Harish Rao | టీజీ-ట్రాన్స్‌కో ప్రైవేటీక‌ర‌ణ‌ను ఆపండి.. రాహుల్‌కు హరీశ్‌రావు లేఖ

Harish Rao | తెలంగాణ విద్యుత్‌ సంస్థల ప్రైవేటీకరణ, ఈక్విటీ డైల్యూషన్‌ ప్రతిపాదనలను నిలిపివేయాలని బీఆర్‌ఎస్‌ నేత, మాజీ మంత్రి హరీశ్‌రావు డిమాండ్‌ చేశారు. ఈ మేరకు శుక్రవారం లోక్‌సభ ప్రతిపక్ష నేత రాహుల్‌గాంధీకి లేఖ రాశారు. టీజీ-ట్రాన్స్‌కో ప్రతిపాదిత ఐపీఓ, 26 శాతం వాటా తగ్గింపు నిర్ణయాన్ని వెంటనే ఉపసంహరించేలా జోక్యం చేసుకోవాలని కోరారు. టీజీ-ట్రాన్స్‌కోతో పాటు టీజీ-జెన్‌కో, సింగరేణి, డిస్కంల్లో ప్రైవేటీకరణ, ఈక్విటీ డైల్యూషన్‌కు ఎలాంటి చర్యలు తీసుకోకుండా తెలంగాణ ప్రభుత్వాన్ని ఆదేశించాలని విజ్ఞప్తి చేశారు. ఈ ప్రతిపాదనలు 2019 లోక్‌సభ ఎన్నికల కాంగ్రెస్‌ మేనిఫెస్టో, 2023 రాయ్‌పూర్‌ తీర్మానానికి ఎలా అనుగుణంగా ఉంటాయో స్పష్టం చేయాలని కోరారు.

దశాబ్దాలుగా ప్రజాధనంతో నిర్మించిన సబ్‌స్టేషన్లు, ట్రాన్స్‌మిషన్‌ లైన్లు, పవర్‌ ట్రాన్స్‌ఫార్మర్లతో టీజీ-ట్రాన్స్‌కో విద్యుత్‌ ప్రసార వ్యవస్థకు వెన్నెముకగా ఉందని హరీశ్‌రావు పేర్కొన్నారు. ఇందులో ప్రైవేట్‌ వాటాకు అవకాశం కల్పిస్తే.. టీజీ-జెన్‌కో, సింగరేణి, డిస్కంలపైనా ఇదే తరహా చర్యలు జరిగే అవకాశం ఉందని ఆందోళన వ్యక్తం చేశారు. జాతీయ స్థాయిలో వ్యూహాత్మక ప్రభుత్వ రంగ సంస్థల ప్రైవేటీకరణను కాంగ్రెస్‌ వ్యతిరేకిస్తూనే.. తెలంగాణలో కాంగ్రెస్‌ ప్రభుత్వం ఇలాంటి ప్రతిపాదనలు తీసుకురావడంపై రాహుల్‌గాంధీ స్పష్టత ఇవ్వాలన్నారు. టీజీ-ట్రాన్స్‌కో ఐపీఓను ఉపసంహరించడంతో పాటు కీలక ప్రభుత్వ రంగ సంస్థల్లో వాటా తగ్గించే చర్యలను నిలిపివేయాలని డిమాండ్‌ చేశారు.

Writing to the Leader of the Opposition, Shri @RahulGandhi ji, seeking his urgent intervention.

You oppose the privatisation of LIC and the power sector in Delhi. On what principle is your own Congress Govt in Telangana moving to privatise strategic assets like TG-TRANSCO,… pic.twitter.com/vuirKW2aEe

— Harish Rao Thanneeru (@BRSHarish) October 2, 2026