Harish Rao | మంత్రి ఉత్త‌మ్‌కుమార్ రెడ్డివి ఉత్త మాట‌లు: మాజీ మంత్రి హ‌రీశ్‌రావు

ఉత్తమ్కు రేవంత్ గాలి సోకిందని ఎద్దేవా డీపీఆర్ వాపస్ వచ్చి ఏడాదైనా మౌనమెందుకని సూటి ప్రశ్న అసెంబ్లీలో హరీశ్ చిట్చాట్ Harish Rao | రాష్ట్ర మంత్రి ఉత్తమ్ కుమార్ రెడ్డి (Uttam Kumar Reddy) వి ఉత్త మాటలేనని మాజీ మంత్రి హరీశ్రావు (Harish Rao) అన్నారు. ఆయన అన్నీ ఉత్త మాటలే మాట్లాడుతున్నారని చెప్పారు. ఉత్తమ్కు సీఎం (CM) రేవంత్రెడ్డి (Revanth Reddy) గాలి సోకినట్లుందని అనుమానం వ్యక్తం చేశారు. ఉత్తమ్కు రేవంత్తో సహవాసం చేసి సావాస దోషం పట్టుకుందని ఎద్దేవా చేశారు. అసెంబ్లీ (Assembly) లో హరీశ్ చిట్చాట్ (Chit Chat) చేస్తూ పాలమూరు రంగారెడ్డి ప్రాజెక్టు కోసం తాను నేలపైన పడుకుని పనిచేశానని గుర్తు చేశారు. తొంభై శాతం పనులు పూర్తి చేసి ఆరున్నర లక్షల ఎకరాలను సాగునీరందించామని చెప్పారు. ఆ ప్రాజెక్టుకు కేటాయింపులను 90 టీఎంసీల నుంచి 45 టీఎంసీలకు తగ్గించారా లేదా చెప్పాలని డిమాండ్ చేశారు. డీపీఆర్ వాపస్ వచ్చి ఏడాది గడుస్తున్నా ఎందుకు మౌనంగా ఉన్నారని ప్రశ్నించారు. రెండేళ్లలో ఒక్క అనుమతి తీసుకురాలేదు.. తమ ప్రభుత్వ హయాంలో ప్రాజెక్టుకు ఏడు అనుమతులు తీసుకువచ్చామన్న ఆయన కాంగ్రెస్ ప్రభుత్వం తమ రెండేళ్ల హయాంలో ఒక్క అనుమతి అయినా తెచ్చారా అని ఎద్దేవా చేశారు. కాంగ్రెస్ నాయకులను పాలమూరు ద్రోహులుగా అభివర్ణించారు. గ్రీన్ ట్రిబ్యునల్ కోర్టులో కేసు వేసి అడ్డుకున్న ద్రోహి ఉత్తమ్ అని మండిపడ్డారు. ప్రాజెక్టుకు సంబంధించిన రెండు టన్నెల్స్ తమ హయాంలోనే పూర్తయ్యాయని చెప్పారు. కాంగ్రెస్ ప్రభుత్వ చేతకానితనాన్ని తమకు రుద్దుతున్నారని మండిపడ్డారు. కొడంగల్ నారాయణపేట లిఫ్ట్కు రెండేళ్ల క్రితం కొబ్బరికాయ కొట్టి డీపీఆర్ ఇప్పటివరకు పంపలేదని దుయ్యబట్టారు. సొంతశాఖపై మంత్రిగా ఉత్తమ్కు ఇంకా పట్టు రానట్లుందని వ్యాఖ్యానించారు. ఇంకెప్పుడు జ్ఞానం పెంచుకుంటాడో అని అన్నారు. ఎస్ఎల్బీసీపై బీఆర్ఎస్ ప్రభుత్వం రూ.1900 కోట్లు ఖర్చు పెట్టిందని చెప్పారు. ఏడు ప్రాజెక్టులకు ఢిల్లీ నుంచి ఫైనల్ అనుమతులు తీసుకువచ్చామని పేర్కొన్నారు. కానీ కాంగ్రెస్ హయాంలో మూడు డీపీఆర్లు వాపస్ వచ్చాయన్నారు. రెండేళ్లలో ఉత్తమ్ ఒక్క అనుమతి కూడా తేలేదన్నారు. సభను కనీసం పదిహేను రోజులు నడపాలి అసెంబ్లీని కనీసం పదిహేను రోజులు నిర్వహించాలని బీఏసీ సమావేశంలో పట్టుబట్టినట్లు హరీశ్ చెప్పారు. కానీ వారం రోజులు మాత్రమే సమావేశాలు జరుపుతామని స్పీకర్ చెప్పారని, ఆ తరువాత మళ్లీ బీఏసీ సమావేశం నిర్వహిస్తామన్నారని వివరించారు. నదీ జాలలపై సభలో బీఆర్ఎస్కు కూడా పీపీటీ సమర్పించేందుకు అవకాశం ఇవ్వాలని బీఏసీలో లేవనెత్తామన్నారు. కాంగ్రెస్ పార్టీ అధికారంలోకి వచ్చిన తరువాత ప్రశ్నోత్తరాలకు ఆరు రోజులు మాత్రమే సమయం కేటాయించారని, ప్రతీరోజూ ప్రశ్నోత్తరాలకు సమయం కేటాయించాలని కోరినట్లు చెప్పారు. ఖాళీగా ఉన్న 16 హౌజ్ కమిటీలు వేయాలని సూచించామన్నారు. ఎజెండా పంపే విధానం సరిగా లేదని, కనీసం 24 గంటల ముందే ఎజెండా ఇవ్వాలని కోరామని పేర్కొన్నారు. 15 అంశాలపై సభలో చర్చించాలని పట్టుబట్టామని వివరించారు.