Bandi Sanjay | క‌విత‌కు హ్యాట్సాఫ్..: కేంద్ర‌మంత్రి బండి సంజ‌య్‌

కేసీఆర్ అవినీతిని బయటపెట్టడం అభినందనీయం కాళేశ్వరంలో లక్ష కోట్ల అవినీతి అంటున్న రేవంత్ సీబీఐ విచారణ ఎందుకు కోరడం లేదు సీమ లిఫ్ట్ ఇరిగేషన్ ఆపామంటున్న కాంగ్రెస్ నేతలు రుజువు చేపాలి దక్షిణ తెలంగాణకు నీటి అన్యాయాన్ని సరిదిద్దేందుకు బీఆర్ఎస్, కాంగ్రెస్ కలిసిరావాలి విలేకరుల సమావేశంలో కేంద్రమంత్రి Bandi Sanjay | కేసీఆర్ (KCR) సర్కార్ అవినీతి, అక్రమాలను బయటపెడుతున్న కల్వకుంట్ల కవిత (Kavitha)కు కేంద్ర మంత్రి, బీజేపీ (BJP) నేత బండి సంజయ్ (Bandi Sanjay) హ్యాట్సాఫ్ చెప్పారు. అవినీతిని బయటపెట్టడం అభినందనీయమన్న ఆయన ఎవరు అవినీతి, అక్రమాలు బయపెట్టినా కేంద్రం వారికి సహకరిస్తుందని అన్నారు. ఆంధ్రప్రదేశ్ అప్పటి మంత్రి రోజా ఇంట్లో దావత్ వెనుక ఉన్న మర్మమేందో కూడా కవిత బయటపెట్టాలని కోరారు. కాళేశ్వరంలో లక్ష కోట్ల అవినీతి జరిగిందంటున్న ముఖ్యమంత్రి రేవంత్రెడ్డి దీనిపై సీబీఐ విచారణను ఎందుకు కోరడం లేదని సూటిగా ప్రశ్నించారు. కరీంనగర్లో నిర్వహించిన విలేకరుల సమావేశంలో బండి సంజయ్ మాట్లాడుతూ బీఆర్ఎస్, కాంగ్రెస్ పార్టీలపై నిప్పులు చెరిగారు. తెలంగాణకు నీటి కేటాయింపుల్లో అడుగడుగునా అన్యాయం చేసింది ఆ రెండు పార్టీలేనని ఆరోపించారు. తెలంగాణకు న్యాయం జరిగేలా వ్యవహరించింది కేవలం బీజేపీయేనని గుర్తు చేశారు. కృష్ణా జలాల్లో తెలంగాణకు తీరని అన్యాయం కృష్ణా జలాల్లో తెలంగాణ రాష్ట్రానికి కేసీఆర్ తీరని అన్యాయం చేశారని బండి సంజయ్ మండిపడ్డారు. పునర్విభజన చట్టంలోని సెక్షన్ 89లో పాలమూరు ప్రస్తావనే లేనప్పుడు జాతీయ హోదా ఎట్లా అడిగారని ప్రశ్నించారు. వైఎస్ పాలనలో పోతిరెడ్డిపాడు ద్వారా ప్రతిరోజు సగటున 4 టీఎంసీల నీటిని ఏపీకి తరలిస్తే ఎందుకు ఆపలేకపోయారో సమాధానం ఇవ్వాలని కాంగ్రెస్ నాయకులను డిమాండ్ చేశారు. నీళ్ల విషయంలో పదేళ్ల కేసీఆర్ పాలన తెలంగాణకు మరణశాసనమైందని చెప్పారు. నీళ్లు, నిధులు, నియామకాలనే ట్యాగ్ లైన్ పేరుతో రాష్ట్రాన్ని దోచుకున్నారని ఆవేదన వ్యక్తం చేశారు. తెలంగాణకు కేసీఆర్ అనే అణుబాంబు ఉందని, చంద్రబాబు ఆటలు సాగవని డాంబికాలు పలికిన కేసీఆర్ మాటలు పిట్టల దొర మాటలేనని తేలిపోయాయని అన్నారు. ఏపీ ప్రభుత్వానికి అమ్ముడుపోయి క్రిష్ణా జలాలను తాకట్టు పెట్టాడని మండిపడ్డారు. కృష్ణా జలాల్లో తెలంగాణకు 575 టీఎంసీల వాటా రావాల్సి ఉంటే.. 