BRS MLAs | క‌న్నెప‌ల్లి నుంచి గోదావ‌రి జ‌లాల‌ను ఎత్తిపోయాలి

నీటిని స‌ముద్రంలోకి వ‌దిలేస్తూ..
హైద‌రాబాద్ ప్ర‌జ‌ల‌ను ఇబ్బందుల‌కు గురి చేస్తారా..?
నీటి స‌మ‌స్య‌ను ప‌రిష్క‌రించ‌క‌పోతే..
సీఎం రేవంత్ రెడ్డి నివాసాన్ని ముట్ట‌డిస్తాం
హైదరాబాద్ తాగునీటి సంక్షోభంపై
కాంగ్రెస్ ప్రభుత్వానికి బీఆర్ఎస్ ఎమ్మెల్యేల హెచ్చరిక

BRS MLAs | త్రినేత్ర న్యూస్ : హైదరాబాద్‌లో తాగునీటి సంక్షోభాన్ని నివారించేందుకు కన్నెపల్లి పంప్‌హౌస్‌ నుంచి వెంటనే గోదావరి జలాలను ఎత్తిపోయాలని బీఆర్ఎస్ ఎమ్మెల్యేలు కాంగ్రెస్ ప్రభుత్వాన్ని డిమాండ్ చేశారు. ప్రభుత్వం తక్షణ చర్యలు తీసుకోకపోతే హైదరాబాద్ ప్రజలతో కలిసి ముఖ్యమంత్రి రేవంత్ రెడ్డి నివాసాన్ని ముట్టడిస్తామని హెచ్చరించారు.

కాళేశ్వరం ప్రాజెక్టులో భాగమైన కన్నెపల్లి పంప్‌హౌస్‌ను బీఆర్ఎస్ ఎమ్మెల్యేలు దేవిరెడ్డి సుధీర్ రెడ్డి, మాధవరం కృష్ణారావు, కె.పి. వివేకానంద గౌడ్, మర్రి రాజశేఖర్ రెడ్డి, బండారి లక్ష్మారెడ్డి, మాజీ మంత్రి ఎర్రబెల్లి దయాకర్ రావు, మాజీ ఎమ్మెల్యే గండ్ర వెంకట రమణారెడ్డి సందర్శించారు. గోదావరి జలాలు పెద్ద మొత్తంలో దిగువకు ప్రవహిస్తూ సముద్రంలో కలుస్తున్నప్పటికీ, హైదరాబాద్ తాగునీటి అవసరాల కోసం వాటిని వినియోగించుకోవడంలో ప్రభుత్వం విఫలమవుతోందని వారు ఆరోపించారు.

జూన్ నుంచి ఇప్పటివరకు సుమారు 750 టీఎంసీలకు పైగా గోదావరి జలాలు సముద్రంలో కలిశాయని నేతలు పేర్కొన్నారు. కనీసం 250 టీఎంసీల నీటిని ఎత్తిపోసినా జలాశయాలు, చెరువుల్లో నీటి నిల్వలు పెరిగేవని, భూగర్భ జలమట్టాలు మెరుగుపడటంతో పాటు హైదరాబాద్ తాగునీటి అవసరాలకు ఉపశమనం లభించేదని అభిప్రాయపడ్డారు.

ప్రజలకు నీటి కష్టాలు.. ప్రభుత్వానికి పట్టదా?

కన్నెపల్లి పంప్‌హౌస్‌ వద్ద ఏర్పాటు చేసిన మీడియా సమావేశంలో ఎమ్మెల్యే కె.పి. వివేకానంద గౌడ్ మాట్లాడుతూ, జూలైలో బీఆర్ఎస్ వర్కింగ్ ప్రెసిడెంట్ కేటీఆర్ ఈ ప్రాంతాన్ని సందర్శించి గోదావరి జలాలు వృథాగా సముద్రంలోకి వెళ్తున్న విషయాన్ని ప్రభుత్వం దృష్టికి తీసుకెళ్లారని గుర్తుచేశారు. ఎల్‌నినో ప్రభావం, భవిష్యత్తులో తలెత్తే నీటి సమస్యలపై అప్పుడే హెచ్చరించినట్లు తెలిపారు. నీటిని ఎత్తిపోసేందుకు సూచించిన ఇంజినీర్లకు బెల్టు ట్రీట్‌మెంట్ ఇస్తానని ముఖ్యమంత్రి బెదిరించారని వివేకానంద గౌడ్ ఆరోపించారు. ప్రజల నీటి సమస్యలను పరిష్కరించకుండా ప్రభుత్వం నిర్లక్ష్యం వహిస్తే ప్రజలే ముఖ్యమంత్రికి తగిన సమాధానం చెబుతారని వ్యాఖ్యానించారు. హైదరాబాద్‌కు ఏడాది పాటు తాగునీరు అందించేందుకు సుమారు 10 టీఎంసీల నీరు సరిపోతుందని పేర్కొంటూ, కన్నెపల్లి నుంచి వెంటనే నీటిని ఎత్తిపోయాలని డిమాండ్ చేశారు.

