TOMCOM Overseas Jobs | విదేశాల్లో సెటిల్ అవ్వాలనుకుంటున్నారా? తెలంగాణ యువత కోసం 10 వేల ఓవర్సీస్ జాబ్స్

• తెలంగాణ యువతకు ఈ ఏడాది 10 వేల విదేశీ ఉద్యోగాలు కల్పించాలని ప్రభుత్వ ప్రధాన కార్యదర్శి సంజయ్ జాజు ఆదేశం
• టామ్‌కామ్ (TOMCOM) పనితీరు, కార్యకలాపాలపై సచివాలయంలో ఉన్నతస్థాయి సమీక్ష
• ప్రైవేట్ రిక్రూట్‌మెంట్ సంస్థలతో టైఅప్ అయ్యి స్కిల్ డెవలప్‌మెంట్, ప్లేస్‌మెంట్స్ ఇవ్వాలని అధికారులకు సూచన
• ఇప్పటివరకు 16 దేశాల్లో 14,509 మందికి విదేశీ ఉపాధి కల్పించినట్లు వెల్లడించిన ఉన్నతాధికారులు

TOMCOM Overseas Jobs | త్రినేత్ర.న్యూస్ : విదేశాల్లో ఉద్యోగం చేయాలనే కల ఉందా? అయితే తెలంగాణ యువతకు ఇది నిజంగా గుడ్ న్యూస్. విదేశీ ఉపాధి అవకాశాలను మెరుగుపరిచే దిశగా రాష్ట్ర ప్రభుత్వం కీలక అడుగులు వేస్తోంది. ఈ ఏడాది ఏకంగా 10 వేల మంది యువతకు ఓవర్సీస్ జాబ్స్ (Overseas Jobs) కల్పించడమే లక్ష్యంగా సమగ్ర యాక్షన్ ప్లాన్ సిద్ధం చేయాలని 'తెలంగాణ ఓవర్సీస్ మ్యాన్‌పవర్ కంపెనీ' (TOMCOM) అధికారులను ప్రభుత్వ ప్రధాన కార్యదర్శి (CS) సంజయ్ జాజు ఆదేశించారు.

 

గురువారం సచివాలయంలో టామ్‌కామ్ పనితీరు, భవిష్యత్ కార్యకలాపాలపై సీఎస్ ఉన్నతస్థాయి సమీక్ష నిర్వహించారు. చట్టబద్ధమైన, సురక్షితమైన విదేశీ ఉద్యోగాలను గుర్తించి మన యువతకు అందించడమే టామ్‌కామ్ మెయిన్ టార్గెట్ కావాలని ఆయన స్పష్టం చేశారు. కేవలం లక్ష్యాలు పెట్టుకోవడమే కాకుండా, పక్కా రిజల్ట్స్ వచ్చేలా స్కిల్ డెవలప్‌మెంట్ (Skill Development), ప్లేస్‌మెంట్ ప్రోగ్రామ్స్ డిజైన్ చేయాలని అధికారులకు దిశానిర్దేశం చేశారు.

అంతర్జాతీయ మార్కెట్‌లో ఏయే దేశాల్లో, ఏయే రంగాల్లో స్కిల్డ్ మ్యాన్‌పవర్‌కు (Skilled Manpower) డిమాండ్ ఉందో గుర్తించాలన్నారు. దీనికోసం అర్హత కలిగిన ప్రైవేట్ రిక్రూట్‌మెంట్ ఏజెన్సీలతో పారదర్శకంగా టైఅప్ (Tie-up) అవ్వాలని ఆదేశించారు. అభ్యర్థుల ఎంపిక నుంచి శిక్షణ ఇచ్చి విదేశాలకు పంపే వరకు ప్రతి దశలోనూ పక్కా ప్రణాళిక, టైమ్ లైన్‌తో కూడిన రోడ్‌మ్యాప్ (Roadmap) రెడీ చేయాలని సూచించారు. ప్రైవేట్ సంస్థల భాగస్వామ్యంతో యువతకు అవకాశాలు మరింత చేరువ అవుతాయని, అయితే నిబంధనల అమలులో విశ్వసనీయత అత్యంత కీలకమని సీఎస్ స్పష్టం చేశారు.

 

ఈ సమావేశంలో స్కిల్, హ్యూమన్ క్యాపిటల్ సెక్రటరీ డి. హరిచందన టామ్‌కామ్ ప్రోగ్రెస్ రిపోర్ట్‌ను వివరించారు. ఇప్పటివరకు 16 దేశాల్లో సుమారు 14,509 మందికి విదేశీ ఉద్యోగాలు కల్పించినట్లు తెలిపారు. ఈ ట్రాక్ రికార్డ్‌పై హర్షం వ్యక్తం చేసిన సీఎస్ సంజయ్ జాజు.. భవిష్యత్తులో ఈ సంఖ్యను భారీగా పెంచేలా కార్యకలాపాలను విస్తరించాలని సూచించారు. ఈ రివ్యూ మీటింగ్‌లో టామ్‌కామ్ ఎండీ కాంతి వెస్లీ తదితరులు పాల్గొన్నారు.