Shyam Prasad Reddy | “జైలుకు పంపుతారా? ఆరోజు కేసీఆర్ కూడా మమ్మల్ని పల్లెత్తు మాట అనలేదు!”.. రేవంత్ వ్యాఖ్యలపై కన్నీరుపెట్టుకున్న రిటైర్డ్ ఇంజనీర్

• ముఖ్యమంత్రి రేవంత్ రెడ్డి 'చర్లపల్లి జైలుకు పంపుతాం' అన్న వ్యాఖ్యలపై కన్నీరుపెట్టుకున్న రిటైర్డ్ ఇంజనీర్స్ అసోసియేషన్ ప్రెసిడెంట్ శ్యామ్ ప్రసాద్ రెడ్డి
• కేసీఆర్ హయాంలో మేడిగడ్డ బ్యారేజ్ నిర్మాణాన్ని తాము వ్యతిరేకించామని, అయినా ఆయన తమను ఎప్పుడూ విమర్శించలేదన్నారు
• ఎల్ నినో (El Nino) ప్రభావంతో తెలంగాణలో కరువు ముప్పు పొంచి ఉందని, తక్షణమే కన్నెపల్లి నుంచి నీటిని పంపింగ్ చేయాలని ప్రభుత్వానికి సూచన
• ఎన్డీఎస్ఏ (NDSA) నిబంధనలకు లోబడి, తక్కువ ఖర్చుతో పంపింగ్ చేసుకునే ప్రత్యామ్నాయ మార్గాలను ఇప్పటికే ప్రభుత్వానికి లేఖ ద్వారా వివరించినట్లు స్పష్టీకరణ

Shyam Prasad Reddy | త్రినేత్ర.న్యూస్ : కాళేశ్వరం ప్రాజెక్టు (Kaleshwaram Project) చుట్టూ తెలంగాణ రాజకీయాలు, ఇంజనీరింగ్ వర్గాల్లో తీవ్ర చర్చ నడుస్తోంది. కన్నెపల్లి పంప్ హౌస్ నుంచి నీటిని ఎత్తి రైతాంగానికి అందించాలని ప్రధాన ప్రతిపక్షమైన బీఆర్ఎస్ డిమాండ్ చేస్తున్న వేళ.. సీఎం రేవంత్ రెడ్డి రిటైర్డ్ ఇంజనీర్లను ఉద్దేశించి తీవ్ర వ్యాఖ్యలు చేశారు. వారిని "చర్లపల్లి జైలుకు పంపాలి" అంటూ ముఖ్యమంత్రి చేసిన వ్యాఖ్యలపై రిటైర్డ్ ఇంజనీర్స్ అసోసియేషన్ ప్రెసిడెంట్ శ్యామ్ ప్రసాద్ రెడ్డి తీవ్ర ఆవేదన వ్యక్తం చేశారు. మీడియాతో మాట్లాడుతూ ఆయన కన్నీటిపర్యంతమయ్యారు.

మేం ఏ పార్టీ వాళ్లం కాదు.. కేసీఆర్‌ను కూడా వ్యతిరేకించాం

సీఎం రేవంత్ రెడ్డి చేసిన వ్యాఖ్యలు తమను తీవ్రంగా బాధించాయని శ్యామ్ ప్రసాద్ రెడ్డి అన్నారు. "మేము ఏ రాజకీయ పార్టీకి చెందిన వాళ్లం కాదు. కేవలం రైతుల ప్రయోజనాల దృష్ట్యా సాంకేతిక సలహాలు మాత్రమే ఇస్తున్నాం. ప్రభుత్వ సర్వీసులో ఎంతో నిబద్ధతతో పనిచేసిన మమ్మల్ని చర్లపల్లి జైలుకి పంపుతామనడం చాలా బాధాకరం. గతంలో కేసీఆర్ గారు సీఎంగా ఉన్నప్పుడు తీసుకున్న నిర్ణయాలను, మేడిగడ్డ కట్టడాన్ని మేం వ్యతిరేకించాము. కేసీఆర్ మమ్మల్ని పిలిపించుకుని మాట్లాడారు కానీ, ఎప్పుడూ విమర్శించలేదు. మేం ఎవరికీ కొమ్ము కాయడం లేదు.. కేవలం వాస్తవాలు చెబుతున్నాం" అని ఆయన స్పష్టం చేశారు.