299 టీఎంసీలకే ఒప్పుకుని సంతకం చేసి దక్షిణ తెలంగాణకు తీరని ద్రోహం చేసిన మోసగాడు కేసీఆర్ అని ధ్వజమెత్తారు. ఏపీకి కేసీఆర్ అమ్ముడపోయి, అపెక్స్ కౌన్సిల్ సాక్షిగా 299 టీఎంసీల నీళ్లు చాలని చేసిన సంతకాల ఒప్పందాన్ని మొట్టమొదట బయటపెట్టిందే తానని చెబుతూ ఆ కాపీని చూపించారు. ఎవరిని అడిగి 299 టీఎంసీల నీళ్లు చాలని ఒప్పుకున్నారని, అదేమైనా కేసీఆర్ జాగీరా అని ప్రశ్నించారు. తెలంగాణ వచ్చాక పోతిరెడ్డిపాడు సామర్థ్యాన్ని 4.3 టీఎంసీల నుంచి ఏకంగా 13.7 టీఎంసీలకు పెంచినా నోరు మెదపని సన్నాసి కేసీఆర్ అని తీవ్రంగా దుయ్యబట్టారు. నీటి ప్రాజెక్టుల పేరుతో భారీ అవినీతికి పాల్పడిన కేసీఆర్ ప్రజలను డైవర్ట్ చేసేందుకు ‘‘కాళేశ్వరం’’ పేరుతో కూలేశ్వరం ప్రాజెక్టు నిర్మాణం పేరుతో దోపిడీకి స్కెచ్ వేసిన నాయకుడు కేసీఆర్ అని సంజయ్ ఎద్దేవా చేశారు. రూ.30 వేల కోట్ల ప్రాజెక్టును రూ.లక్ష కోట్లకు పెంచి వేల కోట్లు దోచుకున్న దోపిడీ దొంగ కేసీఆర్ అని మండిపడ్డారు. రెండోసారి అధికారం చేపట్టాక పాలమూరు రంగారెడ్డి పేరుతో రూ.27 వేల కోట్లు ఖర్చు చేసి చుక్క నీరివ్వని దుర్మార్గుడు కేసీఆర్ అని దుయ్యబట్టారు. రూ.80 వేల కోట్ల ప్రతిపాదనలతో రూపొందించిన పాలమూరు ప్రాజెక్టులో భూసేకరణ, డిస్ట్రిబ్యూటరీల అంశాలే లేవని ఆరోపించారు. ఇదేందని నిలదీస్తే.. లక్షన్నర కోట్లతో పాలమూరు రంగారెడ్డి అంచనాలు పెంచి దోచుకోవాలనుకున్నాడని ఆవేదన వ్యక్తం చేశారు. పాలమూరు రంగారెడ్డి పేరుతో కమీషన్లు దండుకోవడమే కేసీఆర్ పనిగా పెట్టుకున్నాడని విమర్శించారు. వేల కోట్లు దోచుకున్నా ప్రజలు రెండోసారి అధికారం అప్పగిస్తే.. కేసీఆర్ మరింత బరితెగించారని అన్నారు. కృష్ణా జలాల విషయంలో తెలంగాణకు అన్యాయంపై కేంద్రం హెచ్చరించింది.. కృష్ణా జలాల వాటా విషయంలో రాష్ట్ర ప్రభుత్వ తప్పిదాలను మోదీ నాయకత్వం పలుమార్లు ప్రస్తావించి హెచ్చరించినా పట్టించుకోలేదని బండి సంజయ్ ఆవేదన వ్యక్తం చేశారు. నిలదీసిన తమను పిట్టకథలు చెబుతూ కేసీఆర్ హేళన చేశారని వాపోయారు. కేసీఆర్ ప్రభుత్వం పట్టించుకోకపోవడంవల్ల కృష్ణా నీళ్ల విషయంలో తెలంగాణకు అన్యాయం జరుగుతోందంటూ కేంద్రం అనేకసార్లు హెచ్చరించిందని గుర్తు చేశారు. నీళ్ల విషయంలో పాలకుల తప్పిదాలను సరిదిద్దేందుకు అపెక్స్ కౌన్సిల్ మీటింగ్ లను ఏర్పాటు చేసింది నిజం కాదా అని ప్రశ్నించారు. కేసీఆర్ పాలనలో ఏపీ ప్రభుత్వం అక్రమంగా సంగమేశ్వర ప్రాజెక్టు నిర్మాణం ప్రారంభించింది నిజం