఎమ్మెల్యే జగ్గారెడ్డి (Jagga Reddy) మరోసారి తన ఔదార్యాన్ని చాటుకున్నారు. సదాశివపేటలో ఓ సామాన్య మహిళకు ఆయన చేసిన సాయం ఇప్పుడు చర్చనీయాంశంగా మారింది.

అసలేం జరిగింది?

గురువారం సదాశివపేట పట్టణంలో పర్యటిస్తున్న జగ్గారెడ్డి, కారు దిగి నడుచుకుంటూ వెళ్తుండగా రోడ్డు పక్కన నిమ్మకాయ సోడా (Lemon Soda) అమ్మే బండి కనిపించింది. ఆయన అక్కడ ఆగి, సోడా తాగుతూ ఆ మహిళతో మాట కలిపారు.

రూ.లక్ష ఎందుకు ఇచ్చారు?

"వ్యాపారం ఎట్లుంది.. మంచిగా నడుస్తుందా?" అని జగ్గారెడ్డి ఆరా తీశారు. దీనికి ఆ మహిళ స్పందిస్తూ.. "ప్రస్తుతం ఏమీ మిగలడం లేదు సార్. కొత్త మిషిన్ కొనుక్కుంటే గిరాకీ బాగుంటుంది. కానీ చేతిలో డబ్బులు లేవు. మీరు ఏదైనా సాయం చేస్తే బండి మంచిగా నడుపుకుంటాం" అని తన గోడు వెల్లబోసుకుంది. "ఎంత డబ్బులు ఉంటే మెషిన్ వస్తుంది?" అని జగ్గారెడ్డి అడగ్గా.. "లక్ష రూపాయలు పెడితే కొత్త మెషిన్ వస్తుంది. ఎండాకాలంలో రోజుకు మూడు వేల దాకా వ్యాపారం చేసుకోవచ్చు" అని ఆమె బదులిచ్చింది.

దేవుడు ఆదేశించాడు

ఆమె మాటలు విన్న వెంటనే జగ్గారెడ్డి మరో ఆలోచన లేకుండా తన జేబులోంచి రూ.లక్ష (Rs 1 Lakh) తీసి ఆమె చేతిలో పెట్టారు. "ఇదిగో ఈ లక్ష రూపాయలు తీసుకో.. ఎండాకాలం వచ్చేలోగా సోడాల మెషిన్ కొనుక్కో. వ్యాపారం మంచిగా చేసుకో" అని చెప్పారు. ఊహించని ఈ పరిణామానికి ఆ మహిళ ఆశ్చర్యపోయింది. "అయ్యో సార్.. ఇప్పుడే ఇచ్చేస్తున్నారా" అంటూ ఆనందంతో జగ్గారెడ్డికి నమస్కరించింది.

జగ్గారెడ్డి ఎమోషనల్ కామెంట్స్

ఈ సందర్భంగా జగ్గారెడ్డి మాట్లాడుతూ.. "ఆ దేవుడు ఆదేశించాడు.. అందుకే నేను ఇట్లా కారు దిగి నడుచుకుంటూ వచ్చిన. ఈరోజు నాతో నీకు సాయం జరగాలని రాసిపెట్టి ఉంది. ఎవరైనా కష్టాల్లో ఉన్నారంటే వెంటనే సాయం చేసే గుణం నాది. నా తల్లిదండ్రులు నాకు ఇట్లాంటి పుట్టుకనిచ్చారు" అని వ్యాఖ్యానించారు. ప్రస్తుతం జగ్గారెడ్డి చేసిన సాయం, ఆయన మాట్లాడిన మాటలకు సంబంధించిన వీడియో సోషల్ మీడియాలో వైరల్ అవుతోంది.