Mee Ticket App | చెప్పండి క్యూలైన్‌కు బైబై..! ఇక టికెట్ ఏదైనా యాప్ ఒక్కటే..!

Mee Ticket App | వీకెండ్ వచ్చిందంటే ఫ్యామిలీతో బయటకు వెళ్లాలన్న ప్లాన్ సహజమే. మెట్రో ప్రయాణమా.. ఆలయ దర్శనమా.. పార్క్, మ్యూజియంలో ఏదీ అన్న ఆలోచన మొదలవుతుంది. గోల్కొండ కోట, ఫారెస్ట్ సఫారీ వంటి చోట్లకు వెళ్లాలన్నా, తీరా అక్కడికి వెళ్లాక టికెట్ కౌంటర్ వద్ద క్యూలైన్లు చూసి వెనుదిరిగే పరిస్థితి చాలామందికి ఎదురవుతోంది. ఇలాంటి ఇబ్బందులకు చెక్ పెడుతూ రాష్ట్ర ప్రభుత్వం ‘మీ టికెట్ యాప్’తో డిజిటల్ సేవలను మరింత సులభతరం చేసింది. స్మార్ట్‌ఫోన్ ఉంటే చాలు, ఒక్క క్లిక్‌తోనే ప్రయాణ టికెట్లతో పాటు వివిధ సందర్శన స్థలాల ఎంట్రీ టికెట్లను ముందుగానే బుక్ చేసుకునే అవకాశం కల్పిస్తోంది. ప్లే స్టోర్ నుంచి మీ టికెట్ యాప్‌ను డౌన్‌లోడ్ చేసుకుని, ఇంటి నుంచే బస్, మెట్రో ప్రయాణ టికెట్లు, ఆలయాలు, పార్కులు, మ్యూజియం, ఫారెస్ట్ సఫారీ వంటి ప్రాంతాల టికెట్లను సులభంగా పొందవచ్చు. కౌంటర్ వద్ద నిలబడాల్సిన అవసరం లేకుండా నేరుగా ఎంట్రీకి వెళ్లే వీలును ఈ యాప్ కల్పిస్తోంది.

మీ సేవ ఆధ్వర్యంలో..

ఐటీ శాఖ పరిధిలోని మీ సేవ ఆధ్వర్యంలో రూపొందిన ఈ యాప్ ద్వారా ఒకే వేదికపై అనేక సేవలు అందుబాటులోకి వచ్చాయి. ఇండోర్, అవుట్‌డోర్ టూరిజం సర్వీసులతో పాటు ప్రయాణ సౌకర్యం సేవలు అందిస్తోంది. ఈవీ వాహనాల్లో ప్రయాణించే వారికి సమీపంలోని ఛార్జింగ్ స్టేషన్ల సమాచారం కూడా ఈ యాప్ ద్వారా తెలుసుకునే అవకాశం ఉంది. పౌరుల నిత్య జీవితాన్ని మరింత సులభతరం చేయడమే లక్ష్యంగా ఈ సేవలను విస్తరించారు. ప్రవేశపెట్టిన తక్కువ సమయంలోనే ఈ యాప్‌కు మంచి స్పందన లభిస్తోంది. ఇప్పటివరకు సుమారు రెండున్నర లక్షల మంది యాప్‌ను డౌన్‌లోడ్ చేసుకోగా.. ఆరు లక్షలకుపైగా సేవలను బుక్ చేసుకున్నట్లు అధికారులు తెలిపారు.

రూ.4కోట్ల లావాదేవీలు..

సుమారు రూ.4 కోట్ల విలువైన లావాదేవీలు సురక్షితంగా పూర్తయ్యాయి. రాష్ట్రంలోని 219 ప్రదేశాల్లో ఈ యాప్ ద్వారా ఎంట్రీ టికెట్ల సేవలు అందుబాటులో ఉన్నాయి. ‘టికెట్ ఏదైనా.. యాప్ ఒక్కటే’ అనే నినాదంతో ముందుకు సాగుతున్న ఈ యాప్‌ను మరింత విస్తరించనున్నట్లు సమాచార సాంకేతిక శాఖ మంత్రి దుద్దిళ్ల శ్రీధర్ బాబు తెలిపారు. వివిధ ప్రభుత్వ సేవలను పౌరుల రోజువారీ జీవితంలో భాగం చేయడమే లక్ష్యమని ఆయన పేర్కొన్నారు. ఎక్కడికైనా వెళ్లే ముందు క్యూలైన్లలో నిలబడాల్సిన అవసరం లేకుండా ముందుగానే మీ టికెట్ యాప్ ద్వారా టికెట్లు బుక్ చేసుకోవచ్చని మీ సేవ కమిషనర్ టీ రవి కిరణ్ వివరించారు.