అసెంబ్లీ గడప తొక్కని కేసీఆర్… సభకు దూరంగా ఉండటం వెనుక 6 కారణాలు

                       అసెంబ్లీకి కేసీఆర్ దూరంగా ఎందుకు? తెరవెనుక నడుస్తున్న 6 రాజకీయ లెక్కలు!

 

తెలంగాణలో అధికారం మారి దాదాపు వెయ్యి రోజులు. ఈ కాలంలో ప్రధాన ప్రతిపక్ష నేత, బీఆర్ఎస్ అధినేత కేసీఆర్ అసెంబ్లీకి హాజరైంది అత్యంత పరిమితంగానే. సమావేశాలు జరిగిన ప్రతిసారీ “ఈసారైనా కేసీఆర్ సభకు వస్తారా? సీఎం రేవంత్ రెడ్డితో ముఖాముఖి తలపడతారా?” అనే చర్చ జరగడం... చివరకు ఆయన దూరంగానే ఉండటం రాజకీయంగా ఆసక్తికరంగా మారింది. ఇప్పుడు సీఎం రేవంత్ రెడ్డి ఇదే అంశాన్ని ప్రధాన రాజకీయ అస్త్రంగా మార్చారు. “అసెంబ్లీకి రావాలి... లేదంటే గజ్వేల్ ఎమ్మెల్యేగా రాజీనామా చేయాలి” అంటూ నేరుగా సవాల్ చేస్తున్నారు. అయినా కేసీఆర్ వైఖరిలో మార్పు కనిపించడం లేదు. ప్రభుత్వాన్ని ప్రశ్నించేందుకు అసెంబ్లీ అత్యంత కీలకమైన రాజ్యాంగ వేదిక. పైగా కేసీఆర్ సాధారణ ఎమ్మెల్యే కాదు... ప్రధాన ప్రతిపక్ష నేత. మరి ఆయన సభకు ఎందుకు దూరంగా ఉంటున్నారు? ఆయన మనసులో ఏముందో నిర్ధారించి చెప్పడం సాధ్యం కాదు. కానీ కేసీఆర్ రాజకీయ అనుభవం, గతంలో సభ నడిచిన తీరు, ప్రస్తుత అధికార–ప్రతిపక్ష సమీకరణాలను కలిపి చూస్తే... ఆయన అసెంబ్లీకి దూరంగా ఉండటం వెనుక ఆరు ప్రధాన రాజకీయ లెక్కలు కనిపిస్తున్నాయి.

1. సంఖ్యాబలం వాళ్లది... సభలో అడ్వాంటేజ్ కూడా వాళ్లకే!

పదేళ్లు ముఖ్యమంత్రిగా పనిచేసిన కేసీఆర్‌కు అసెంబ్లీ రాజకీయాలు కొత్త కాదు. అధికారపక్షానికి సంఖ్యాబలం ఎలాంటి అడ్వాంటేజ్ ఇస్తుందో ఆయనకు ప్రత్యక్ష అనుభవమే ఉంది. ఇప్పుడు పాత్రలు మారాయి. కేసీఆర్ ప్రతిపక్ష నేత. రేవంత్ ముఖ్యమంత్రి. సభలో కాంగ్రెస్‌కు సంఖ్యాబలం ఉంది. చర్చలు సభా నిబంధనలు, స్పీకర్ నిర్ణయాలు, కేటాయించిన సమయం ప్రకారం సాగుతాయి. ప్రతిపక్ష నేతగా కేసీఆర్ ప్రభుత్వాన్నినిలదీయగలిగినా... సభలో రాజకీయ సంఖ్యాబలం మాత్రం అధికారపక్షం వైపే ఉంటుంది. తాను లేవనెత్తే అంశాన్ని తనకు కావాల్సినంతసేపు, తనకు కావాల్సిన పద్ధతిలో ముందుకు తీసుకెళ్లే అవకాశం పరిమితంగానే ఉంటుంది. అధికారపక్ష సభ్యుల ప్రతివాదాల మధ్య తన వాదనకు కావాల్సిన రాజకీయ స్పేస్‌ను సృష్టించుకోవడం కూడా అంత సులభం కాదు. అందుకే సభలోకి వెళ్లినా తన వాదనను తాను అనుకున్న స్థాయిలో నడిపించగలనా అన్న అంచనా కేసీఆర్ రాజకీయ లెక్కలో మొదటి అంశంగా కనిపిస్తోంది.

