Snapana Tirumanjanam | ముత్యాల మాలలు, పంచామృతాభిషేఖాలు.. శ్రీ‌వారికి వైభవంగా స్నపన తిరుమంజనం

Snapana Tirumanjanam | తెల్ల ముత్యాల మెరుపులు.. వట్టివేరు, కురువేరు సుగంధాలు.. పూల పరిమళాలు.. వేదమంత్ర ఘోషలు.. వెరసి తిరుమల కొండపై సోమవారం ఆధ్యాత్మిక వైభవం వెల్లివిరిసింది. సాలకట్ల బ్రహ్మోత్సవాల్లో భాగంగా శ్రీదేవి, భూదేవి సమేత మలయప్పస్వామివారికి స్నపన తిరుమంజనం వైభవంగా నిర్వహించారు. తిరుమల ఆలయంలోని రంగనాయకుల మండపంలో మధ్యాహ్నం 1 నుంచి 3 గంటల వరకు అర్చకులు వైఖానస ఆగమ పద్ధతిలో అభిషేక కార్యక్రమాన్ని చేపట్టారు.

ఉత్సవమూర్తులను ప్రత్యేక వేదికపై కొలువుదీర్చి రంగురంగుల పుష్పాలతో సుందరంగా అలంకరించారు. స్వామివారు, అమ్మవార్లకు పాలు, పెరుగు, కొబ్బరినీళ్లు, తేనె, పసుపు, గంధంతో పంచామృత అభిషేకం నిర్వహించారు. శంఖనిధి, పద్మనిధి, సహస్రధార, కుంభధారణలతో శాస్త్రోక్తంగా స్నపనం చేశారు.

వేద మంత్రాలతో మార్మోగిన మండపం

స్నపన తిరుమంజనం సందర్భంగా టీటీడీ వేద పారాయణదారులు ఉపనిషత్‌, దశశాంతి మంత్రాలతోపాటు పురుషసూక్తం, శ్రీసూక్తం, భూసూక్తం, నీలాసూక్తం, విష్ణుసూక్తం తదితర పంచసూక్తాలను పఠించారు. అభిషేకం అనంతరం పెద్ద జీయ్యంగార్‌, చిన్న జీయ్యంగార్‌లు పలు దివ్య పాశురాలను పారాయణం చేశారు. తెల్ల ముత్యాలు, వట్టివేరు, కురువేరు, డ్రై ఫ్రూట్స్‌, గాజులు, వక్క ఆకులు, పసుపు రేకులు, రోజాలు, బటన్‌ చామంతి మాలలతో మలయప్పస్వామి, శ్రీదేవి, భూదేవిని విశేషంగా అలంకరించారు. పూల సౌరభం, సుగంధ పరిమళాలు, వేదఘోషలతో రంగనాయకుల మండపం భక్తి భావంతో నిండిపోయింది. కార్యక్రమంలో టీటీడీ ఈవో ముద్దాడ రవిచంద్ర, అదనపు ఈవో సీహెచ్ వెంకయ్య చౌదరి, ఇతర అధికారులు పాల్గొన్నారు.