KCR Nallabelli Visit | కేసీఆర్ పరామర్శ యాత్రపై విషపు రాతలు: ‘ఆంధ్రజ్యోతి’ని తగలబెట్టి బీఆర్ఎస్వీ నేత వార్నింగ్

KCR Nallabelli Visit | త్రినేత్ర.న్యూస్ : వరంగల్ జిల్లా నల్లబెల్లిలో దివంగత మాజీ ఎమ్మెల్యే పెద్ది సుదర్శన్ రెడ్డి కుటుంబాన్ని మాజీ సీఎం కేసీఆర్ పరామర్శించిన ఘటనపై 'ఆంధ్రజ్యోతి' దినపత్రికలో వచ్చిన కథనం తీవ్ర దుమారం రేపుతోంది. ఒక మానవీయ కోణాన్ని వక్రీకరిస్తూ రాసిన ఈ వార్తపై ఉస్మానియా యూనివర్సిటీ (Osmania University) బీఆర్ఎస్వీ నాయకుడు నాగేందర్ తీవ్ర ఆగ్రహం వ్యక్తం చేశారు. కేసీఆర్‌ను కించపరిచేలా ఉన్న ఈ కథనానికి నిరసనగా ఆయన పత్రిక ప్రతులను తగలబెట్టారు.

బాధలో ఉంటే ఇలాంటి రాతలా?

నర్సంపేట మాజీ ఎమ్మెల్యే పెద్ది సుదర్శన్ రెడ్డి అకాల మరణంతో నియోజకవర్గ ప్రజలు, బీఆర్ఎస్ (BRS) కార్యకర్తలు తీవ్ర విషాదంలో ఉన్నారని నాగేందర్ ఆవేదన వ్యక్తం చేశారు. పెద్ద దిక్కును కోల్పోయిన ఆ కుటుంబాన్ని ఓదార్చేందుకు కేసీఆర్ వెళ్తే, ఆ పరామర్శ యాత్రను కూడా వక్రీకరిస్తూ నీచమైన కథనాలు వండివార్చడం పత్రికా యాజమాన్యం దిగజారుడుతనానికి నిదర్శనమని ఆయన మండిపడ్డారు.

వారి డైరెక్షన్‌లోనే పనిచేస్తున్నారు

తెలంగాణ రాష్ట్రాన్ని సాధించిన తొలి ముఖ్యమంత్రి కేసీఆర్‌పై ఇష్టానుసారం రాతలు రాస్తే ఏమాత్రం ఊరుకునేది లేదని నాగేందర్ హెచ్చరించారు. ఆంధ్రప్రదేశ్ సీఎం చంద్రబాబు నాయుడు, తెలంగాణ సీఎం రేవంత్ రెడ్డి ప్రోద్బలంతోనే ఆంధ్రజ్యోతి ఎండీ రాధాకృష్ణ (RK) ఇలాంటి వార్తలు రాస్తున్నారని తీవ్ర ఆరోపణలు చేశారు. పత్రికా విలువలను మంటగలిపి, రాజకీయ ప్రయోజనాల కోసం తెలంగాణ ఆత్మగౌరవాన్ని దెబ్బతీసే ప్రయత్నం చేస్తున్నారని విమర్శించారు.

మరోసారి రిపీట్ అయితే తీవ్ర పరిణామాలు

కేసీఆర్ లాంటి గొప్ప ఉద్యమ నాయకుడిపై ఇకముందు కూడా ఇలాగే విషం చిమ్మితే పరిణామాలు తీవ్రంగా ఉంటాయని నాగేందర్ వార్నింగ్ (Warning) ఇచ్చారు. తెలంగాణ ప్రజల మనోభావాలతో చెలగాటం ఆడితే కార్యకర్తలు ఊరుకోరని, అవసరమైతే పత్రికా యాజమాన్యానికి చెప్పుల దండలు వేసి హైదరాబాద్‌ (Hyderabad) వీధుల్లో తిప్పుతామని తీవ్ర స్థాయిలో హెచ్చరించారు. గతంలో బీఆర్ఎస్ పార్టీపై ఇలాంటి రాతలు రాసిన వారి పరిస్థితి ఏమైందో ఒకసారి గుర్తుచేసుకోవాలని ఆయన ఈ సందర్భంగా చురకలు అంటించారు.