కాదా? చెప్పాలని డిమాండ్ చేశారు. రాయలసీమ ఎత్తిపోతల పథకం గురించి మీడియాలో పెద్ద ఎత్తున వార్తలు వచ్చినా కేసీఆర్ పట్టించుకోలేదని ఆరోపించారు. ఏపీ ప్రభుత్వం ఒప్పందానికి మించి 38 టీఎంసీల నీళ్లను అదనంగా వాడుకుంటున్నా కేసీఆర్ ఫాంహౌజ్కే పరిమితమయ్యారని దుయ్యబట్టారు. కేసీఆర్ చేసిన రీడిజైన్లన్నీ రివర్సైనయ్ అని రాసినా పట్టించుకోలేదని ఆరోపించారు. తెలంగాణకు జరిగిన అన్యాయాన్ని సరిదిద్దాలని మొత్తుకున్న వినలేదని విమర్శించారు. రాయలసీమకు నీళ్లిచేందుకు ఒప్పుకున్నారని ధ్వజం.. అప్పటి ఏపీ సీఎం జగన్ మోహన్ రెడ్డితో ప్రగతి భవన్ లో సమావేశమై ‘బేసిన్లు లేవ్... బేషజాల్లేవ్’ అని మాట్లాడారని సంజయ్ గుర్తు చేశారు. రాయలసీమకు అవసరమైనన్ని నీళ్లను తరలించేందుకు సిద్దమని ఒప్పుకుంది నిజం కాదా? అని ప్రశ్నించారు. నాటి మంత్రి రోజా గులాబీ రేకులతో స్వాగతం పలికితే వెళ్లి రోయ్యల పులుసు తిని రాయలసీమను రతనాల సీమగా మారుస్తానని కేసీఆర్ అన్నారని మండిపడ్డారు. నీళ్ల విషయంలో తెలంగాణ విలన్ గా మారిన కేసీఆర్.. రోజా పెట్టిన రొయ్యల పులుసు, గులాబీ రేకుల స్వాగతంతో ఖుషీ అయ్యి ఏపీకి పెద్దన్నగా మారతానని డాంబికాలు పలికారని దుయ్యబట్టారు. ఆనాడు రోజా పెట్టిన నాన్ వెజ్ తిని తిరుమల టూర్ ను కూడా కేసీఆర్ రద్దు చేసుకున్నాడని ఆరోపించారు. కేసీఆర్ తెలంగాణకు చేసిన నీళ్ల ద్రోహాన్ని ఎండగడుతూ అడుగడుగునా ఉద్యమాలు చేసింది బీజేపీయేనని చెప్పారు. బీజేపీ రాష్ట్ర అధ్యక్ష హోదాలో అనేకసార్లు కేసీఆర్ కు లేఖలు రాసి హెచ్చరించానని అన్నారు. రాయలసీమ లిఫ్ట్ ఇరిగేషన్ ప్రాజెక్టును ఆపాలని ఉద్యమాలు చేశానని తెలిపారు. జల్ శక్తి శాఖలో అడ్వయిజర్ గా ఉన్న వెదిరె శ్రీరాం ఏ రాష్ట్రానికి అన్యాయం జరగకూడదని నిరంతరం తపన పడ్డారని ప్రశంసించారు. తెలంగాణకు కేసీఆర్ చేస్తున్న అన్యాయాన్ని ఎప్పటికప్పుడు తన దృష్టికి తీసుకువచ్చారని చెప్పారు. అయినా కేసీఆర్ పట్టించుకోకపోవడంతో అపెక్స్ కౌన్సిల్ మీటింగ్ పెట్టాలని కోరుతూ కేంద్రానికి తానే లేఖ రాశానని అన్నారు. సమావేశానికి రెండు రాష్ట్రాల సీఎంలను ఆహ్వానించినా కేసీఆర్ వెళ్లలేదన్నారు. ఏపీ ప్రభుత్వంతో కుమ్మక్కై సమావేశానికి డుమ్మా కొట్టారని ఆరోపించారు. కేంద్రాన్ని ఒప్పించి, రెండో సారి సమావేశం నిర్వహించినా కేసీఆర్ రాలేదని చెప్పారు. కేసీఆర్ చేసిన అన్యాయాన్ని నిలదీస్తూ.. బీజేపీ ఢిల్లీ నుండి గల్లీదాకా నిరసనలు చేసిందని వివరించారు. తెలంగాణ నుంచి తీవ్రమైన ఒత్తిడి రావడంతో కేసీఆర్ 575 టీఎంసీల నీరు కావాలంటూ యూ టర్న్ తీసుకుంది నిజం కాదా అని ప్రశ్నించారు. సీమ ఎత్తిపోతల పథకాన్ని ఆపింది కేంద్రమే.. రాయలసీమ ఎత్తిపోతల పథకాన్ని ఆపాలని అనేకసార్లు సీఎంకు, కేంద్రానికి లేఖ రాసింది తానేనని సంజయ్ స్పష్టం చేశారు. కేఆర్ఎంబీ ద్వారా లేఖ రాసి ఆ ప్రాజెక్టును ఆపింది కేంద్రమేనని తెలిపారు. తెలంగాణకు అన్యాయం జరగకుండా కేంద్రమే ఆపిందని చెప్పారు. సిగ్గు లేకుండా నేడు కాంగ్రెస్, బీఆర్ఎస్ అసెంబ్లీ సాక్షిగా బూతులు తిట్టుకుంటూ, అబద్దాలాడుతూ ప్రజలను మోసం చేస్తున్నాయని ఆరోపించారు. రాయలసీమ లిఫ్ట్ ఇరిగేషన్ ప్రాజెక్టును ఆపింది తామేనని బాకాలు కొడుతున్న కాంగ్రెస్ దమ్ముంటే రుజువు చేయగలదా అని సవాల్ చేశారు. ఆనాడు కాంగ్రెస్ నేతల అడ్రస్ కూడా లేదని చెప్పారు. నీళ్ల చరిత్ర కంటే కేసీఆర్ వ్యవహారశైలి, ఆయన చరిత్రను తాను ఎక్కువగా చదివానని, ఆయన అబద్దాలకే ఎక్కువ ప్రచారం జరిగిందని ఎద్దేవా చేశారు. కేసీఆర్ బ్రేకింగ్ న్యూస్ తో అబద్దాలు ప్రచారం చేస్తే.. తాను కేంద్ర జల్ శక్తి మంత్రి గజేంద్రసింగ్ షెకావత్ తో విలేకరుల సమావేశం నిర్వహించి షేక్ చేశానని, ఆ దెబ్బకు కేసీఆర్ ఫాంహౌజ్కు పారిపోయారు తప్ప నోరు మెదపలేదని మండిపడ్డారు. కాంగ్రెస్, బీఆర్ఎస్ దొంగ నాటకాలు ఆపాలి.. ఇప్పటికైనా కాంగ్రెస్, బీఆర్ఎస్ పార్టీలు దొంగ నాటకాలు ఆపాలని సూచించారు. కాంగ్రెస్ 6 గ్యారంటీలపై చర్చ జరపాలని, బీఆర్ఎస్ పదేళ్ల పాలనా అవినీతిపై సమగ్ర విచారణ జరపాలని అన్నారు. నీళ్ల విషయంలో దక్షిణ తెలంగాణకు జరిగిన అన్యాయాన్ని ఇప్పటికైనా సరిదిద్దాలని కోరారు. దీనికోసం కలిసి రావాలని కాంగ్రెస్, బీఆర్ఎస్ పార్టీలు ముందుకు రావాలని విజ్ఞప్తి చేశారు. ఏ రాష్ట్రానికి అన్యాయం జరగకూడదని, చట్ట ప్రకారమే నీటి వాటా పంపిణీ జరగాలన్నదే బీజేపీ అభిమతమని స్పష్టం చేశారు. రాష్ట్రానికి కేంద్రం ఏమీ చేయలేదని చెబుతున్న కాంగ్రెస్, బీఆర్ఎస్ పార్టీలు.. తెలంగాణకు మోదీ ప్రభుత్వం 11 ఏళ్లలో రూ.12 లక్షల కోట్లు ఇచ్చిన విషయాన్ని ఎందుకు చెప్పడం లేదని ప్రశ్నించారు. తెలంగాణకు జరిగిన అన్యాయంపై ఎన్నడూ రాజీపడకుండా ఉద్యమించిన చరిత్ర బీజేపీదేనని ఉద్ఘాటించారు. కృష్ణా వాటర్ డిస్ప్యూట్ ట్రిబ్యునల్ ఎదుట సరైన వాదనలు వినిపిస్తే తెలంగాణకు జరిగిన అన్యాయాన్ని సరిదిద్దవచ్చని పదేపదే కోరతున్నా రాష్ట్ర ప్రభుత్వం ఎందుకు పట్టించుకోవడం లేదని ప్రశ్నించారు.

