Nama Nageswara Rao | గ్రూప్స్ అభ్యర్థి వేణుకుమార్‌కు అండగా నామ.. డిశ్చార్జ్ బిల్లు మొత్తం మాఫీ చేయించిన మాజీ ఎంపీ

Nama Nageswara Rao | త్రినేత్ర.న్యూస్ : రాష్ట్రంలో ఉద్యోగ నోటిఫికేషన్ల విడుదలలో జాప్యం జరుగుతోందన్న ఆవేదనతో ఆత్మహత్యాయత్నానికి పాల్పడిన ఖమ్మం జిల్లా ముదిగొండ మండలం లక్ష్మీపురం గ్రామానికి చెందిన యువకుడు జి. వేణుకుమార్ కోలుకుని ఆసుపత్రి నుంచి డిశ్చార్జ్ అయ్యారు. ప్రాణాపాయ స్థితి నుంచి బయటపడిన ఆయన కుటుంబానికి బీఆర్ఎస్ పార్లమెంటరీ పార్టీ మాజీ నేత, ఖమ్మం మాజీ ఎంపీ నామ నాగేశ్వరరావు మరోసారి కొండంత అండగా నిలిచారు. ఆసుపత్రి యాజమాన్యంతో నేరుగా మాట్లాడి వేణుకుమార్ డిశ్చార్జ్ బిల్లును పూర్తిగా మాఫీ చేయించి తన మానవత్వాన్ని చాటుకున్నారు.

డాక్టర్ల బృందానికి అభినందనలు

సకాలంలో స్పందించి వేణుకుమార్‌కు మెరుగైన వైద్య సేవలు అందించి ప్రాణాలు కాపాడిన డాక్టర్ కేసోజు భారత్ బాబుతో పాటు ఆసుపత్రి మెడికల్ టీమ్ (Medical Team), నర్సింగ్ సిబ్బందికి నామ నాగేశ్వరరావు ఈ సందర్భంగా ప్రత్యేక అభినందనలు తెలిపారు.

గతంలోనే నామ ట్రస్ట్ తరఫున బాధిత కుటుంబానికి రూ.50,000 ఆర్థిక సాయం అందజేసిన నామ.. ఇప్పుడు డిశ్చార్జ్ బిల్లును కూడా మాఫీ చేయించి ఆ కుటుంబంపై ఉన్న ఆర్థిక భారాన్ని గణనీయంగా తగ్గించారు. బీఆర్ఎస్ పార్టీ వేణుకుమార్ కుటుంబానికి ఎల్లప్పుడూ అండగా ఉంటుందని భరోసా ఇచ్చారు.

'ఆత్మహత్యలు పరిష్కారం కావు' - ఫోన్‌లో పరామర్శించిన నామ

ఆసుపత్రి నుంచి ఇంటికి చేరుకున్న అనంతరం వేణుకుమార్, ఆయన కుటుంబ సభ్యులు ఫోన్ ద్వారా మాజీ ఎంపీ నామ నాగేశ్వరరావుకు ప్రత్యేకంగా కృతజ్ఞతలు తెలిపారు. ఈ సందర్భంగా వేణుకుమార్‌తో మాట్లాడిన నామ.. ఆయన ఆరోగ్య పరిస్థితిని అడిగి తెలుసుకున్నారు.

యువతకు నామ పిలుపు

"జీవితంలో సాధించాల్సింది ఇంకా చాలా ఉంది. ఎలాంటి పరిస్థితుల్లోనూ నిరుద్యోగ యువత అధైర్యపడి ఆత్మహత్యల వంటి తొందరపాటు నిర్ణయాలు తీసుకోవద్దు. ధైర్యంగా ఉండి జీవితంలో ముందుకు సాగాలి." అని నామ నాగేశ్వరరావు మోటివేట్ చేశారు.

వేణుకుమార్ త్వరగా సంపూర్ణ ఆరోగ్యంతో కోలుకుని సాధారణ జీవితాన్ని గడపాలని, భవిష్యత్తులో మంచి స్థాయికి ఎదగాలని నామ ఆకాంక్షించారు.