Protest against SIR | స‌ర్‌కు వ్యతిరేకంగా భారీ నిరసన.. ఓట‌ర్ల తొల‌గింపుపై నినాదాలు

Protest against SIR | త్రినేత్ర‌.న్యూస్‌: ఓటర్ల జాబితా ప్రత్యేక విస్తృత సవరణ (SIR)ను రద్దు చేయాలని, ప్రధాన ఎన్నికల కమిషనర్ జ్ఞానేష్ కుమార్ రాజీనామా చేయాలని నేత‌లు డిమాండ్ చేశారు. ప్రధాన ఎన్నికల కమిషనర్, ఇతర ఎన్నికల కమిషనర్ల (నియామకం, సేవా నిబంధనలు, పదవీకాలం) చట్టం, 2023ను రద్దు చేయాలని వివిధ సంస్థ‌ల సంయుక్త ఆధ్వ‌ర్యంలో హైద‌రాబాద్‌లోని ట్యాంక్‌బండ్‌పై శ‌నివారం మాన‌వ‌హారం చేప‌ట్టి నిర‌స‌న వ్య‌క్తం చేశారు.

'పీపుల్ ఎగైనెస్ట్ ఎస్ఐఆర్' పౌర సమాజ, మానవ హక్కుల సంఘాల కూటమి ఆధ్వర్యంలో నిర్వహించిన ఈ నిరసనలో విద్యార్థులు, యువత, రైతులు, కార్మికులు, విద్యావేత్తలు, కార్యకర్తలు పాల్గొన్నారు. నిరసనలో పాల్గొన్నవారు జాతీయ జెండాను ఊపుతూ, ఓటర్ల తొలగింపునకు వ్యతిరేకంగా నినాదాలు చేశారు. తొలగించబడిన ఓటర్లందరినీ తిరిగి చేర్చాలని డిమాండ్ చేశారు.

ఈ కార్య‌క్ర‌మంలో ప్రొఫెసర్ హరగోపాల్, పరకాల ప్రభాకర్, ప్రొఫెసర్ శాంతా సిన్హా, ఎమ్మెల్సీ కోదండ‌రాం, రిటైర్డ్ ఐఏఎస్ అధికారి అకునూరి మురళి, కల్పనా కన్నభిరాన్ త‌దిత‌రులు పాల్గొన్నారు. ఈ సంద‌ర్భంగా వారు మాట్లాడుతూ ఎన్నికల కమిషనర్ల నియామకం, సేవా నిబంధనలకు సంబంధించిన 2023 చట్టాన్ని విమర్శించారు. శాంతియుత నిరసన అనేది రాజ్యాంగ హక్కు అని నొక్కిచెబుతూ, ఢిల్లీలో నిరసనకారులపై పోలీసుల చర్యను వారు ఖండించారు.

ఎస్ఐఆర్ రద్దు చేసేంత వరకు ఉద్యమాన్ని కొనసాగిస్తామని ప్రతిజ్ఞ చేశారు. “ఓటును కాపాడండి, దేశాన్ని కాపాడండి” అనే సామూహిక ప్రమాణంతో కార్య‌క్ర‌మాన్ని ముగించారు. తెలంగాణ జిల్లాల వ్యాప్తంగా నిరసనలను ముమ్మరం చేస్తామని నిర్వాహకులు తెలిపారు. ఓటర్ల తొలగింపును వివరిస్తూ కరపత్రాలను పాద‌చారుల‌కు పంపిణీ చేశారు.