Entrepreneur India Idea Awards 2026 | ఎంటర్‌ప్రెన్యూర్ ఇండియా ఐడియా అవార్డ్స్-2026: ముఖ్య అతిథిగా కేటీఆర్‌కు ఆహ్వానం

• 'ఎంటర్‌ప్రెన్యూర్ ఇండియా ఐడియా అవార్డ్స్-2026' కార్యక్రమానికి చీఫ్ గెస్ట్‌గా హాజరుకానున్న కేటీఆర్
• ఏప్రిల్ 15, 2026న బెంగళూరులో జరగనున్న ప్రతిష్టాత్మక సదస్సు
• దేశవ్యాప్తంగా ఉన్న 300 మందికి పైగా ప్రముఖ పారిశ్రామికవేత్తలు, ఇన్వెస్టర్లు, క్రియేటర్ల భాగస్వామ్యం
• టెక్నాలజీ, ఇన్నోవేషన్ రంగాల్లో బీఆర్ఎస్ హయాంలో తెలంగాణ సాధించిన ప్రగతికి, కేటీఆర్ విజన్‌కు దక్కిన గౌరవం

Entrepreneur India Idea Awards 2026 | త్రినేత్ర.న్యూస్ : మాజీ మంత్రి, బీఆర్ఎస్ (BRS) వర్కింగ్ ప్రెసిడెంట్ కల్వకుంట్ల తారకరామారావు (KTR) కు మరో అరుదైన ఆహ్వానం అందింది. బెంగళూరు వేదికగా జరుగనున్న ప్రతిష్టాత్మక 'ఎంటర్‌ప్రెన్యూర్ ఇండియా ఐడియా అవార్డ్స్-2026' (Entrepreneur India Idea Awards 2026) కార్యక్రమానికి ఆయన ముఖ్య అతిథిగా (Chief Guest) హాజరుకానున్నారు. ఈ మేరకు నిర్వాహకులు ఆయనకు ప్రత్యేక ఆహ్వానం పంపారు.

300 మందికి పైగా దిగ్గజాలు

ఈ ఏడాది ఏప్రిల్ 15, 2026న బెంగళూరులో ఈ కార్యక్రమం జరుగనుంది. దేశవ్యాప్తంగా ఉన్న సుమారు 300 మందికి పైగా ప్రముఖ పారిశ్రామికవేత్తలు, పెట్టుబడిదారులు, క్రియేటర్లు, వ్యాపార దిగ్గజాలు ఈ అవార్డుల ప్రదానోత్సవంలో పాల్గొననున్నారు. భారతదేశంలో పారిశ్రామిక, ఆవిష్కరణల వ్యవస్థను బలోపేతం చేస్తున్న విజనరీ లీడర్లు, వినూత్న స్టార్టప్‌లు, సమాజంలో మార్పు తీసుకొస్తున్న వ్యక్తులను గుర్తించి ఈ అవార్డులను ప్రదానం చేస్తారు.

కేటీఆర్ విజన్‌పై ప్రశంసలు

టెక్నాలజీ, ఇన్నోవేషన్, ఆర్థిక వృద్ధిని ప్రోత్సహించడంలో కేటీఆర్ కనబరిచిన చైతన్యవంతమైన నాయకత్వాన్ని అవార్డుల నిర్వాహకులు ప్రత్యేకంగా కొనియాడారు. ఆయన నిర్ణయాలు ఎంతోమంది యువ పారిశ్రామికవేత్తలకు దేశవ్యాప్తంగా స్ఫూర్తిగా నిలిచాయని ప్రశంసించారు. ఈ ప్రతిష్టాత్మక వేదికపై కేటీఆర్ ప్రసంగిస్తే.. అది భావితరాల ఆంత్రప్రెన్యూర్లలో ఎంతో స్ఫూర్తిని నింపుతుందని, కార్యక్రమానికి మరింత వన్నె తెస్తుందని నిర్వాహకులు తమ ఆహ్వానంలో పేర్కొన్నారు.

తెలంగాణ ప్రగతికి దక్కిన గుర్తింపు

బీఆర్ఎస్ ప్రభుత్వ హయాంలో, కేటీఆర్ నేతృత్వంలో తెలంగాణ రాష్ట్రం ఆవిష్కరణలు, స్టార్టప్ ఎకోసిస్టమ్ (Startup Ecosystem) అభివృద్ధిలో అద్భుతమైన ఫలితాలను సాధించింది. టీ-హబ్ (T-Hub), వీ-హబ్ (We-Hub) వంటి వినూత్న సంస్థల ద్వారా పారిశ్రామిక వృద్ధిలో రాష్ట్రం దేశానికే ఆదర్శంగా నిలిచింది. ఆ ప్రగతిశీల విధానాలకు, నిరంతర అభివృద్ధికి దక్కిన జాతీయ స్థాయి గుర్తింపుగానే కేటీఆర్‌కు ఈ ఆహ్వానం అందినట్లు తెలుస్తోంది.