Singireddy Niranjan Reddy | ప్రశ్నిస్తారనే భయంతోనే బీఆర్ఎస్ ఎమ్మెల్యేల సస్పెన్షన్

• ప్రభుత్వంపై మాజీ మంత్రి నిరంజన్ రెడ్డి ఫైర్

Singireddy Niranjan Reddy | త్రినేత్ర.న్యూస్ : తెలంగాణ శాసనసభ (Telangana Assembly) నుండి బీఆర్ఎస్ (BRS) ఎమ్మెల్యేలను సమావేశాలు ముగిసేవరకు సస్పెండ్ చేయడంపై మాజీ మంత్రి సింగిరెడ్డి నిరంజన్ రెడ్డి తీవ్ర స్థాయిలో విరుచుకుపడ్డారు. ప్రజా సమస్యలకు సమాధానం చెప్పలేకనే ప్రభుత్వం సభ నుంచి పారిపోయిందని ఆయన ఎద్దేవా చేశారు. ప్రతిపక్ష సభ్యుల సస్పెన్షన్‌ను ఆయన తీవ్రంగా ఖండించారు.

భయంతోనే డైవర్షన్ గేమ్

అసెంబ్లీలో రెండు రోజుల పాటు ప్రభుత్వం 'డైవర్షన్ గేమ్' (Diversion game) ఆడిందని నిరంజన్ రెడ్డి విమర్శించారు. ఇక ముందు ఆ ఆటలు సాధ్యం కాదని గ్రహించి, ఉద్దేశపూర్వకంగానే బీఆర్ఎస్ ప్రజాప్రతినిధులను శాసనసభ నుండి సస్పెండ్ చేసిందన్నారు. ప్రజల సమస్యల మీద, పథకాల అమలు మీద సభలో నిలదీస్తే సమాధానం చెప్పలేమన్న భయంతోనే ప్రభుత్వం వణికిపోతోందని ఆయన ఆరోపించారు.

పోలీసులను అడ్డుపెట్టుకుని తప్పించుకోలేరు

శాసనసభ సమావేశాలు ముగిసే వరకు సభ్యులందరినీ సస్పెండ్ చేయడం గర్హనీయమైన చర్య అని ఆయన మండిపడ్డారు. అధికారంలోకి వచ్చి మూడేళ్లు తిరగక ముందే ఈ ప్రభుత్వం పూర్తిగా విఫలమైందని విమర్శించారు. కేవలం అధికారాన్ని, పోలీసులను అడ్డుపెట్టుకుని కాంగ్రెస్ ప్రభుత్వం ఎన్నాళ్లూ తప్పించుకోలేదని స్పష్టం చేశారు. చట్టసభలకు తమను రానివ్వకపోయినా.. కచ్చితంగా ప్రజాక్షేత్రంలో ప్రభుత్వ వైఫల్యాలను ఎండగడతామని నిరంజన్ రెడ్డి హెచ్చరించారు.