2. కేసీఆర్ ప్రశ్నిస్తే... రేవంత్ నుంచి వెంటనే కౌంటర్!

అసెంబ్లీలో కేసీఆర్ ప్రభుత్వాన్ని ప్రశ్నిస్తే అది వన్-వే పొలిటికల్ అటాక్ గా ఉండదు. ప్రతిపక్ష నేతగా కేసీఆర్ రైతులు, ఉద్యోగాలు, సాగునీరు, ఎన్నికల హామీలు, సంక్షేమం వంటి అంశాలపై ప్రభుత్వాన్ని నిలదీయవచ్చు. కానీ ముఖ్యమంత్రిగా రేవంత్ రెడ్డికి అదే సభలో వెంటనే స్పందించే అవకాశం ఉంటుంది. అంతేకాదు... సంబంధిత మంత్రులు అధికారిక గణాంకాలు, శాఖల సమాచారం, ప్రభుత్వ రికార్డులతో సమాధానం చెప్పగలరు. అంటే కేసీఆర్ చేసే విమర్శ మాత్రమే ప్రజల్లోకి వెళ్లదు. దానికి ప్రభుత్వం ఇచ్చే కౌంటర్ కూడా అదే వేదికపై, అదే సమయంలో ప్రజల్లోకి వెళ్తుంది. పదేళ్లు ముఖ్యమంత్రిగా పనిచేసిన కేసీఆర్‌కు ఈ పార్లమెంటరీ విధానంలో అధికార, ప్రతిపక్షాల మధ్య ఉండే సంఖ్యాబల సమీకరణాలు తెలియనిది కాదు. తాను చేసే ప్రతి విమర్శకు ప్రభుత్వం వెంటనే ప్రతివాదం చేసే వేదికలో రాజకీయంగా ఎంత ప్రయోజనం పొందగలమన్న లెక్క ఆయన నిర్ణయంపై ప్రభావం చూపుతున్నట్లు కనిపిస్తోంది.

3. ప్రశ్నించడానికి వస్తే... పదేళ్ల పాలనపై సమాధానం చెప్పాల్సిందే!

బహుశా ఇందులో అత్యంత కీలకమైన అంశం ఇదే. కేసీఆర్ అసెంబ్లీకి వస్తే ఆయన కేవలం ప్రస్తుత కాంగ్రెస్ ప్రభుత్వాన్ని ప్రశ్నించే ప్రతిపక్ష నేత మాత్రమే కాదు. ఆయన పదేళ్లు తెలంగాణ ముఖ్యమంత్రిగా పనిచేసిన నాయకుడు కూడా. అందువల్ల కేసీఆర్ కాంగ్రెస్ ప్రభుత్వాన్ని ఒక అంశంపై ప్రశ్నించిన వెంటనే... అధికారపక్షం గత BRS ప్రభుత్వ నిర్ణయాలను ముందుకు తీసుకురాగలదు. కాలేశ్వరం... రాష్ట్ర అప్పులు... గత ప్రభుత్వ ఆర్థిక నిర్ణయాలు... వివిధ ప్రాజెక్టులు... పదేళ్ల పాలనలో తీసుకున్న నిర్ణయాలు—ఇలాంటి అంశాలను కాంగ్రెస్ కేసీఆర్ ముందుంచే అవకాశం ఉంటుంది. అంటే సభలో సమీకరణాలు ఒక్కసారిగా మారిపోవచ్చు. ప్రభుత్వాన్ని ప్రశ్నించడానికి వచ్చిన కేసీఆర్... తన పదేళ్ల పాలనపై అధికారపక్షం వేసే ప్రశ్నలకు కూడా సమాధానం చెప్పాల్సిన పరిస్థితి రావచ్చు. ప్రశ్నించే ప్రతిపక్ష నేతగా తనకు లభించే అడ్వాంటేజ్‌ను... పదేళ్లు అధికారంలో ఉన్న మాజీ ముఖ్యమంత్రి అనే గతం కొంతవరకు తగ్గించే అవకాశం ఉంది. ఈ అంశాన్ని కేసీఆర్ తక్కువగా అంచనా వేసే అవకాశం లేదు.

4. ప్రజా సమస్యల చర్చ... ‘కేసీఆర్ వర్సెస్ రేవంత్’గా మారే ఛాన్స్!

