Minister Ponnam | క‌ల్యాణ‌ల‌క్ష్మి, షాదీముబారక్‌పై స్టే ఎత్తివేత హర్షణీయం : మంత్రి పొన్నం ప్ర‌భాక‌ర్‌

Minister Ponnam | కల్యాణలక్ష్మి, షాదీముబారక్‌పై పథకాల అమలుపై హైకోర్టు సింగిల్‌ బెంచ్‌ విధించిన స్టేను న్యాయస్థానం ఎత్తివేయడాన్ని మంత్రి పొన్నం ప్రభాకర్‌ స్వాగతించారు. పేద, మధ్యతరగతి కుటుంబాలకు వివాహ సమయంలో ఆర్థిక భరోసా కల్పించే ఈ పథకాలు ఎంతో కీలకమైనవని ఆయన పేర్కొన్నారు. స్టే కారణంగా పెండింగ్‌లో ఉన్న అర్హులైన లబ్ధిదారుల దరఖాస్తులను వెంటనే పరిశీలించి, నిబంధనల ప్రకారం పరిష్కరించాలని అధికారులను ఆదేశించినట్లు మంత్రి తెలిపారు. అర్హత ఉన్న ఏ ఒక్క లబ్ధిదారుడికీ అన్యాయం జరగకుండా పారదర్శకంగా ప్రక్రియను పూర్తి చేసి ఆర్థిక సాయం అందించాలని సూచించినట్లు చెప్పారు.

కోర్టు విధించిన స్టేను కొందరు రాజకీయ కోణంలో చూస్తూ పథకాలు రద్దయినట్లు ప్రచారం చేయడం సరికాదని పొన్నం ప్రభాకర్‌ అన్నారు. న్యాయస్థానం తీర్పును వక్రీకరించి ప్రజల్లో గందరగోళం సృష్టించాల్సిన అవసరం ఏముందని ప్రశ్నించారు. ప్రజలకు ఇబ్బందులు కలిగే అంశాల్లో బీఆర్‌ఎస్‌, బీజేపీ నాయకులు రాజకీయాలు చేయడం సరికాదన్నారు. కాంగ్రెస్‌ ప్రభుత్వం పేదలు, బడుగు, బలహీన వర్గాల సంక్షేమానికి అత్యంత ప్రాధాన్యం ఇస్తోందని మంత్రి చెప్పారు. సంక్షేమ పథకాల ప్రయోజనాలు అర్హులైన ప్రతి కుటుంబానికి చేరేలా ప్రభుత్వం చర్యలు తీసుకుంటోందన్నారు. కళ్యాణలక్ష్మి, షాదీముబారక్‌ కింద పెండింగ్‌లో ఉన్న దరఖాస్తులను త్వరితగతిన పరిశీలించి అర్హులకు ఆర్థిక సాయం అందేలా చర్యలు తీసుకోవాలని అధికారులకు మరోసారి స్పష్టం చేసినట్లు పొన్నం తెలిపారు.