Bandi Sanjay | క‌విత‌కు హ్యాట్సాఫ్..: కేంద్ర‌మంత్రి బండి సంజ‌య్‌

FOLLOW US

ట్యాగ్స్:

సంబంధిత వార్తలు

MANNU | రేవంత్ రెడ్డి రియ‌ల్ ఎస్టేట్ బ్రోక‌ర్.. ఉర్దూ యూనివ‌ర్సిటీ విద్యార్థుల ఆగ్ర‌హం

Revanth Reddy | ఆర్టీసీ క్రాస్ రోడ్స్‌లో హై టెన్ష‌న్‌.. భారీగా పోలీసుల మోహ‌రింపు

Hyderabad | మూడు జిల్లాలుగా హైద‌రాబాద్..! సాధ్య‌మ‌య్యేనా..?

ఫీచర్డ్ వార్తలు

Champion Review | ఛాంపియ‌న్ రివ్యూ – శ్రీకాంత్ కొడుకు సినిమా హిట్టా? ఫ‌ట్టా?

Bus Fire Accident | ప్రైవేట్ స్లీపర్ బస్‌ని ఢీకొట్టిన ట్రక్.. మంటలు చెలరేగడంతో 9 మంది సజీవ దహనం

తాజావార్తలు

పాపులర్

ICC | బంగ్లాదేశ్ క్రికెట్ బోర్డు మళ్లీ విజ్ఞ‌ప్తి.. అయినా ప‌ట్టించుకోని ఐసీసీ..?

KTR | రేవంత్‌ది సీరియ‌ల్ స్నాచ‌ర్స్ ప్ర‌భుత్వం.. మండిప‌డ్డ కేటీఆర్

Jana Nayagan | విజ‌య్ జ‌న నాయ‌గ‌న్ విడుద‌ల‌కు లైన్ క్లియ‌ర్‌.. జ‌న‌వ‌రి 14న థియేట‌ర్ల‌లోకి?

POPULAR LINKS

MANNU | రేవంత్ రెడ్డి రియ‌ల్ ఎస్టేట్ బ్రోక‌ర్.. ఉర్దూ యూనివ‌ర్సిటీ విద్యార్థుల ఆగ్ర‌హం

CM Revanth Reddy | భారతదేశ ఖ్యాతిని, సంస్కృతి వైభవాన్ని ప్ర‌పంచ న‌లుమూల‌లా చాటుతున్న ఎన్నారైలు: సీఎం రేవంత్