ACB Raids | భూపాలపల్లి మైన్స్ ఏడీ ఇంట్లో ఏసీబీ రైడ్స్.. భారీగా ఆస్తులు..

ACB Raids | త్రినేత్ర‌.న్యూస్‌: భూపాల‌ప‌ల్లి జిల్లా భూగ‌ర్భ‌గ‌నుల శాఖ ఏడీ (Bhupalpally Mains AD) జ‌య‌రాజ్ నివాసాలు, కార్యాల‌యంలో ఏసీబీ అధికారులు సోదాలు (ACB Raids) చేస్తున్నారు. ఆదాయానికి మించిన ఆరోప‌ణ‌ల నేప‌థ్యంలో ఈ దాడులు కొన‌సాగుతున్నాయి. హైద‌రాబాద్ (Hyderabad) బోడుప్ప‌ల్‌లోని జ‌య‌రాజు నివాసంతోపాటు సూర్యాపేట‌, తాండూరు స‌హా మొత్తం 12 ప్రాంతాల్లో ఏసీబీ జాయింట్ డైరెక్ట‌ర్ సాయి మ‌నోహ‌ర్‌, వ‌రంగ‌ల్ ఏసీబీ డీఎస్పీ సాంబ‌య్య ఆధ్వ‌ర్యంలో త‌నిఖీలు నిర్వ‌హిస్తున్నారు.

సోదాల్లో ఇప్ప‌టివ‌ర‌కు రెండు అంత‌స్తుల భ‌వ‌నం, రెండు కార్లు, రూ.1.50 ల‌క్ష‌ల న‌గ‌దు, రెండు బైకులు, జ‌న‌గామ జిల్లాలో 5 ఎక‌రాల వ్య‌వ‌సాయ భూమి, ఫిక్స్ డిపాజిట్లు, పోస్ట‌ల్ డిపాజిట్లు, బంగారు న‌గ‌లు, బ్యాంకులో రూ.60 లక్షల నగదును ఏసీబీ అధికారులు గుర్తించారు. సోదాలు ఇంకా కొన‌సాగుత‌న్నాయి. సోదాల అనంత‌రం ఆస్తుల విలువ‌, స్వాధీనం చేసుకున్న ప‌త్రాలు, ఇత‌ర వివ‌రాల‌ను అధికారులు వెల్ల‌డించే అవ‌కాశం ఉంది.

భూపాల‌ప‌ల్లి ప్రాంతంలో ఇసుక అక్ర‌మ ర‌వాణా మాఫియాతో చేతులు క‌లిపార‌ని ఆయ‌నపై ఆరోప‌ణలు ఉన్నాయి. అక్ర‌మ‌దారుల‌తో కుమ్మ‌క్కై భారీగా డ‌బ్బు కూడ‌గ‌ట్టిన‌ట్లు తెలుస్తున్న‌ది.