Telangana | మ‌నువ‌రాలితో కారు డ్రైవింగ్.. ఎస్ఐకి షాకిచ్చిన ర‌వాణా శాఖ‌

Telangana | త్రినేత్ర‌.న్యూస్ : నార్సింగి పోలీసు స్టేష‌న్ ప‌రిధిలోని గంధంగూడ‌లో శ‌నివారం సాయంత్రం ఓ ఎస్ఐ ఆరున్న‌రేళ్ల వ‌య‌సున్న త‌న మ‌నువ‌రాలితో కారు డ్రైవింగ్ చేయించిన ఘ‌ట‌న తెలిసిందే. ఈ ఘ‌ట‌న‌లో నిర్ల‌క్ష్యంగా వ్య‌వ‌హ‌రించిన ఎస్ఐ పూజారి తిరుప‌తి స‌స్పెండ్ అయ్యారు. తాజాగా ఎస్ఐకి మ‌రో షాక్ త‌గిలింది. మ‌నువ‌రాలితో డ్రైవింగ్ నేర్పించిన కారు(టీఎస్‌07 జీపీ7450) రిజిస్ట్రేష‌న్‌ను ర‌వాణా శాఖ ఏడాది పాటు ర‌ద్దు చేసింది. ఇక ఎవ‌రైతే కారు న‌డిపారో ఆ మైన‌ర్‌కు 25 ఏళ్ల వ‌ర‌కు డ్రైవింగ్ లైసెన్స్ ఇవ్వ‌కూడద‌ని ర‌వాణా శాఖ నిర్ణ‌యం తీసుకున్నది. ఈ చ‌ర్య‌లు మోటార్ వెహిక‌ల్ యాక్ట్‌కు లోబ‌డే తీసుకున్నామ‌ని తెలిపారు.

హైదరాబాద్‌ కమిషనరేట్‌ పరిధిలో ఎస్సైగా పనిచేస్తున్న పూజారి తిరుపతి.. తన మనవరాలికి గంధంగూడ రోడ్డులో కారు డ్రైవింగ్‌ నేర్పిస్తుండగా... ఆ మార్గంలో వెళుతున్న వారు అడ్డుకుని ప్రమాదం జరిగితే బాధ్యత ఎవరిదని నిలదీశారు. దీంతో సదరు ఎస్సై.. కారు ఆటోమేటిక్‌దని.. కంట్రోల్‌ తన చేతిలో ఉంటుందని చెప్పి సమర్థించుకునే ప్రయత్నం చేశారు. అంతలో బాలిక.. తన తాత ఎస్సై అంటూ మాట్లాడసాగింది. ఈ క్రమంలో రోడ్డుపై ట్రాఫిక్‌ నిలిచిపోయింది. కొందరు ఈ ఘటనను వీడియో తీసి సోషల్‌ మీడియాలో వైరల్‌ చేశారు.