ముంచుకొస్తున్న కరువు (El Nino).. తాగునీటికీ ఇబ్బందే

దేశంతో పాటు తెలంగాణపై ఎల్ నినో (El Nino) ప్రభావం తీవ్రంగా ఉందని, వాతావరణం చూస్తే వర్షాలు లేక ఎండలు మండిపోతున్నాయని ఆయన హెచ్చరించారు. "అమెరికన్ సొసైటీ సర్వే ప్రకారం తెలంగాణ గంభీరమైన కరువును ఎదుర్కోబోతోంది. ఇలాంటి సమయంలో ప్రాణహిత నది నుంచి నీళ్లు తీసుకురావడమే మనకున్న ఏకైక దిక్కు. ప్రాణహితలో లక్ష క్యూసెక్కులకు పైగా ప్రవాహం ఉంది. కన్నెపల్లి పంపులు నడవడానికి 93.5 మీటర్ల మినిమం డ్రా డౌన్ లెవెల్ (MDDL) సరిపోతుంది. ఆ 17 పంపులలో కనీసం 10 పంపులు రన్ చేసినా రోజుకు 3 టీఎంసీల నీటిని ఎల్లంపల్లికి పంపుకోవచ్చు. ఇప్పుడు అలెర్ట్ కాకపోతే భవిష్యత్తులో తాగునీటికి కూడా కటకటలాడాల్సి వస్తుంది" అని వివరించారు.

ఎన్డీఎస్ఏ (NDSA) రూల్స్ పాటిస్తూనే పంపింగ్ చేయొచ్చు

అన్నారం, సుందిళ్ల బ్యారేజీలలో వాటర్ స్టోర్ చేయొద్దని ఎన్డీఎస్ఏ (NDSA) చెప్పిన మాట వాస్తవమే అయినప్పటికీ, కరువు పరిస్థితుల్లో ప్రత్యామ్నాయాలు ఆలోచించక తప్పదన్నారు. "నిపుణుల పర్యవేక్షణలో పంపులు నడిపించి నీటిని తీసుకువెళ్లవచ్చు. బ్యారేజీలను పూర్తిగా నింపకుండా, కేవలం 40% కెపాసిటీ మాత్రమే వాడుకుంటే సేఫ్ గానే నీటిని పంపింగ్ (pumping) చేసుకోవచ్చు. సీపేజీలు (seepage) వస్తే పర్యవేక్షించుకుంటూ ముందుకు వెళ్లడమే మేం ప్రభుత్వానికి ఇచ్చే సలహా" అని పేర్కొన్నారు.

కాఫర్ డ్యామ్ (Cofferdam) తో పరిష్కారం

ఇలాంటి అత్యవసర పరిస్థితుల్లో మేడిగడ్డ వద్ద 'కాఫర్ డ్యామ్' నిర్మించి కేవలం 10-15 రోజుల్లో కన్నెపల్లి పంప్ హౌస్‌కి నీరు దారి మళ్లించవచ్చని ఆయన ఒక సూచన చేశారు. నాలుగు రోజుల క్రితమే నలుగురు రిటైర్డ్ ఇంజనీర్ల బృందం ప్రభుత్వానికి తక్కువ ఖర్చుతో పంపింగ్ ఎలా చేయొచ్చో వివరిస్తూ లేఖ రాసినట్లు గుర్తుచేశారు. దేవాదుల ప్రాజెక్టు ద్వారా వచ్చే నీరు హైదరాబాద్ తాగునీటి అవసరాలకు, ఎస్సారెస్పీ (SRSP) ఆయకట్టుకు ఏమాత్రం సరిపోదని శ్యామ్ ప్రసాద్ రెడ్డి కుండబద్దలు కొట్టారు. వెంటనే రాష్ట్ర ప్రభుత్వం స్పందించి రైతాంగాన్ని ఆదుకోవాలని విజ్ఞప్తి చేశారు.

Retired Engineer Shyam Prasad Reddy in tears ❗️

We have written against KCR too,
But he never threatened us,
He called us & took our points...

After so many years of sincere service,
CM Revanth threatening to Jail has pained us

కంటతడి పెట్టుకున్న రిటైర్డ్ ఇంజనీర్ శ్యాంప్రసాద్… pic.twitter.com/2QXCwxrqHu

— Dr.Krishank (@Krishank_BRS) July 12, 2026