Warangal Dalit House Demolition | వరంగల్ దళితులపై రేవంత్ సర్కార్ ‘బుల్డోజర్ రాజ్యం’

• ఇళ్లు కూల్చడం అమానుషమన్న ఎమ్మెల్సీ డా.దాసోజు శ్రవణ్

Warangal Dalit House Demolition |  త్రినేత్ర.న్యూస్ : తెలంగాణలో రేవంత్ రెడ్డి ప్రభుత్వం పేదలపై, ముఖ్యంగా దళితులపై 'బుల్డోజర్ రాజ్యం' నడుపుతోందని బీఆర్ఎస్ ఎమ్మెల్సీ డా.దాసోజు శ్రవణ్ తీవ్ర ఆగ్రహం వ్యక్తం చేశారు. వరంగల్ నగరంలోని భద్రకాళి ఆలయ పరిసరాల్లో ఉన్న చెరబండ రాజు నగర్ కాలనీలో దళిత కుటుంబాల ఇళ్లను కూల్చివేసేందుకు ప్రభుత్వం చేస్తున్న ప్రయత్నాలను ఆయన పాశవిక చర్యగా అభివర్ణించారు.

మానవ హక్కుల కమిషన్‌లో ఫిర్యాదు

బుధవారం మాజీ చీఫ్ విప్ దాస్యం వినయ్ భాస్కర్, ఎమ్మెల్సీ దాసోజు శ్రవణ్, బీఆర్ఎస్ పార్టీ లీగల్ సెల్ ప్రతినిధులు బాధిత కుటుంబాలతో కలిసి రాష్ట్ర మానవ హక్కుల కమిషన్ (HRC) చైర్మన్ జస్టిస్ షమీమ్ అక్తర్‌ను కలిశారు. ప్రభుత్వ అప్రజాస్వామిక చర్యలపై లిఖితపూర్వక ఫిర్యాదు అందజేశారు.

అభివృద్ధి పేరుతో అణచివేత

ఈ సందర్భంగా డా.శ్రవణ్ మాట్లాడుతూ.. "లగచర్లలో గిరిజనులపై జరిగిన దాడులు మరువక ముందే, ఇప్పుడు వరంగల్‌లో అభివృద్ధి, మాడ వీధుల పేరుతో కనీసం ముందస్తు నోటీసులు ఇవ్వకుండా దళితుల ఇళ్లను కబ్జా చేయాలని చూడటం దారుణం. 60–70 ఏళ్లుగా అక్కడ నివసిస్తున్న వారికి కనీస గౌరవం ఇవ్వరా?" అని ప్రశ్నించారు.

అమానుష చర్యలు

మౌలిక సదుపాయాల నిలిపివేత: ఇళ్లు ఖాళీ చేయించేందుకు తాగునీటి కనెక్షన్లు కట్ చేయడం, కరెంట్ నిలిపివేస్తామని బెదిరించడం వంటి చర్యలు మానవత్వాన్ని మంటగలుపుతున్నాయని ఆయన మండిపడ్డారు.

పిల్లల ఇబ్బందులు: నీరు లేక చిన్న పిల్లలు పాఠశాలలకు కూడా వెళ్లలేని దౌర్భాగ్య స్థితిని ప్రభుత్వం కల్పించిందని ఆవేదన వ్యక్తం చేశారు.

అధికారుల నిర్లక్ష్యం: బాధితులు కలెక్టర్, కమిషనర్‌ను కలిసినా ఫలితం లేకపోవడం వల్లే తాము హెచ్‌ఆర్‌సీని ఆశ్రయించాల్సి వచ్చిందని తెలిపారు.

హెచ్‌ఆర్‌సీ హామీ

ఫిర్యాదుపై స్పందించిన హెచ్‌ఆర్‌సీ చైర్మన్ జస్టిస్ షమీమ్ అక్తర్, ఇది స్పష్టంగా రాజ్యాంగ ఉల్లంఘన అని అభిప్రాయపడ్డారని శ్రవణ్ పేర్కొన్నారు. మార్చి 9న ఈ అంశంపై సమీక్ష నిర్వహిస్తామని, తక్షణ ఆదేశాలు జారీ చేస్తామని కమిషన్ హామీ ఇచ్చినట్లు ఆయన వెల్లడించారు.

"ఇదేనా మీరు చెబుతున్న ప్రజా పాలన? ఇదేనా జై భీమ్ అంటే?" అని రేవంత్ సర్కార్‌ను ఆయన నిలదీశారు. తెలంగాణలోని దళిత, గిరిజన సంఘాలన్నీ ఏకమై ఈ నిరంకుశత్వానికి వ్యతిరేకంగా పోరాడాలని పిలుపునిచ్చారు.