Kavitha | రేవంత్ హిట్ల‌రే కాదు.. ఆయ‌నో తాలిబ‌న్‌

• అందుకే ఆడ‌పిల్ల‌ల‌కు చ‌దువు దూరం చేస్తుండు
• విద్యా శాఖ‌ను స‌ర్క‌స్ లెక్క మార్చిండు
• 27 వేల ప్ర‌భుత్వ స్కూళ్ల‌ను 4 వేల‌కు త‌గ్గిస్త‌ర‌ట‌
• విద్యా శాఖ మీద ఆయ‌న‌కు ఏమాత్రం ప‌ట్టు లేదు
• సీఎం రేవంత్ రెడ్డిపై టీఆర్ఎస్ చీఫ్ క‌ల్వ‌కుంట్ల క‌విత ఫైర్‌

Kavitha | త్రినేత్ర‌.న్యూస్‌: సీఎం రేవంత్‌రెడ్డి హిట్ల‌ర్ కంటే ఎక్కువేన‌ని.. ఆయ‌న ఓ తాలిబన్ అని టీఆర్ఎస్ చీఫ్ క‌ల్వ‌కుంట్ల క‌విత వ్యాఖ్యానించారు. అందుకే ఆడపిల్లలు, పేదలకు చదువులు దూరం చేసేందుకు ప్రభుత్వ స్కూళ్లు మూసేస్తమని అంటున్నారని మండిప‌డ్డారు. విద్యాశాఖను సర్కస్ లెక్క మార్చేసిండని దుయ్య‌బ‌ట్టారు. ఈమేర‌కు ఎక్స్ వేదిక‌గా సోమవారం ఆమె ఓ వీడియో సందేశం విడుదల చేశారు.

మ‌రుస‌టి రోజే ప్ర‌వేశాలు క‌ల్పించారు..

ఆడపిల్లలు, పేదలకు చదువులు దూరం చేసేందుకే ప్రభుత్వ స్కూళ్లు మూసేస్తామని చెప్తున్నాడు. రాష్ట్రంలో 27 వేల ప్రభుత్వ పాఠశాలలను 4 వేలకు కుదిస్తామంటున్నాడు. ఇలా చెప్తున్న‌ రేవంత్ రెడ్డి హిట్లర్ మాత్రమే కాదు.. అంతకన్నా ఎక్కువ. విద్యాశాఖపై పట్టు కోల్పోయిండు. ఆ శాఖ‌ను సర్కస్ లెక్క మార్చేసిండు. ఈ ఏడాది ఇంటర్మీడియట్ ఉండదు అని సీఎం ప్రకటించిన మరుసటి రోజే అడ్మిషన్లకు ఇంటర్ బోర్డు ప్ర‌వేశాలు క‌ల్పించింది అని క‌విత పేర్కొన్నారు.

డిగ్రీ అడ్మిష‌న్ల‌లో గంద‌ర‌గోళం..

జూనియర్ కాలేజీలు ప్రారంభం అయి వారం రోజులు అవుతున్నా ప్రభుత్వ, ప్రైవేట్ జూనియర్ కాలేజీలకు ఈ ప్రభుత్వం కనీసం అఫిలియేషన్‌లు ఇవ్వలేదు. డిగ్రీ అడ్మిషన్లను గందరగోళంగా మార్చేశారు. హయ్యర్ ఎడ్యుకేషన్ కౌన్సిల్ కొన్ని కోర్సులను సిఫార‌సు చేస్తే.. హయ్యర్ ఎడ్యుకేషన్ కమిషనరేట్ మరికొన్ని కోర్సులు రిఫర్ చేసింది. వాటిలో ఏ ఒక్క కోర్సుకు కూడా యూనివర్సిటీలు అప్రూవల్ ఇవ్వలేదు. అయినా దోస్త్ అడ్మిషన్ల ప్రక్రియ కొనసాగుతుంది అని టీఆర్ఎస్ చీఫ్ స్ప‌ష్టం చేశారు.

జీవో 7ను ర‌ద్దు చేయాలి..

గురుకులాల్లో వంద మందికి పైగా విద్యార్థులు చనిపోయినా ఈ ముఖ్యమంత్రి కనీసం సమీక్ష చేయడం లేదు. రూ.11 వేల కోట్ల ఫీజు రీయింబర్స్‌మెంట్ బకాయిలు చెల్లించకుండా విద్యార్థులకే ట్యూషన్ ఫీజులు ఇస్తామన్నారు. అందుకోసం జీవో నెంబర్ 7 తీసుకువచ్చారు. ఈ జీవో కారణంగా విద్యార్థులను ప్రైవేటు కాలేజీలు దోపిడీ చేసే ప్రమాదముంది. వెంటనే జీవో నెంబర్ 7ను రద్దు చేయాలి. ఫీజు నియంత్రణ చట్టం వెంటనే అమల్లోకి తెచ్చి ప్రైవేటు స్కూళ్ల దోపిడీకి అడ్డుకట్ట వేయాలి అని క‌ల్వ‌కుంట్ల క‌విత డిమాండ్ చేశారు.