Medigadda Barrage Repair Cost | డిసెంబర్ నుంచే మేడిగడ్డ, అన్నారం, సుందిళ్ల బ్యారేజీలకు రిపేర్లు.. ఖర్చు ఏజెన్సీలదే

• డిసెంబర్ నుంచే పనులు
• రూ.4,193 కోట్ల ప్రతిపాదన
• నీళ్లున్నా ఎందుకు ఎత్తట్లేదు?
• దేవాదుల, సీతారామ రికార్డు

Medigadda Barrage Repair Cost | త్రినేత్ర న్యూస్ : కాళేశ్వరం ప్రాజెక్టు పరిధిలోని మేడిగడ్డ, అన్నారం, సుందిళ్ల బ్యారేజీల పునరుద్ధరణ పనులపై ముఖ్యమంత్రి ఎ. రేవంత్ రెడ్డి హైదరాబాద్‌లో మంత్రులు, నీటిపారుదల శాఖ ఉన్నతాధికారులతో ఉన్నత స్థాయి సమీక్ష నిర్వహించారు. గత ప్రభుత్వ తప్పిదాలు పునరావృతం కాకుండా ప్రాజెక్టును కాపాడాల్సిన బాధ్యత తమపై ఉందని స్పష్టం చేస్తూ.. నేషనల్ డ్యామ్ సేఫ్టీ అథారిటీ (NDSA), కేంద్ర సంస్థల మార్గదర్శకాలకు లోబడి పనులను వేగవంతం చేయాలని ఆదేశించారు. నెలాఖరులోగా కేంద్రం నుంచి తుది అనుమతులు పూర్తి చేసుకుని, డిసెంబర్ నుంచే క్షేత్రస్థాయిలో పునరుద్ధరణ పనులు ప్రారంభించాలని స్పష్టమైన డెడ్‌లైన్ విధించారు.

రూ.4,193 కోట్ల ప్రణాళిక.. లోపాల ఖర్చు కాంట్రాక్ట్ సంస్థలదే

మేడిగడ్డ కుంగుబాటు అనంతరం మూడు బ్యారేజీలపై జాతీయ స్థాయి నిపుణులతో నిర్వహించిన సమగ్ర అధ్యయనం ఆధారంగా దాదాపు రూ.4,193 కోట్ల అంచనా వ్యయంతో అధికారులు ప్రతిపాదనలు సిద్ధం చేశారు. దీనికి కేంద్ర నిపుణుల కమిటీ ఇప్పటికే సూత్రప్రాయ ఆమోదం తెలిపింది.

అయితే ప్రజాధనం దుర్వినియోగం కాకుండా ప్రభుత్వం పక్కా ప్రణాళిక రచించింది. గతంలో జరిగిన నిర్మాణ లోపాల వల్ల చేపట్టాల్సిన మరమ్మతుల ఖర్చు మొత్తాన్ని ఆయా నిర్మాణ సంస్థలే (Agencies) భరించేలా, భవిష్యత్ అవసరాల కోసం చేపట్టే అదనపు రక్షణ పనుల ఖర్చును మాత్రమే ప్రభుత్వం భరించేలా నిర్ణయించారు. నీటి నిల్వ సామర్థ్య పునరుద్ధరణ, భద్రతా పనులను రెండు దశల్లో సమాంతరంగా పూర్తి చేయాలని సీఎం సూచించారు.

మేడిగడ్డ వద్ద నీళ్లున్నా ఎందుకు లిఫ్ట్ చేయట్లేదు? అసలు నిజమిదే

మేడిగడ్డ వద్ద నీరు పుష్కలంగా ఉన్నా ప్రభుత్వం ఉద్దేశపూర్వకంగా లిఫ్ట్ చేయడం లేదంటూ జరుగుతున్న ప్రచారంలోని వాస్తవాలను ఇంజనీర్లు పవర్ పాయింట్ ప్రజెంటేషన్ ద్వారా వివరించారు. మేడిగడ్డ నుంచి నీటిని లిఫ్ట్ చేసి ఎల్లంపల్లికి చేర్చాలంటే మధ్యలో ఉన్న అన్నారం, సుందిళ్ల బ్యారేజీల గేట్లను తప్పనిసరిగా మూసివేయాల్సి ఉంటుంది.

అయితే ఈ రెండింటిలోనూ తీవ్ర నిర్మాణ లోపాలు ఉన్నందున, గేట్లను ఎట్టిపరిస్థితుల్లోనూ మూయవద్దని, పూర్తిగా తెరిచే ఉంచాలని ఎన్‌డీఎస్‌ఏ కచ్చితమైన హెచ్చరికలు జారీ చేసింది. ఆ ఆదేశాలను ఉల్లంఘించి గేట్లు మూస్తే బ్యారేజీల మనుగడకే పెను ప్రమాదం వాటిల్లే అవకాశం ఉండటంతోనే సాంకేతికంగా నీటిని లిఫ్ట్ చేయడం సాధ్యం కాలేదని అధికారులు తేల్చిచెప్పారు.

దేవాదుల, సీతారామ ద్వారా రికార్డు స్థాయిలో గోదావరి జలాల వినియోగం

ఎగువ బ్యారేజీల సమస్యలను అధిగమిస్తూనే దిగువ గోదావరి జలాలు వృథా కాకుండా ప్రభుత్వం సమర్థవంతమైన కార్యాచరణను అమలు చేసింది. గతంలో ఎన్నడూ లేని విధంగా దేవాదుల, సీతారామ ఎత్తిపోతల పథకాల ద్వారా గోదావరి నీటిని పూర్తిస్థాయిలో ఒడిసిపట్టింది.

గత ప్రభుత్వ హయాంలో దేవాదుల ద్వారా ఏడాదికి సగటున 9.57 టీఎంసీల నీటిని మాత్రమే లిఫ్ట్ చేయగా, ప్రస్తుత ప్రభుత్వం ఏటా సగటున 18.13 టీఎంసీలను లిఫ్ట్ చేసింది. అక్టోబర్ నాటికి దేవాదుల ద్వారా 16.71 టీఎంసీలు, సీతారామ ద్వారా 8.10 టీఎంసీలు వెరసి మొత్తం 24.81 టీఎంసీల గోదావరి నీటిని ఒడిసిపట్టి ఉమ్మడి వరంగల్, నల్గొండ, ఖమ్మం జిల్లాల ఆయకట్టుకు సాగు, తాగునీటి కొరత లేకుండా అందించింది. గతంతో పోలిస్తే 89 శాతం అధికంగా గోదావరి నీటిని వినియోగించుకోవడం ప్రజా ప్రభుత్వ చిత్తశుద్ధికి నిదర్శనమని సీఎం పేర్కొన్నారు. తుమ్మిడిహెట్టి వద్ద ప్రాణహిత ప్రాజెక్టును నిర్మించి ఉంటే అతి తక్కువ ఖర్చుతో శాశ్వతంగా నీటి సమస్య తీరేదని ఆయన ఈ సందర్భంగా గుర్తుచేశారు.