Telangana Cabinet Decisions 2026 | తెలంగాణ కేబినెట్ కీలక నిర్ణయాలు: ఎల్ అండ్ టీ నుంచి మెట్రో స్వాధీనం, బడ్జెట్ తేదీ ఖరారు!

Telangana Cabinet Decisions 2026 | త్రినేత్ర.న్యూస్ : ముఖ్యమంత్రి రేవంత్ రెడ్డి అధ్యక్షతన సోమవారం జరిగిన తెలంగాణ మంత్రివర్గ సమావేశం ముగిసింది. సచివాలయంలో సుదీర్ఘంగా సాగిన ఈ భేటీలో రాష్ట్ర అభివృద్ధి, పరిపాలన పరమైన పలు కీలక అంశాలపై మంత్రిమండలి చర్చించి, సంచలన నిర్ణయాలకు ఆమోదం తెలిపింది.

మార్చి 16 నుంచి అసెంబ్లీ సమావేశాలు

రాష్ట్ర బడ్జెట్ సమావేశాల నిర్వహణపై కేబినెట్ స్పష్టతనిచ్చింది. మార్చి 16 నుండి 30వ తేదీ వరకు అసెంబ్లీ సమావేశాలు నిర్వహించాలని నిర్ణయించారు. ఈ క్రమంలోనే మార్చి 20న ఆర్థిక మంత్రి రాష్ట్ర బడ్జెట్‌ను శాసనసభలో ప్రవేశపెట్టనున్నారు.

హైదరాబాద్ మెట్రోపై కీలక నిర్ణయం

నగర రవాణా వ్యవస్థలో కీలకమైన హైదరాబాద్ మెట్రోను ఎల్ అండ్ టీ (L&T) సంస్థ నుంచి పూర్తిగా ప్రభుత్వం స్వాధీనం చేసుకోవాలని కేబినెట్ నిర్ణయించింది. ప్రజలకు మరింత చేరువగా, ప్రభుత్వ పర్యవేక్షణలో మెట్రో సేవలను మెరుగుపరచడమే లక్ష్యంగా ఈ నిర్ణయం తీసుకున్నారు.

వైద్య రంగంలో మార్పులు - ఉద్యోగులకు శుభవార్త

తెలంగాణ వైద్య విధాన పరిషత్ (TVVP) విషయంలో కేబినెట్ కీలక నిర్ణయం తీసుకుంది. టీవీవీపీ పేరును ఇకపై 'డైరెక్టరేట్ ఆఫ్ సెకండరీ హెల్త్'గా మారుస్తూ ఆమోదం తెలిపారు. వైద్య విధాన పరిషత్ ఉద్యోగులను ఇకపై ప్రభుత్వ పరిధిలోకి తీసుకురానున్నారు. దీనివల్ల వేలాది మంది ఉద్యోగులకు లబ్ధి చేకూరనుంది.

భూ కేటాయింపులు

రాష్ట్రవ్యాప్తంగా పలు అభివృద్ధి, ఆధ్యాత్మిక కార్యకలాపాల కోసం కేబినెట్ భూములను కేటాయించింది.

జేఎన్టీయూ కాలేజీ: మహబూబాబాద్ జిల్లా గుమ్మడూరులో జేఎన్టీయూ (JNTU) కాలేజీ నిర్మాణానికి 70 ఎకరాల భూమిని కేటాయించారు.

టీటీడీకి స్థలం: ఖమ్మం జిల్లాలో తిరుమల తిరుపతి దేవస్థానం (TTD) కార్యకలాపాల కోసం 20 ఎకరాల స్థలాన్ని కేటాయించారు.

పార్టీ ఆఫీసులు: జిల్లాల్లో కాంగ్రెస్ పార్టీ కార్యాలయాల నిర్మాణానికి భూ కేటాయింపులకు కేబినెట్ గ్రీన్ సిగ్నల్ ఇచ్చింది.

ప్రజా సమస్యల పరిష్కారం, విద్యా, వైద్య రంగాల బలోపేతమే లక్ష్యంగా ఈ కేబినెట్ భేటీ సాగిందని మంత్రులు తెలిపారు.