MLA Sudheer Reddy | మూసీ ప్రాజెక్టులో రియ‌ల్ ఎస్టేట్ వ్యాపారం

దోపిడీని మేం వ్య‌తిరేకిస్తున్నాం
50 మీట‌ర్ల బ‌ఫ‌ర్ జోన్‌ను 500 మీట‌ర్ల‌కు ఎలా పెంచారు..?
డీపీఆర్ లేకుండా ఎలా టెండ‌ర్లు పిలుస్తారు..?
కాంగ్రెస్ ప్ర‌భుత్వాన్ని నిల‌దీసిన ఎమ్మెల్యే సుధీర్ రెడ్డి

MLA Sudheer Reddy | త్రినేత్ర న్యూస్ : మూసీ ప్రాజెక్టులో రియల్ ఎస్టేట్ వ్యాపారం చేసుకుంటూ.. ప్రభుత్వమే పొంతన లేకుండా మాట్లాడుతోంది అని ఎల్బీన‌గ‌ర్ బీఆర్ఎస్ ఎమ్మెల్యే సుధీర్ రెడ్డి మండిప‌డ్డారు. దోపిడీని మేము వ్యతిరేకిస్తున్నాం అని ధ్వ‌జ‌మెత్తారు. తెలంగాణ భ‌వ‌న్‌లో ఎమ్మెల్యే సుధీర్ రెడ్డి మీడియాతో మాట్లాడారు.

మూసీ ప్రాజెక్టుపై పబ్లిక్ హియరింగ్ ఏర్పాటు చేసి ప్రజల మాట వినకుండా నిరంకుశంగా రేవంత్ రెడ్డి ప్రభుత్వం వ్యవహరించిందని నిప్పులు చెరిగారు. ఎవరికీ నష్టం జరగకుండా కేసీఆర్ ముందు చూపుతో నాడే మూసీ పునరుద్ధరణ కోసం చర్యలు చేపట్టారు. మూసీ పునరుద్ధరణకు బీఆర్ఎస్ వ్యతిరేకం కాదు.. సీఎం రేవంత్ రెడ్డి చేస్తున్న విధానాన్ని మాత్రమే వ్యతిరేకిస్తున్నామ‌ని స్ప‌ష్టం చేశారు.

50 మీటర్ల బఫర్ జోన్ ను 500 మీటర్లకు ఎలా పెంచారు? డీపీఆర్ లేకుండా ఎలా టెండర్లు పిలుస్తారు? కమిషన్లు తీసుకొని బీఆర్ఎస్‌ను బద్నాం చేయవచ్చన్న ఆలోచనతో ప్రభుత్వం ఉంది. ప్రభుత్వం డీపీఆర్ బయటపెట్టి... ప్రజలకు అన్ని వివరించాలి. బీఆర్ఎస్ పార్టీ ప్రజలకు అండగా ఉంటుంది... ఎవరి గూడు చెదరనివ్వబోము. అధికారం ఉందని బలవంతంగా చేస్తామని అంటే ఊరుకునేది లేదు. ప్రజల తరపున మాట్లాడేందుకు వెళ్లిన మమ్మల్ని దుర్మార్గంగా అరెస్ట్ చేశారు. సీఎం రేవంత్ రెడ్డి అరాచకం చేయడం మానుకోవాలి. కేసీఆర్ కట్టిన మల్లన్నసాగర్ నుంచి నీళ్లు తెస్తామని అంటారు... కానీ, కన్నేపల్లి నుంచి మాత్రం నీటిని ఎత్తిపోయరు. రైతులు, ప్రజలు ఇబ్బందులు పడుతుంటే... ఏమైనా కానీ నీళ్లు ఎత్తేది లేదని రేవంత్ రెడ్డి అంటున్నారని సుధీర్ రెడ్డి ధ్వ‌జ‌మెత్తారు.