కేసీఆర్ సభకు వస్తే మరో పరిణామం దాదాపు సహజంగానే ఉంటుంది. తెలంగాణ రాజకీయాల్లో ప్రస్తుతం రేవంత్–కేసీఆర్ మధ్య విమర్శలు తీవ్రస్థాయిలో ఉన్నాయి. కేసీఆర్ సభలో అడుగుపెడితే సహజంగానే మీడియా, రాజకీయ పార్టీల దృష్టి మొత్తం ఈ ఇద్దరి ముఖాముఖిపైనే కేంద్రీకృతమవుతుంది. అప్పుడు రైతులు, ఉద్యోగాలు, హామీలు, సాగునీరు వంటి అంశాలపై జరగాల్సిన చర్చ కూడా... ఎవరు ఎవరిపై పైచేయి సాధించారు? ఎవరు ఎవరికి ఎలాంటి కౌంటర్ ఇచ్చారు? అనే రాజకీయ పోటీగా మారే అవకాశం ఉంటుంది. అలాంటి cముఖాముఖి పోరులో కేసీఆర్‌కు అదనంగా వచ్చే రాజకీయ ప్రయోజనం ఎంత అన్నది కూడా ఆయన బేరీజులో ఉండొచ్చు. ప్రజా సమస్యలపై జరగాల్సిన చర్చ తనకు–రేవంత్‌కు మధ్య వ్యక్తిగత రాజకీయ యుద్ధంగా మారకుండా ఉండాలన్న లెక్క కూడా ఆయన సభకు దూరంగా ఉండటంలో ఒక అంశంగా కనిపిస్తోంది.

5. గతంలో ప్రతిపక్షం ఎదుర్కొన్న అనుభవాలే ఇప్పుడు కేసీఆర్‌కు పాఠం!

ఇక్కడ కేసీఆర్ గత అనుభవం కూడా కీలకం. BRS అధికారంలో ఉన్న సమయంలో అప్పటి ప్రతిపక్షాలు అసెంబ్లీలో తమకు తగిన అవకాశం దక్కడం లేదని పలుమార్లు ఆరోపించాయి. అప్పట్లో ప్రతిపక్షంలో ఉన్న రేవంత్ రెడ్డి కూడా సభలో తీవ్ర రాజకీయ ఘర్షణలను ఎదుర్కొన్నారు. అంటే అధికారపక్షానికి బలమైన సంఖ్యాబలం ఉన్న సభలో ప్రతిపక్ష నేత ఎదుర్కొనే పరిస్థితులు ఏమిటో కేసీఆర్‌కు తెలియనివి కావు. అప్పుడు ఆయన అధికారపక్షంలో ఉన్నారు. ఇప్పుడు అదే సభలో ప్రతిపక్ష నేతగా ఉన్నారు. పదేళ్లపాటు సభను అధికారపక్షం వైపు నుంచి చూసిన అనుభవం... ఇప్పుడు ప్రతిపక్ష నేతగా తనకు ఎదురయ్యే రాజకీయ పరిస్థితులను ముందుగానే అంచనా వేసేందుకు కేసీఆర్‌కు ఉపయోగపడుతోంది. అధికారపక్షం సంఖ్యాబలంతో ఉన్న సభలో ప్రతిపక్ష నేత తన ఎజెండాను ఎంతవరకు ముందుకు తీసుకెళ్లగలరో ఆయనకు గత అనుభవంతోనే ఒక అంచనా ఉండే అవకాశం ఉంది. ఆ అనుభవం కూడా ప్రస్తుత నిర్ణయంపై ప్రభావం చూపుతున్నట్లు కనిపిస్తోంది.

6. రేవంత్ సవాల్ తర్వాత వస్తే... ‘ఒత్తిడికి వచ్చారు’ అనే ప్రచారం!

