RS Praveen Kumar BRS | కేసీఆర్ పట్టాలిస్తే.. రేవంత్ లాక్కుంటున్నాడు

• అడవి బిడ్డలపై కాంగ్రెస్ సర్కార్ దౌర్జన్యం
• ఆర్ఎస్ ప్రవీణ్ కుమార్ ఫైర్

RS Praveen Kumar BRS | త్రినేత్ర.న్యూస్ : కాంగ్రెస్ ప్రభుత్వం అటవీ అధికారుల ద్వారా పోడు రైతులు, గిరిజనులపై దౌర్జన్యాలకు పాల్పడుతోందని బీఆర్ఎస్ రాష్ట్ర ప్రధాన కార్యదర్శి ఆర్.ఎస్. ప్రవీణ్ కుమార్ (RS Praveen Kumar) తీవ్ర స్థాయిలో ధ్వజమెత్తారు. బుధవారం తెలంగాణ భవన్‌లో ఆయన మాట్లాడుతూ.. ముఖ్యమంత్రి రేవంత్ రెడ్డి, మంత్రులు కొండా సురేఖ, పొంగులేటి శ్రీనివాస్ రెడ్డి తీరుపై నిప్పులు చెరిగారు. రాజ్యాంగం పట్టుకొని తిరిగే రాహుల్ గాంధీ శిష్యుడిగా చెప్పుకునే రేవంత్ రెడ్డి.. ఆర్టికల్ 21 కల్పించిన 'జీవించే హక్కు'ను రాష్ట్రంలో కాలరాస్తున్నారని మండిపడ్డారు.

కేసీఆర్ పట్టాలిస్తే.. కాంగ్రెస్ దాడులు చేస్తోంది

గత పదేళ్ల పాలనలో కేసీఆర్ (KCR) అడవి బిడ్డల కష్టాలను అర్థం చేసుకున్నారని ప్రవీణ్ కుమార్ గుర్తుచేశారు. 2023లో సుమారు 1.5 లక్షల మంది రైతులకు 4 లక్షల ఎకరాల పోడు భూముల పట్టాలు అందించడంతో పాటు.. రైతుబంధు, రైతుబీమా, ఉచిత విద్యుత్ వంటి సౌకర్యాలు కల్పించారని తెలిపారు. కానీ, ప్రస్తుత కాంగ్రెస్ ప్రభుత్వం మన్ననూర్ నుండి ఆసిఫాబాద్ వరకు అటవీ ప్రాంత ప్రజలను అకారణంగా బయటకు గెంటేస్తోందని ఆరోపించారు. కేసీఆర్ ఇచ్చిన పట్టాలు చెల్లవంటూ రైతులు భూమి దున్నుకుంటే వాహనాలను సీజ్ చేస్తున్నారని, అధికారులను నిలదీస్తే సెక్షన్ 352 కింద జైలుకు పంపుతున్నారని ఆగ్రహం వ్యక్తం చేశారు. "ఇది ప్రజా ప్రభుత్వం కాదు.. ప్రజా కంఠక ప్రభుత్వం," అని ఆయన విమర్శించారు.

మంత్రులకు పట్టింపు లేదు.. ఇళ్ల నిర్మాణాలకు బ్రేక్

మంత్రులు కొండా సురేఖ (అటవీ శాఖ), పొంగులేటి శ్రీనివాస్ రెడ్డి (గృహ నిర్మాణ, రెవెన్యూ) మధ్య కనీస సమన్వయం లేదని ఆర్ఎస్ ప్రవీణ్ కుమార్ ఆరోపించారు. "ఆసిఫాబాద్ జిల్లా సిర్పూర్‌లో ఇంటి పన్ను, కరెంట్ బిల్లు కట్టిన వారికి అధికారులు ఇందిరమ్మ ఇల్లు మంజూరు చేస్తే.. అటవీ అధికారులు పునాదులు కూడా తీయనివ్వడం లేదు. పెంచికల్ పేట మండలం గుండెపల్లిలో టాయిలెట్లు కడితే కూలుస్తున్నారు" అని ఆయన ఆవేదన వ్యక్తం చేశారు. మంత్రులు ఇద్దరూ కలిసి జాయింట్ రివ్యూ ఎందుకు చేయడం లేదని ప్రశ్నించారు.

చెంచులను వెళ్లగొడితే చూస్తూ ఊరుకోం

ఆమ్రాబాద్ టైగర్ రిజర్వ్ పరిధిలో తరతరాలుగా నివసిస్తున్న 'చెంచు' గిరిజనులను రూ. 15 లక్షలు ఇచ్చి అక్కడి నుంచి రీ-లొకేట్ చేస్తామని బెదిరిస్తున్నారని ప్రవీణ్ కుమార్ ఆరోపించారు. "రేవంత్ రెడ్డి సోదరుడు తిరుపతి రెడ్డిని ఎఫ్.టి.ఎల్ (FTL) పరిధిలో ఇల్లు ఖాళీ చేసి పొమ్మంటే పోతున్నారా? మీకు ఒక న్యాయం, అడవి బిడ్డలకు ఒక న్యాయమా?" అని ఆయన నిలదీశారు. అటవీ హక్కుల చట్టం 2006 ప్రకారం గిరిజనులకు, ఏళ్ల తరబడి నివసిస్తున్న గిరిజనేతరులకు భూమిపై హక్కు ఉందని, ఈ చట్టం మంత్రి సురేఖకు తెలుసా లేదా అని ప్రశ్నించారు. అటవీ అధికారుల వేధింపులు తాళలేక సిర్పూర్ నియోజకవర్గంలోని ప్రజలు మహారాష్ట్రకు వలస వెళ్లి అడ్డా కూలీలుగా మారుతున్నారని ఆవేదన వ్యక్తం చేశారు.

జాతీయ కమిషన్లకు ఫిర్యాదు చేస్తాం

మంత్రులు డ్రామాలు కట్టిపెట్టి తక్షణమే అడవి బిడ్డల ఇందిరమ్మ ఇళ్ల నిర్మాణాలకు, పోడు భూముల సాగుకు పరిష్కారం చూపాలని ప్రవీణ్ కుమార్ డిమాండ్ చేశారు. చేవెళ్ల డిక్లరేషన్‌లో కాంగ్రెస్ ఇచ్చిన హామీ మేరకు అర్హులైన వారందరికీ పోడు పట్టాలు ఇవ్వాలని కోరారు. దాడులు ఆపకపోతే ఢిల్లీ వెళ్లి జాతీయ మానవ హక్కుల కమిషన్, ఎస్సీ, ఎస్టీ, బీసీ కమిషన్లను ఆశ్రయిస్తామని ప్రభుత్వాన్ని హెచ్చరించారు. ఈ ప్రెస్ మీట్‌లో కాళేశ్వరం ప్రాజెక్టుపై పిసి ఘోష్ కమిషన్ రిపోర్ట్‌పై హైకోర్టు ఇచ్చిన తీర్పును బీఆర్ఎస్ స్వాగతిస్తోందని ఆయన స్పష్టం చేశారు.