Gadala Srinivasa Rao | జనసేన తెలంగాణ ఆర్గనైజింగ్‌ సెక్రటరీగా గడల శ్రీనివాసరావు

Gadala Srinivasa Rao | జనసేన పార్టీ తెలంగాణ రాష్ట్ర ఆర్గనైజింగ్‌ సెక్రటరీగా డాక్టర్‌ గడల శ్రీనివాసరావును నియమించారు. తెలంగాణలో పార్టీని సంస్థాగతంగా మరింత బలోపేతం చేసే లక్ష్యంతో ఈ నియామకం చేపట్టినట్లు పార్టీ తెలిపింది. గ్రామస్థాయి నుంచి రాష్ట్రస్థాయి వరకు పార్టీ సంస్థాగత నిర్మాణాన్ని పటిష్టం చేయడంలో గడల శ్రీనివాసరావు కీలకంగా వ్యవహరించనున్నారు. పార్టీ కార్యక్రమాలను సమన్వయం చేయడంతో పాటు క్షేత్రస్థాయిలో జనసేన శ్రేణులను బలోపేతం చేసే బాధ్యతలను ఆయన నిర్వర్తించనున్నారు. గతంలో తెలంగాణ రాష్ట్ర ఆరోగ్య శాఖ పరిధిలో రాష్ట్ర హెల్త్‌ డైరెక్టర్‌గా పనిచేసిన గడల శ్రీనివాసరావు.. స్టేట్‌ అడ్మినిస్ట్రేషన్‌ బాధ్యతలను నిర్వహించారు. ఆయనకు ఉన్న పరిపాలనా అనుభవం తెలంగాణలో జనసేన పార్టీని రాజకీయ ప్రత్యామ్నాయ దిశగా తీసుకెళ్లడంలో ఉపయోగపడుతుందని పార్టీ వర్గాలు పేర్కొన్నాయి. గడల శ్రీనివాసరావు నియామకంతో పార్టీ సంస్థాగత కార్యక్రమాలకు మరింత ఊతం లభిస్తుందని, పార్టీ శ్రేణులు సమన్వయంతో పనిచేస్తాయని జనసేన ఆశాభావం వ్యక్తం చేసింది.