KTR | డ్ర‌గ్స్ టెస్టుల‌కు సిద్ధ‌మే.. మ‌హేశ్ కుమార్ వ్యాఖ్య‌ల‌పై స్పందించిన కేటీఆర్‌..!

KTR | మొయినాబాద్ డ్ర‌గ్స్ కేసు వ్య‌వ‌హారంలో పీసీసీ చీఫ్ మ‌హేశ్ కుమార్ చేసిన స‌వాల్‌పై బీఆర్ఎస్ వ‌ర్కింగ్ ప్రెసిడెంట్ క‌ల్వ‌కుంట్ల తార‌క‌రామారావు స్పందించారు. తాను ఎప్పుడూ డ్ర‌గ్స్ టెస్టుల‌కు సిద్ధ‌మేన‌న్నారు. ఈ విష‌యాన్ని ఇప్ప‌టికే చాలాసార్లు చెప్పాన‌ని స్ప‌ష్టం చేశారు. అన్ని పార్టీల నేత‌లు టెస్టులు చేసుకోవాల‌ని చేసిన ప్ర‌తిపాద‌న‌ను స్వాగ‌తిస్తున్నామ‌ని, అయితే, ప్రజా ప్రతినిధులు ముందుండి ఆదర్శంగా నిల‌బ‌డాల‌ని కేటీఆర్ సూచించారు. అయితే, ప్ర‌తీసారి ప్రతి డ్రగ్స్‌ కేసులో తన పేరును వాడుతుండ‌డంపై ఆయ‌న ఆగ్ర‌హం వ్య‌క్తం చేశారు.

మ‌ళ్లీ తన పేరును డ్రగ్స్‌ కేసులో అనవసరంగా లాగితే చట్టపరమైన చ‌ర్య‌లుంటాయ‌ని హెచ్చ‌రించారు. మాదకద్రవ్యాలు మానవులను రాక్షసులను చేస్తాయ‌ని అభిప్రాయ‌ప‌డ్డారు. బాధ్యతాయుతమైన పదవుల్లో ఉన్న వ్యక్తులు కూడా మాదకద్రవ్యాల వాడకాన్ని ఆశ్రయించడం దురదృష్టకర‌మ‌న్నారు. తాను వ్యక్తిగతంగా మాదకద్రవ్యాలు, నిషేధిత పదార్థాల వాడకాన్ని తీవ్రంగా వ్య‌తిరేకిస్తాన‌న్నారు. బీఆర్ఎస్ పార్టీ డ్ర‌గ్స్ వాడ‌కాన్ని, ఏ చ‌ట్ట‌విరుద్ధ‌మైన కార్య‌క‌లాపాల‌ను ఖండిస్తుంద‌ని స్ప‌ష్టం చేశారు. ఎవరైనా మాదకద్రవ్యాలను వినియోగించినా, విక్ర‌యించినా పార్టీతో సంబంధం లేకుండా అలాంటి వ్య‌క్తుల‌పై చ‌ట్ట‌ప్ర‌కారం క‌ఠినంగా చ‌ర్య‌లు తీసుకోవాల‌న్నారు.

 

https://twitter.com/KTRBRS/status/2033115814329749779