Sankranthi Holidays | సంక్రాంతి సెల‌వులు 8 రోజులు..! త్వ‌ర‌లోనే అధికారిక ఉత్త‌ర్వులు..!!

Sankranthi Holidays | త్రినేత్ర‌.న్యూస్ : రాష్ట్రంలో సంక్రాంతి సెల‌వుల ప్ర‌క‌ట‌న‌పై ఉత్కంఠ కొన‌సాగుతూనే ఉంది. ముందుగా ప్ర‌క‌టించిన షెడ్యూల్ ప్ర‌కారం 5 రోజులు మాత్ర‌మే సంక్రాంతి పండుగ‌కు సెల‌వులు ఇచ్చారు. కానీ మ‌రో మూడు రోజులు సెల‌వులు పొడిగించాల‌ని తెలంగాణ రాష్ట్ర ప్ర‌భుత్వం భావిస్తున్న‌ట్లు స‌మాచారం. మొత్తానికి సంక్రాంతి సెల‌వుల‌పై వ‌చ్చే వారం స్ప‌ష్ట‌త వ‌చ్చే అవ‌కాశం ఉంది.

2026లో వ‌చ్చే సంక్రాంతి పండుగ‌కు జ‌న‌వ‌రి 11 నుంచి 15వ తేదీ వ‌ర‌కు సెల‌వులు ప్ర‌క‌టిస్తున్న‌ట్లు ఇప్ప‌టికే పాఠ‌శాల విద్యాశాఖ ఉత్త‌ర్వులు జారీ చేసింది. అయితే జ‌న‌వ‌రి 10వ తేదీన రెండో శ‌నివారం కాబ‌ట్టి ఒక రోజు అద‌నంగా క‌లిసి వ‌స్తుంది. తెలంగాణ ప్ర‌భుత్వం ఇటీవ‌ల విడుద‌ల చేసిన 2026 సెల‌వుల క్యాలెండ‌ర్ ప్ర‌కారం జ‌న‌వ‌రి 15న సంక్రాంతి హాలిడే, 16న క‌నుమ హాలిడే(ఆప్ష‌న‌ల్ హాలిడే) ప్ర‌క‌టించింది. ఈ క్యాలెండ‌ర్ ప్ర‌కారం పాఠ‌శాల‌లు తిరిగి జ‌న‌వ‌రి 17న(శ‌నివారం) తెరుచుకోవాలి. కానీ క‌నుమ పండుగ మ‌రుస‌టి రోజే త‌మ పిల్ల‌ల‌ను త‌ల్లిదండ్రులు పాఠ‌శాల‌ల‌కు పంపించ‌రు అనే వాద‌న‌ను టీచ‌ర్ల యూనియ‌న్లు వినిపిస్తున్నాయి. ఈ క్ర‌మంలో జ‌న‌వ‌రి 18వ తేదీ వ‌ర‌కు సంక్రాంతి సెల‌వులు ప్ర‌క‌టించాల‌ని టీచ‌ర్ల యూనియ‌న్లు డిమాండ్ చేస్తున్నాయి. జ‌న‌వ‌రి 19 నుంచి పాఠ‌శాల‌ల‌ను తిరిగి ప్రారంభించాల‌ని కోరుతున్నారు.