Telangana Municipal Elections 2026 | మున్సిపల్ ఎన్నికల్లో కాంగ్రెస్ క్లీన్ స్వీప్ పక్కా: ఏఐసీసీ సెక్రటరీ సచిన్ సావంత్ జోస్యం

Telangana Municipal Elections 2026 | త్రినేత్ర.న్యూస్ : తెలంగాణలో త్వరలో జరగనున్న మున్సిపల్ ఎన్నికల్లో కాంగ్రెస్ పార్టీ ప్రభంజనం సృష్టించబోతోందని ఏఐసీసీ సెక్రటరీ సచిన్ సావంత్ ఆశాభావం వ్యక్తం చేశారు. ఎన్నికల వ్యూహాలు, ప్రచార సరళిపై డీసీసీ అధ్యక్షురాలు నిర్మల జగ్గారెడ్డి, మాజీ ఎమ్మెల్యే జగ్గారెడ్డిలతో ఆయన ప్రత్యేకంగా సమావేశమయ్యారు. రాష్ట్రవ్యాప్తంగా పర్యటించిన తర్వాత ప్రజా నాడి కాంగ్రెస్ వైపే ఉందని ఆయన స్పష్టం చేశారు.

సంక్షేమ పథకాలే విజయకేతనం

"తెలంగాణలో అన్ని మున్సిపాలిటీలు, కార్పొరేషన్లను కాంగ్రెస్ పార్టీ క్లీన్ స్వీప్ చేయడం పక్కా. ఇందులో నాకు ఎలాంటి సందేహం లేదు" అని సచిన్ సావంత్ అన్నారు. కాంగ్రెస్ ప్రభుత్వం అధికారంలోకి వచ్చిన తక్కువ కాలంలోనే కీలక హామీలను నెరవేర్చిందని ఆయన గుర్తు చేశారు. 2 లక్షల రుణమాఫీతో రైతులకు భరోసా, 200 యూనిట్ల ఉచిత విద్యుత్, ఉచిత బస్సు ప్రయాణం, సన్న బియ్యం సరఫరా, కొత్త రేషన్ కార్డుల జారీ, పేదల కల ఇందిరమ్మ ఇళ్లు లాంటి పథకాలు ప్రజల్లోకి బలంగా వెళ్లాయని పేర్కొన్నారు.

బీజేపీ మత రాజకీయాలపై ధ్వజం

బీజేపీపై సచిన్ సావంత్ తీవ్రస్థాయిలో విరుచుకుపడ్డారు. అభివృద్ధి కంటే హిందూ, ముస్లింల మధ్య గొడవలు పెట్టి రాజకీయ లబ్ధి పొందడమే బీజేపీ నైజమని విమర్శించారు. పటాన్ చెరు నియోజకవర్గం తెల్లాపూర్‌లో మహాత్మా జ్యోతిరావు పూలే విగ్రహాన్ని ధ్వంసం చేయడంపై ఆయన మండిపడ్డారు. "ఛత్రపతి శివాజీ మహారాజ్ సమాధిని కనిపెట్టి, ఆయన చరిత్రను ప్రపంచవ్యాప్తం చేసింది జ్యోతిరావు పూలే. అటువంటి మహనీయుడి విగ్రహాన్ని ధ్వంసం చేస్తున్న బీజేపీ నాయకులు, శివాజీ పేరు చెప్పుకుని రాజకీయం చేయడం సిగ్గుచేటు" అని విమర్శించారు. రాముడి పేరు వాడుకుంటున్న వారు రాముడి స్ఫూర్తిని మాత్రం విస్మరిస్తున్నారని ధ్వజమెత్తారు.

బీఆర్ఎస్ అస్తిత్వం ప్రశ్నార్థకం

గత బీఆర్ఎస్ ప్రభుత్వం అవినీతితో రాష్ట్రాన్ని అధోగతి పాలు చేసిందని సచిన్ సావంత్ ఆరోపించారు. పార్టీ పేరు మార్చుకున్నా కేసీఆర్ కు అదృష్టం కలిసిరావడం లేదని, ప్రజలు ఇప్పటికే ఆ పార్టీని, వారి గుర్తును పక్కన పెట్టేశారని ఎద్దేవా చేశారు. తెలంగాణ సమాజం మార్పు కోరుకుంటోందని, అది మున్సిపల్ ఎన్నికల ఫలితాల్లో స్పష్టమవుతుందని ఆయన ముగించారు.