Telangana Urban Development | తెలంగాణ పట్టణ సంస్కరణలపై నేపాల్‌ ప్రతినిధుల అధ్యయనం

Telangana Urban Development | తెలంగాణలో అమలవుతున్న పట్టణాభివృద్ధి సంస్కరణలు, మున్సిపల్‌ పరిపాలనా విధానాలను అధ్యయనం చేసేందుకు నేపాల్‌కు చెందిన మేయర్లు, మున్సిపల్‌ చైర్‌పర్సన్లు, ప్రభుత్వ అధికారుల బృందం హైదరాబాద్‌ పర్యటనకు వచ్చింది. భారత ప్రభుత్వ విదేశాంగ మంత్రిత్వ శాఖ ఆధ్వర్యంలో, నేషనల్‌ ఇన్‌స్టిట్యూట్‌ ఆఫ్‌ రూరల్‌ డెవలప్‌మెంట్‌ అండ్‌ పంచాయతీ రాజ్‌ (NIRDPR) నిర్వహిస్తున్న 10 రోజుల అంతర్జాతీయ శిక్షణ కార్యక్రమంలో భాగంగా నేపాల్‌కు చెందిన 21 మంది ప్రతినిధులు ఈ అధ్యయన పర్యటనలో పాల్గొంటున్నారు. ఆగస్టు 3, 4 తేదీల్లో హైదరాబాద్‌లో జరిగే ఈ శిక్షణ కార్యక్రమానికి నేషనల్‌ ఇన్‌స్టిట్యూట్‌ ఆఫ్‌ అర్బన్‌ మేనేజ్‌మెంట్‌ (NIUM) సమన్వయం చేస్తోంది. శిక్షణలో భాగంగా సోమవారం NIUMలో తెలంగాణ పట్టణ పరిపాలన, మున్సిపల్‌ సంస్కరణలు, సుస్థిర పట్టణాభివృద్ధి, ఘన వ్యర్థాల నిర్వహణ, మురుగునీటి శుద్ధి, పట్టణ మౌలిక సదుపాయాల అభివృద్ధి, ప్రభుత్వ పథకాల అమలు వంటి అంశాలపై ప్రత్యేక అవగాహన కార్యక్రమం నిర్వహించారు.

తెలంగాణ ప్రభుత్వం పట్టణ ప్రాంతాల్లో అమలు చేస్తున్న వినూత్న కార్యక్రమాలు, పరిపాలనా విధానాలు, ఉత్తమ ఆచరణలను అధికారులు నేపాల్‌ ప్రతినిధులకు వివరించారు. పట్టణ పాలనలో సాంకేతిక వినియోగం, పర్యావరణ పరిరక్షణకు తీసుకుంటున్న చర్యలపై అవగాహన కల్పించారు. అధ్యయన పర్యటనలో భాగంగా ఆగస్టు 4న నేపాల్‌ ప్రతినిధుల బృందం జవహర్‌నగర్‌ సమీకృత మున్సిపల్‌ ఘన వ్యర్థాల నిర్వహణ కేంద్రం (HIMSWF), అంబర్‌పేట మురుగునీటి శుద్ధి కేంద్రం (STP), ఫీకల్‌ స్లడ్జ్‌ ట్రీట్‌మెంట్‌ ప్లాంట్‌ (FSTP)లను సందర్శించనుంది. తెలంగాణలో అమలు చేస్తున్న ఆధునిక వ్యర్థాల నిర్వహణ విధానాలు, మురుగునీటి శుద్ధి ప్రక్రియలు, పర్యావరణ పరిరక్షణ చర్యలను ప్రతినిధులు ప్రత్యక్షంగా పరిశీలించనున్నారు. ఈ అధ్యయన పర్యటన భారత్‌–నేపాల్‌ మధ్య పట్టణ పరిపాలన రంగంలో సహకారాన్ని మరింత బలోపేతం చేయడంతో పాటు, స్థానిక సంస్థల సామర్థ్యాభివృద్ధి, సాంకేతిక పరిజ్ఞాన మార్పిడి, ఉత్తమ విధానాల భాగస్వామ్యానికి దోహదం చేస్తుందని NIUM అధికారులు తెలిపారు.