Hyderabad Metro | రాష్ట్ర‌ప‌తి ఉత్త‌ర్వుల‌కు తూట్లు.. హైదరాబాద్ మెట్రో కాంట్రాక్ట్, ఔట్‌సోర్సింగ్ ఉద్యోగాల్లో స్థానికేత‌రులు

Hyderabad Metro | త్రినేత్ర న్యూస్‌: తెలంగాణ ప్రభుత్వ నూతన రాష్ట్రపతి ఉత్తర్వులు- 2018 (Presidential Orders) నిబంధనలను హైదరాబాద్ మెట్రో (Hyderabad Metro) రైల్ యాజమాన్యం, థర్డ్ పార్టీ కాంట్రాక్ట్ ఏజెన్సీలు తుంగలో తొక్కాయనే ఆరోపణలు వస్తున్నాయి. ప్రభుత్వ పరిధిలోని ప్రభుత్వ-ప్రైవేట్ భాగస్వామ్య (PPP) ప్రాజెక్టుల్లో స్థానిక కోటాను క‌చ్చితంగా అమలు చేయాలనే స్పష్టమైన నిబంధనలు ఉన్నప్పటికీ, వాటిని పట్టించుకోకుండా కాంట్రాక్ట్ (Contract), ఔట్‌సోర్సింగ్ (Outsourcing) ఉద్యోగాల్లో నాన్-తెలంగాణ (Non Locals) అభ్యర్థులను ఏండ్ల‌ తరబడి విధుల్లో కొనసాగించడంపై తీవ్ర నిరసనలు వ్యక్తమవుతున్నాయి.

రాష్ట్ర‌ప‌తి ఉత్త‌ర్వులు - ఉల్లంఘనలు

95 శాతం స్థానిక రిజర్వేషన్ నిబంధన: నూతన ప్రెసిడెన్షియల్ ఆర్డర్ ప్రకారం జిల్లా, జోనల్, మల్టీ-జోనల్ కేడర్లలోని ఉద్యోగాలలో 95 శాతం పోస్టులను కేవలం స్థానిక (Telangana) అభ్యర్థులకే కేటాయించాలి. మిగిలిన 5 శాతం మాత్రమే ఓపెన్ కోటా కిందకు వస్తుంది. కానీ మెట్రో కాంట్రాక్ట్ నియామకాల్లో ఈ నిష్పత్తిని పూర్తిగా గాలికొదిలేశారు.

స్థానికత గుర్తింపు నిబంధన: కొత్త ఆర్డర్ ప్రకారం ఒక అభ్యర్థిని స్థానికుడిగా (Local Candidate) పరిగణించాలంటే 1వ తరగతి నుంచి 7వ తరగతి వరకు గల 7 సంవత్సరాల కాలంలో వరుసగా కనీసం 4 సంవత్సరాలు స్థానిక విద్యాసంస్థల్లో చదివి ఉండాలి. కానీ మెట్రోలో కొనసాగుతున్న ఉద్యోగులకు ఈ స్థానికత అర్హతలు లేవని సమాచారం.

పదేండ్ల‌యినా మారని తీరు: తెలంగాణ రాష్ట్రం ఏర్పడి దశాబ్దం దాటినా, కొన్నేండ్ల‌ క్రితం థర్డ్ పార్టీ కాంట్రాక్ట్ సంస్థల ద్వారా చేరిన ఇతర రాష్ట్రాల వారికే మెట్రో యాజమాన్యం పెద్దపీట వేస్తూ ప్రెసిడెన్షియల్ ఆర్డర్ (Presidential Orders) స్ఫూర్తిని దెబ్బతీస్తున్న‌దని ఆరోప‌ణ‌లున్నాయి.

స్థానికుల‌కు అవ‌కాశం క‌ల్పించాలి..

నూతన ప్రెసిడెన్షియల్ ఆర్డర్ నిబంధనలకు విరుద్ధంగా కాంట్రాక్ట్, ఔట్‌సోర్సింగ్ పరిధిలో సాగుతున్న ఈ నియామకాలపై ప్రభుత్వం తక్షణమే ఉన్నత స్థాయి సమీక్ష జరిపించాలని నిరుద్యోగ జేఏసీ, కార్మిక సంఘాలు డిమాండ్ చేస్తున్నాయి. అక్రమంగా కొనసాగుతున్న స్థానికేత‌రుల (Local) స్థానంలో స్థానిక తెలంగాణ నిరుద్యోగులకు అవకాశం కల్పించని పక్షంలో మెట్రో స్టేషన్ల ముట్టడి, ప్రత్యక్ష ఆందోళనలకు దిగుతామని హెచ్చరిస్తున్నారు.