Telangana Pre-Budget Meetings 2026 | దేశానికే మోడల్‌గా ‘అంబేద్కర్ నాలెడ్జ్ సెంటర్లు’.. విద్యా, వైద్యానికి జై కొట్టిన డిప్యూటీ సీఎం భట్టి

• విద్య, ఆరోగ్యానికి అత్యధిక ప్రాధాన్యం
• యుద్ధ ప్రాతిపదికన హాస్టల్ భవనాల మరమ్మతులు చేపట్టండి
• సంక్షేమ వసతి గృహాలు, గురుకులాల్లో అధికారుల పరిశీలన నిరంతరం జరగాలి
• లక్ష కోట్లకు పైగా నిధులతో రాష్ట్రంలో రహదారుల నిర్మాణం జరుగుతుంది
• సాంస్కృతిక కార్యక్రమాలు నిరంతరం జరగాలి
• ప్రీ బడ్జెట్ సమావేశాల్లో డిప్యూటీ సీఎం భట్టి విక్రమార్క మల్లు

Telangana Pre-Budget Meetings 2026 | త్రినేత్ర.న్యూస్ : రాష్ట్ర ప్రభుత్వం ప్రవేశపెట్టబోయే బడ్జెట్‌లో విద్య, ఆరోగ్య రంగాలకు అత్యధిక ప్రాధాన్యం ఉంటుందని, ఈ రంగాల్లో ఉత్తమ ఫలితాలు సాధించేందుకు నిధుల విషయంలో వెనకాడబోమని ఉప ముఖ్యమంత్రి, ఆర్థిక శాఖ మంత్రి భట్టి విక్రమార్క మల్లు స్పష్టం చేశారు. బుధవారం సచివాలయంలో పలు శాఖల మంత్రులతో కలిసి ఆయన ప్రీ-బడ్జెట్ సమావేశాలు నిర్వహించారు. ఈ సందర్భంగా తీసుకున్న కీలక నిర్ణయాలు, ఆదేశాలు ఇలా ఉన్నాయి.

1. అంబేద్కర్ నాలెడ్జ్ సెంటర్లు - దేశానికే ఆదర్శం

గ్రామీణ విద్యార్థులు సివిల్స్, గ్రూప్స్ వంటి పోటీ పరీక్షల కోసం హైదరాబాద్ వచ్చి ఆర్థిక ఇబ్బందులు పడకుండా ఉండేందుకు ప్రభుత్వం కొత్త ఆలోచన చేస్తోంది. ప్రతి నియోజకవర్గ కేంద్రంలో 'అంబేద్కర్ నాలెడ్జ్ సెంటర్లు' ఏర్పాటు చేయనున్నారు. హైదరాబాద్ నుంచి అత్యుత్తమ ఉపాధ్యాయులు ఆన్‌లైన్ ద్వారా ఇక్కడి విద్యార్థులకు పాఠాలు బోధిస్తారు. ఇది దేశంలోనే ఒక మోడల్‌గా నిలుస్తుందని భట్టి తెలిపారు.

2. హాస్టళ్లలో కొత్త వెలుగులు - బయోమెట్రిక్ తప్పనిసరి

సంక్షేమ వసతి గృహాలు, గురుకులాల భవనాలకు యుద్ధ ప్రాతిపదికన మరమ్మతులు పూర్తి చేయాలి. హాస్టల్ భవనాలపై సోలార్ ప్లాంట్లు ఏర్పాటు చేసి, కరెంటు బిల్లుల భారం తగ్గించుకోవడంతో పాటు ఆదాయం సమకూర్చుకోవాలి. విద్యార్థులు, టీచింగ్ స్టాఫ్‌కు బయోమెట్రిక్ హాజరు తప్పనిసరి. దీన్ని కంట్రోల్ రూమ్‌కు అనుసంధానం చేయాలి. ప్రతి మూడు నెలలకు ఒకసారి హాస్టల్ అద్దెలు, మెస్ ఛార్జీలు క్లియర్ చేస్తున్నామని భట్టి స్పష్టం చేశారు.

3. రూ.లక్ష కోట్లతో రహదారుల నిర్మాణం

రాష్ట్రంలో దాదాపు రూ.లక్ష కోట్లతో రహదారుల నిర్మాణం జరుగుతోందని భట్టి విక్రమార్క తెలిపారు. రీజినల్ రింగ్ రోడ్డు (RRR), హైదరాబాద్-విజయవాడ, ఫ్యూచర్ సిటీ నుంచి బందర్ పోర్టు, రావిర్యాల నుంచి శ్రీశైలం వరకు రోడ్ల పనులు వేగవంతం చేయాలన్నారు. RRR నిర్మాణానికి హడ్కో (HUDCO) నుంచి రుణం తీసుకునేందుకు గ్రీన్ సిగ్నల్ ఇచ్చినందుకు మంత్రి కోమటిరెడ్డి వెంకటరెడ్డి డిప్యూటీ సీఎంకు కృతజ్ఞతలు తెలిపారు.

4. వ్యవసాయం - పంట మార్పిడి

వరి సాగు అధికంగా ఉండటం, బాయిల్డ్ రైస్ కొనుగోళ్లలో ఇబ్బందుల దృష్ట్యా పంట మార్పిడిపై దృష్టి సారించాలని మంత్రి ఉత్తమ్ కుమార్ రెడ్డి సూచించారు. వరికి బదులుగా పామాయిల్, పప్పు ధాన్యాల సాగును ప్రోత్సహించాలని, గోదాముల సామర్థ్యాన్ని పెంచాలని నిర్ణయించారు.

5. సంక్షేమం - మహాలక్ష్మి పథకం

మహాలక్ష్మి పథకం ద్వారా మహిళలకు ఉచిత బస్సు ప్రయాణం విజయవంతంగా కొనసాగుతోందని మంత్రి పొన్నం ప్రభాకర్ తెలిపారు. త్వరలోనే మహిళలకు ఇంటింటికీ మహాలక్ష్మి కార్డులు పంపిణీ చేస్తామన్నారు. బీసీ గురుకులాలకు అద్దెలు, విద్యార్థులకు స్కాలర్‌షిప్‌లు గ్రీన్ ఛానల్ ద్వారా ఎప్పటికప్పుడు విడుదల చేస్తున్నట్లు తెలిపారు.

ఈ సమావేశంలో మంత్రులు ఉత్తమ్ కుమార్ రెడ్డి, కోమటిరెడ్డి వెంకటరెడ్డి, పొన్నం ప్రభాకర్, అడ్లూరి లక్ష్మణ్ కుమార్, అజారుద్దీన్, ప్రభుత్వ ఉన్నతాధికారులు సందీప్ కుమార్ సుల్తానియా, రాహుల్ బొజ్జ, వికాస్ రాజ్ తదితరులు పాల్గొన్నారు.