మూడు రోజులకు ఒకసారి కూడా సరిగ్గా రావడం లేదు

ఎమ్మెల్యే మర్రి రాజశేఖర్ రెడ్డి మాట్లాడుతూ.. హైదరాబాద్‌లోని తన నియోజకవర్గంతో పాటు పలు ప్రాంతాల్లో ప్రజలు నీటి సరఫరా సరిగా లేక ఇబ్బందులు పడుతున్నారని తెలిపారు. మూడు రోజులకు ఒకసారి నీరు వస్తున్నా, తక్కువ పీడనంతో సరఫరా అవుతోందని ప్రజలు ఫిర్యాదు చేస్తున్నట్లు చెప్పారు. సింగూరు, మంజీరా జలాశయాల్లో నీటి నిల్వలు తగ్గుతున్నాయని వాటర్ బోర్డు అధికారులు చెబుతున్నారని పేర్కొన్నారు. ప్రభుత్వం ముందస్తుగా జలాశయాల్లో తగినంత నీటిని నిల్వ చేసుకుని ఉంటే హైదరాబాద్‌తో పాటు తెలంగాణలోని ఇతర ప్రాంతాల్లోనూ ప్రస్తుత పరిస్థితిని నివారించవచ్చని అన్నారు. కాంగ్రెస్ ప్రభుత్వ నిర్లక్ష్యమే కరువు పరిస్థితులకు కారణమవుతోందని ఆరోపించారు.

మేడిగడ్డపై చర్యలేవీ?

ఎమ్మెల్యే డి. సుధీర్ రెడ్డి మాట్లాడుతూ.. మేడిగడ్డ బ్యారేజీ పిల్లర్లను లక్ష్యంగా చేసుకుని పేలుడు ఘటన జరిగినట్లు వచ్చిన ఆరోపణలపై ఫిర్యాదు చేసినప్పటికీ చర్యలు తీసుకోలేదని విమర్శించారు. మరమ్మతుల పనులు కూడా చేపట్టలేదని ఆరోపిస్తూ, కాళేశ్వరం ప్రాజెక్టుపై తప్పుడు ప్రచారంతో తెలంగాణ ప్రయోజనాలకు నష్టం కలిగిస్తున్నారని ముఖ్యమంత్రి రేవంత్ రెడ్డిపై విమర్శలు చేశారు. హైదరాబాద్‌లో వాటర్ ట్యాంకర్లకు డిమాండ్ పెరిగిందని, అక్టోబర్ నెలలో రోజుకు సుమారు 7,000 ట్యాంకర్ బుకింగ్స్ జరుగుతున్నాయని సుధీర్ రెడ్డి పేర్కొన్నారు. ఇది వేసవి కాలాన్ని తలపించే పరిస్థితి అని, నగరంలో నీటి కొరత తీవ్రతకు నిదర్శనమని అన్నారు.

కాళేశ్వరం నీటిని వినియోగించుకోవాలి

మాజీ మంత్రి ఎర్రబెల్లి దయాకర్ రావు మాట్లాడుతూ.. నీటి సంక్షోభాన్ని పరిష్కరించే అవకాశం ఉన్నప్పటికీ ప్రభుత్వం చర్యలు తీసుకోవడం లేదని ఆరోపించారు. హైదరాబాద్ ప్రజలను ఇబ్బందులకు గురిచేయకుండా కనీసం ఇప్పటికైనా గోదావరి జలాలను ఎత్తిపోయాలని డిమాండ్ చేశారు. గతంలో కరోనా సమయంలోనూ మాజీ ముఖ్యమంత్రి కేసీఆర్ ప్రజలకు నీరు, విద్యుత్ సహా అవసరమైన సేవలు అందేలా చర్యలు తీసుకున్నారని గుర్తుచేశారు.

తాగునీటి సంక్షోభం దిశగా హైదరాబాద్ 

మాజీ ఎమ్మెల్యే గండ్ర వెంకట రమణారెడ్డి మాట్లాడుతూ.. ప్రభుత్వ వైఫల్యాలపై ప్రజల ప్రశ్నలను పక్కదారి పట్టించే రాజకీయాలతో తప్పించుకోలేరని విమర్శించారు. విలువైన గోదావరి జలాలు సముద్రంలో కలుస్తుండగా, హైదరాబాద్ తాగునీటి సంక్షోభం దిశగా వెళ్లడం ఆందోళనకరమని అన్నారు. ప్రభుత్వం వెంటనే కన్నెపల్లి పంప్‌హౌస్‌ నుంచి నీటిని ఎత్తిపోయి ప్రజలకు తాగునీటి భరోసా కల్పించాలని డిమాండ్ చేశారు.