Telangana Youth Russia War | రష్యా యుద్ధభూమిలో తెలంగాణ యువకులు: జాబ్ పేరుతో తీసుకెళ్లి ఆర్మీలోకి.. కాపాడాలంటూ ‘ప్రజావాణి’లో కుటుంబాల రోదన

Telangana Youth Russia War | త్రినేత్ర న్యూస్ : ఉపాధి కోసం విదేశాలకు వెళ్లిన నలుగురు తెలంగాణ యువకులు ప్రాణ సంకటంలో పడ్డారు. ఏజెంట్ల మాయమాటలు నమ్మి రష్యా బాట పట్టిన వారు.. ఊహించని విధంగా రష్యా సైన్యంలో చేరాల్సి వచ్చి, ప్రస్తుతం యుద్ధభూమిలో ప్రాణభయంతో బిక్కుబిక్కుమంటున్నారు. ఉమ్మడి నిజామాబాద్ జిల్లాకు చెందిన ఆ యువకులను ఎలాగైనా క్షేమంగా స్వదేశానికి రప్పించాలని కోరుతూ వారి కుటుంబ సభ్యులు మంగళవారం హైదరాబాద్‌లోని ‘సీఎం ప్రవాసీ ప్రజావాణి’లో కన్నీటి పర్యంతమయ్యారు.

ఆయిల్ కంపెనీల పేరిట వెళ్లి.. ఆర్మీ ఉచ్చులోకి

మహాత్మా జ్యోతిబా ఫూలే ప్రజాభవన్‌లో సీఎం ప్రజావాణి రాష్ట్ర స్థాయి ఇన్‌చార్జ్, తెలంగాణ రాష్ట్ర ప్రణాళికా మండలి వైస్ చైర్‌పర్సన్ గద్వాల్ విజయలక్ష్మికి బాధితుల కుటుంబాలు వినతిపత్రం అందజేశాయి. కుటుంబ సభ్యులు తెలిపిన వివరాల ప్రకారం.. భుక్యా రవీందర్, సిర్షు అశోక్, మెగావత్ ప్రకాష్, మహమ్మద్ అఫ్జల్ ఖాన్ సుమారు ఏడు నెలల క్రితం రష్యా వెళ్లారు. ఓ ప్రముఖ ఆయిల్ కంపెనీలో భారీ వేతనంతో ఉద్యోగం ఇప్పిస్తామని నమ్మబలికిన ఏజెంట్లు వారి నుంచి లక్షల రూపాయలు వసూలు చేశారు.

తీరా అక్కడికి వెళ్లాక కొన్ని రోజులకే కంపెనీలో జీతాలు ఆగిపోయాయి. ఇదే అదనుగా భావించిన స్థానిక ఏజెంట్లు.. "ఆర్మీలో సాధారణ హెల్పర్ ఉద్యోగాలు ఉంటాయి, యుద్ధంతో సంబంధం ఉండదు" అని నమ్మించి రష్యా సైన్యంలోకి నెట్టేశారు. అయితే, సైనిక శిక్షణ పూర్తయ్యాక వారిని నేరుగా యుద్ధరంగంలోకి దింపడంతో తమ బిడ్డల ప్రాణాలకు ముప్పు వాటిల్లిందని కుటుంబ సభ్యులు గుండెలవిసేలా రోదిస్తున్నారు.

దౌత్యపరమైన చర్యలకు ప్రభుత్వం ఆదేశం

బాధిత కుటుంబాల వేడుకోలుపై గద్వాల్ విజయలక్ష్మి తక్షణమే స్పందించారు. వారికి పూర్తిస్థాయి భరోసా కల్పిస్తూ.. నలుగురు యువకులను సురక్షితంగా స్వదేశానికి రప్పించేందుకు చర్యలు ముమ్మరం చేయాలని జీఏడీ–ఎన్‌ఆర్‌ఐ (GAD-NRI) విభాగాన్ని ఆదేశించారు. ఈ ప్రక్రియలో ఢిల్లీలోని కేంద్ర విదేశీ వ్యవహారాల మంత్రిత్వ శాఖతో పాటు మాస్కోలోని భారత రాయబార కార్యాలయంతో నిరంతరం సమన్వయం చేసుకోవాలని స్పష్టం చేశారు. బాధితుల పూర్తి వివరాలతో కూడిన లేఖను ఇప్పటికే భారత ఎంబసీకి పంపినట్లు తెలిపారు.

"ఉపాధి వేటలో పరాయి దేశానికి వెళ్లి క్లిష్ట పరిస్థితుల్లో చిక్కుకున్న తెలంగాణ బిడ్డలను ఆదుకునేందుకు ప్రభుత్వం అన్ని విధాలా ప్రయత్నిస్తుంది. కుటుంబ సభ్యులు అధైర్యపడవద్దు, అధికారిక యంత్రాంగం నిరంతరం అందుబాటులో ఉంటూ వారిని సురక్షితంగా రప్పించేందుకు కృషి చేస్తుంది" అని గద్వాల్ విజయలక్ష్మి స్పష్టం చేశారు. ఈ కార్యక్రమంలో సీఎం ప్రజావాణి స్టేట్ నోడల్ ఆఫీసర్ కె. విద్యాసాగర్, రాష్ట్ర ఎన్‌ఆర్‌ఐ సలహా కమిటీ వైస్ చైర్మన్ మంద భీంరెడ్డి తదితరులు పాల్గొన్నారు.