TG Weather | తెలంగాణ‌లో వేడి, ఉక్క‌పోత.. రేపు ఈ జిల్లాల్లో వాన‌లు..

TG Weather | జూలై మాసం స‌గం గ‌డిచినా ఇప్ప‌టి వ‌ర‌కు స‌రైన వ‌ర్షాలు కుర‌వ‌లేదు. నైరుతి రుతుప‌వ‌నాల బ‌ల‌హీనంగా మార‌డంతో భానుడు ప్ర‌తాపం చూపిస్తున్నాడు. ఒకవైపు వర్షపాతం లోటు ఆందోళన కలిగిస్తుండగా.. మరోవైపు పగటి ఉష్ణోగ్రతలు పెరుగుతున్నాయి. దాంతో జ‌నం తీవ్ర‌మైన ఉక్కపోత‌తో ఇబ్బందులుప‌డుతున్నారు. రాబోయే రోజుల్లోనే ఇదే త‌ర‌హా ప‌రిస్థితి కొన‌సాగే అవ‌కాశం ఉంద‌ని వాతావ‌ర‌ణ‌శాఖ హెచ్చ‌రించింది. గురువారం ఖమ్మం, నల్గొండ, సూర్యాపేట, మహబూబ్‌నగర్, నాగర్‌కర్నూల్ జిల్లాల్లో కొన్ని ప్రాంతాల్లో తీవ్ర ఉక్కపోత ప్రభావం కనిపించే అవకాశం ఉంద‌ని హైద‌రాబాద్ వాతావ‌ర‌ణ కేంద్రం తెలిపింది.

అలాగే చాలా జిల్లాల్లో గంటకు 30 నుంచి 40 కిలోమీటర్ల వేగంతో బలమైన ఈదురుగాలులు వీచే అవకాశముందని వెల్లడించింది. హైదరాబాద్ న‌గ‌రంతో పాటు పరిసర ప్రాంతాల్లో ఆకాశం పాక్షికంగా మేఘావృతమై ఉంటుందని వాతావరణ శాఖ పేర్కొంది. గరిష్ఠ ఉష్ణోగ్రత 36 డిగ్రీల సెల్సియస్, కనిష్ఠ ఉష్ణోగ్రత 26 డిగ్రీల సెల్సియస్ వరకు నమోదయ్యే అవకాశం ఉందని తెలిపింది. ఆదిలాబాద్‌, ఆసిఫాబాద్‌, మంచిర్యాల‌, నిర్మ‌ల్‌, జ‌గిత్యాల‌, రాజ‌న్న సిరిసిల్ల‌, క‌రీంన‌గ‌ర్‌, పెద్ద‌ప‌ల్లి, భూపాల‌ప‌ల్లి, ములుగు, కొత్త‌గూడెం జిల్లాల్లో బ‌ల‌మైన గాలులు వీచే అవ‌కాశాలున్నాయ‌ని తెలిపింది. రాష్ట్రవ్యాప్తంగా జులై 22 వరకు పొడి వాతావరణం కొనసాగే అవకాశం ఉందని ఐఎండీ అంచనా వేసింది. ఆ త‌ర్వాత అక్కడక్కడా తేలికపాటి జల్లులు కురిసే అవకాశం ఉన్నప్పటికీ, విస్తారంగా భారీ వర్షాలు కురిసే సూచనలు లేవని స్పష్టం చేసింది. ఇప్పటికే పలు జిల్లాల్లో వర్షాభావ పరిస్థితులు నెలకొన్నాయి.

శుక్ర‌వారం సైతం ఆదిలాబాద్, కొమరంభీం ఆసిఫాబాద్, మంచిర్యాల, నిర్మల్, నిజామాబాద్, జగిత్యాల, రాజన్న సిరిసిల్ల, కరీంనగర్, పెద్దపల్లి, జయశంకర్ భూపాలపల్లి, ములుగు, భద్రాద్రి కొత్తగూడెం జిల్లాలలో అక్కడక్కడ వీచే అవకాశాలున్నాయ‌ని పేర్కొంది. 30 నుంచి 40 కిలోమీట‌ర్ల వేగంతో గాలులు వీచే అవ‌కాశాలున్నాయ‌ని పేర్కొంది. అలాగే, ఆదిలాబాద్, కొమరం భీం ఆసిఫాబాద్, మంచిర్యాల, నిర్మల్, నిజామాబాద్, జయశంకర్ భూపాలపల్లి, ములుగు, భద్రాద్రి కొత్తగూడెం, వికారాబాద్, సంగారెడ్డి, మెదక్, కామారెడ్డి జిల్లాల‌తో పాటు అక్క‌డ‌క్క‌డ తేలిక‌పాటి నుంచి మోస్త‌రు వ‌ర్షాలు కురిసే అవ‌కాశం ఉంద‌ని హైద‌రాబాద్ వాతావ‌ర‌ణ కేంద్రం పేర్కొంది.