Stamps and Registration services | రిజిస్ట్రేషన్ సేవ‌ల‌కు సెల‌వ్‌.. ఏయే తేదీల్లో అంటే

Registration services | త్రినేత్ర‌.న్యూస్‌: సర్వర్ నిర్వహణ పనుల దృష్ట్యా ఈ నెల 26 నుంచి 28 వరకు రిజిస్ట్రేషన్ సేవలకు తాత్కాలిక విరామం ప్ర‌క‌టించిన‌ట్లు స్టాంప్స్ అండ్ రిజిస్ట్రేషన్ శాఖ ఐజీ రాజీవ్ గాంధీ హనుమంతు తెలిపారు. సుమారు ఐదేళ్ల తర్వాత చేపడుతున్న ఈ సర్వర్ నిర్వహణ పనుల ద్వారా సర్వర్ వ్యవస్థలు మరింత సజావుగా పనిచేయడం, భద్రతా ప్రమాణాలు బలోపేతం కావడం, సేవల నాణ్యత మెరుగుపడడం కోసం ఈ తాత్కాలిక విరామం అవసరమని ఆయన పేర్కొన్నారు. తిరిగి ఈనెల‌ 29 నుంచి యథావిధిగా సేవలు కొన‌సాగుతాయ‌న్నారు.

అయితే జూన్ 26న మొహర్ర‌మ్, 28న ఆదివారం ప్రభుత్వ సెలవు దినాలు కావడంతో 27న ఒక్కరోజే ప్రభుత్వ పని దినంలో రిజిస్ట్రేషన్ సేవలు అందుబాటులో ఉండ‌వ‌ని గురువారం ఒక ప్రకటనలో తెలిపారు. దీంతో ప్రజలకు ఎక్కువ ఇబ్బంది క‌ల‌గ‌కుండా ఈ షెడ్యూల్ రూపొందించామని చెప్పారు. ప్రజలు తమ రిజిస్ట్రేషన్ సంబంధిత పనులను ముందస్తుగా ప్రణాళిక చేసుకోవాలన్నారు. 29 నుంచి అన్ని సేవలు యథావిధిగా పునఃప్రారంభమవుతాయని హనుమంతు వెల్లడించారు. శాఖ నిర్వహణ పనులకు ప్రజలు సహకరించాలని ఆయన విజ్ఙ‌ప్తి చేశారు.