Viral Video | సీఎం రాకముందే హెలిప్యాడ్‌లోకి దూసుకొచ్చిన ఎద్దు.. పరుగులు పెట్టిన పోలీసులు!

Viral Video | త్రినేత్ర.న్యూస్ : బీహార్‌లోని బేగుసరాయ్‌ (Begusarai) లో ముఖ్యమంత్రి నితీశ్ కుమార్ పర్యటన సందర్భంగా ఊహించని ఘటన చోటుచేసుకుంది. సీఎం నితీశ్ కుమార్ ప్రయాణిస్తున్న హెలికాప్టర్ ల్యాండ్ అయ్యేందుకు ఏర్పాటు చేసిన హెలిప్యాడ్ ఏరియాలోకి సడెన్‌గా ఓ ఎద్దు దూసుకొచ్చింది. ముఖ్యమంత్రి రాకకు సరిగ్గా కొద్ది నిమిషాల ముందు ఈ ఘటన జరగడంతో అక్కడ కాసేపు తీవ్ర గందరగోళం నెలకొంది.

పరుగులు పెట్టిన పోలీసులు

హెలిప్యాడ్ వద్ద భద్రతా ఏర్పాట్లు పర్యవేక్షిస్తున్న పోలీసులు, అధికారులు ఎద్దు రాకతో ఒక్కసారిగా ఉలిక్కిపడ్డారు. అది ఎవరిపై దాడి చేస్తుందోనన్న ఆందోళనతో వెంటనే అప్రమత్తమయ్యారు. ఎద్దును అక్కడ నుంచి సురక్షితంగా బయటకు పంపించేందుకు, పరిస్థితిని అదుపులోకి తెచ్చేందుకు పోలీసు సిబ్బంది అటూ ఇటూ పరుగులు తీస్తూ నానా తంటాలు పడాల్సి వచ్చింది.

భద్రతా వైఫల్యంపై విమర్శలు

పోలీసులు ఎట్టకేలకు ఆ ఎద్దును హెలిప్యాడ్ పరిసరాల నుంచి విజయవంతంగా తరిమికొట్టడంతో అంతా ఊపిరి పీల్చుకున్నారు. ఆ తర్వాత కొద్దిసేపటికే సీఎం నితీశ్ కుమార్ హెలికాప్టర్ అక్కడ సురక్షితంగా ల్యాండ్ అయింది. అయితే, ముఖ్యమంత్రి రాక నేపథ్యంలో అత్యంత భారీ భద్రత ఉండే ప్రదేశంలోకి ఇలా ఓ ఎద్దు సునాయాసంగా ప్రవేశించడం అధికారుల భద్రతా వైఫల్యాన్ని ఎత్తిచూపుతోందని పలువురు విమర్శిస్తున్నారు. ప్రస్తుతం ఈ ఘటనకు సంబంధించిన వీడియో నెట్టింట తెగ వైరల్ అవుతోంది.

https://x.com/Nalanda_index/status/2032715846477656335