Man Bites Wife Nose | అరాచకం.. అదనపు కట్నం కోసం భార్య ముక్కు కొరికిన భర్త

Man Bites Wife Nose | త్రినేత్ర.న్యూస్ : మంచిర్యాల జిల్లా కోటపల్లి మండలంలో తీవ్ర ఉద్రిక్తత కలిగించే ఘటన చోటుచేసుకుంది. అదనపు కట్నం కోసం, కుటుంబ కలహాల నేపథ్యంలో ఓ భర్త తన రాక్షసత్వాన్ని ప్రదర్శించాడు. అడ్డువచ్చిన భార్యపై విచక్షణారహితంగా దాడి చేసి, ఏకంగా ఆమె ముక్కును కొరికిన దారుణ ఘటన స్థానికంగా కలకలం రేపింది.

అసలు ఏం జరిగిందంటే?

కోటపల్లికి చెందిన మమతకు, మల్లంపేటకు చెందిన మణిచందర్‌తో వివాహం జరిగింది. వీరికి ఇద్దరు పిల్లలు ఉన్నారు. అయితే గత నాలుగేళ్లుగా మణిచందర్ అదనపు కట్నం కోసం తనను తీవ్రంగా వేధిస్తున్నాడని మమత ఆరోపిస్తోంది. ఈ వేధింపులు భరించలేక పది రోజుల క్రితం ఆమె పుట్టింటికి వెళ్లిపోయింది.

ఈ నేపథ్యంలో సోమవారం అత్తగారింటికి వచ్చిన మణిచందర్.. తొలుత మామపై దాడికి పాల్పడ్డాడు. భర్త తన తండ్రిపై దాడి చేస్తుండటంతో అడ్డుకోవడానికి ప్రయత్నించిన భార్య మమతపై విరుచుకుపడ్డాడు. ఈ సమయంలో ఆగ్రహంతో ఊగిపోయిన మణిచందర్.. మమత ముక్కును బలంగా కొరికాడు.

ఎంజీఎం ఆసుపత్రికి బాధితురాలు తరలింపు

ఈ దాడిలో తీవ్రంగా గాయపడి రక్తమోడుతున్న మమతను కుటుంబ సభ్యులు తక్షణ చికిత్స నిమిత్తం వరంగల్‌లోని ఎంజీఎం ఆసుపత్రికి తరలించారు. ప్రస్తుతం ఆమె అక్కడ చికిత్స పొందుతున్నట్లు తెలుస్తోంది. ఈ దారుణ ఘటనపై సమాచారం అందుకున్న స్థానిక పోలీసులు కేసు నమోదు చేసుకుని, నిందితుడి కోసం గాలింపు చర్యలు చేపట్టడంతో పాటు దర్యాప్తును వేగవంతం చేశారు.