ఇప్పుడు కేసీఆర్‌కు మరో రాజకీయ ఇబ్బంది కూడా వచ్చి చేరింది. మొదట ఆయన సభకు రాకపోవడం ఒక రాజకీయ చర్చ మాత్రమే. కానీ ఇప్పుడు సీఎం రేవంత్ రెడ్డి దాన్ని నేరుగా సవాల్‌గా మార్చేశారు. “అసెంబ్లీకి రావాలి... లేకపోతే గజ్వేల్ ఎమ్మెల్యేగా రాజీనామా చేయాలి” అని పదేపదే డిమాండ్ చేస్తున్నారు. ఇలాంటి సమయంలో కేసీఆర్ సభకు వస్తే కాంగ్రెస్‌కు మరో రాజకీయ అవకాశం దొరుకుతుంది. “మేం సవాల్ చేసిన తర్వాతే కేసీఆర్ సభకు వచ్చారు” అనే నేరేటివ్‌ను అధికారపక్షం ముందుకు తీసుకెళ్లవచ్చు. దీంతో ఇప్పుడు కేసీఆర్ సభకు రావడం కూడా రాజకీయంగా ఒక సమస్య... రాకపోవడం కూడా మరో సమస్యగా మారింది. రాకపోతే—ప్రధాన ప్రతిపక్ష నేత సభకు ఎందుకు రావడం లేదన్న విమర్శ కొనసాగుతుంది. వస్తే—రేవంత్ ఒత్తిడికి స్పందించి వచ్చారన్న ప్రచారానికి అవకాశం ఉంటుంది. ప్రత్యర్థి విసిరిన సవాల్‌కు స్పందించినట్లు కనిపించకూడదన్న రాజకీయ పట్టుదల కూడా ఇప్పుడు కేసీఆర్ వైఖరిని మరింత కఠినం చేసి ఉండొచ్చు.

అయితే... అసలు కేసీఆర్ లెక్క ఏంటి?

ఈ ఆరు అంశాలను కలిపి చూస్తే కేసీఆర్ అసెంబ్లీకి దూరంగా ఉండటం వెనుక ఒక రాజకీయ లెక్క కనిపిస్తోంది. సభలో అధికారపక్షానికి సంఖ్యాబలం... తనకు లభించే స్పేస్‌పై పరిమితులు... ప్రతి విమర్శకూ ముఖ్యమంత్రి, మంత్రుల నుంచి వెంటనే వచ్చే కౌంటర్... తన పదేళ్ల పాలనపై తిరిగి ఎదురయ్యే ప్రశ్నలు... చర్చ కేసీఆర్ వర్సెస్ రేవంత్ వ్యక్తిగత పోరుగా మారే అవకాశం... ఇప్పుడు రేవంత్ సవాల్ తర్వాత సభకు వస్తే దానికి వచ్చే మరో రాజకీయ అర్థం...ఈ అంశాలన్నీ కేసీఆర్ నిర్ణయాన్ని ప్రభావితం చేస్తున్నట్లు ఆయన వరుస వైఖరిని బట్టి విశ్లేషించవచ్చు.
ప్రధాన ప్రతిపక్ష నేతగా అసెంబ్లీకి వెళ్లడం ద్వారా పొందే రాజకీయ ప్రయోజనం కంటే... అక్కడ ఎదుర్కోవాల్సిన రాజకీయ ప్రతికూలతలే ఎక్కువగా ఉన్నాయని ఆయన అంచనా వేస్తున్నట్లు కనిపిస్తోంది.

అయితే ఇక్కడే కేసీఆర్ ముందున్న అసలు రాజకీయ రిస్క్ కూడా ఉంది. ఆయన సభకు ఎంతకాలం దూరంగా ఉంటే... “ప్రధాన ప్రతిపక్ష నేతగా ప్రజలు ఇచ్చిన బాధ్యతను సభలో ఎందుకు నిర్వర్తించడం లేదు?” అనే ప్రశ్నను కాంగ్రెస్ అంత బలంగా ముందుకు తీసుకెళ్లగలదు. అందుకే కేసీఆర్ గైర్హాజరీ ఆయనకు వ్యూహాత్మక నిర్ణయం కావచ్చు. కానీ అదే సమయంలో అధికారపక్షానికి రాజకీయ అస్త్రంగానూ మారుతోంది. కేసీఆర్ మనసులో నిజంగా ఇవే కారణాలు ఉన్నాయని నిర్ధారించి చెప్పలేం. కానీ ఆయన వరుసగా అనుసరిస్తున్న వైఖరి, ప్రస్తుత సభా రాజకీయ సమీకరణాలను కలిపి చూస్తే...అసెంబ్లీకి వెళ్లడం వల్ల వచ్చే రాజకీయ లాభం కంటే... అక్కడ ఎదురయ్యే రాజకీయ ప్రతికూలతలే ఎక్కువన్న అంచనానే కేసీఆర్‌ను సభకు దూరంగా ఉంచుతోందా?
అన్న ఒక్క ప్రశ్న మాత్రం చివరకు మిగులుతోంది.