Mobile Public Address Systems | ప్రియ‌మైన‌ ప్ర‌జ‌లారా! నీటిని పొదుపుగా వాడండి.. కాల‌నీల్లో మొబైల్ మైక్‌లతో ప్ర‌చారం షురూ

Mobile Public Address Systems | త్రినేత్ర న్యూస్‌: ఎల్‌నినో (El Nino) ప్ర‌భావ‌ హెచ్చ‌రిక‌ల నేప‌థ్యంలో ప్ర‌భుత్వ సూచ‌న‌ల మేర‌కు నీటి వినియోగంపై కాల‌నీల్లో ప్ర‌చారం షురువైంది. ప్రియ‌మైన ప్ర‌జ‌లారా.. డిసెంబ‌ర్ 15 నుంచి నీటి క‌ష్టాలు మొద‌ల‌వుతాయని.. పొదుపుగా వాడి అంద‌రి బాగు కోసం స‌హ‌క‌రించాల‌ని కోరుతూ మణికొండలోని పంచ‌వ‌తి కాల‌నీ వెల్ఫేర్ అసోషియేష‌న్ ఆధ్వ‌ర్యంలో శుక్ర‌వారం ప్ర‌చారం ప్రారంభించారు. మొబైల్ మైక్‌ల‌ (Mobile Public Address Systems)తో కాల‌నీలు, బ‌స్తీల్లో తిరుగుతూ అవ‌గాహ‌న క‌ల్పిస్తున్నారు.

ప్రియ‌మైన నివాసితుల‌కు విజ్ఞ‌ప్తి. సింగూరు, మంజీరా జ‌లాశ‌యాలు డెడ్ స్టోరేజీకి చేరుకుంటున్నాయి. డిసెంబ‌ర్ 15 తర్వాత నీటి స‌ర‌ఫ‌రా గ‌ణ‌నీయంగా త‌గ్గే అవ‌కాశం ఉంద‌ని ప్ర‌భుత్వం హెచ్చ‌రిస్తోంది. ఎల్‌నినో ప్ర‌భావంతో భూ గ‌ర్భ జ‌ల‌మ‌ట్టాలు కూడా ప‌డిపోతున్నాయి.

సెల్లార్లు, రోడ్లు, కార్లు, మీ దాబాలు క‌డ‌గ‌డానికి న‌ల్లా నీరు, బోర్ వాటర్‌ను వృథా చేయొద్దు. ఒక‌వేళ నీటిని వృథా చేస్తే హెచ్ఎండ‌బ్ల్యూఎస్ఎస్‌బీ (HMWSSB) దృష్టికి తీసుకెళ్లి చ‌ర్య‌లు తీసుకునే అవ‌కాశం ఉంది. బోర్‌వెల్ మోట‌ర్లు, భారీ నిర్మాణాల‌ను స్వాధీనం చేసుకునే వీలుంది. ప్ర‌తి నీటి చుక్క‌ను పొదుపు చేయండి. అంద‌రి బాగు కోసం నీటిని పొదుపుగా వాడుతూ స‌హ‌క‌రించండి అంటూ ప్ర‌చారం క‌ల్పిస్తున్నారు.