Dudimetla Balaraju Yadav | రాష్ట్ర‌వ్యాప్తంగా రియ‌ల్ ఎస్టేట్ మాఫియా న‌డుస్తోంది: దూదిమెట్ల బాల‌రాజుయాద‌వ్‌

Dudimetla Balaraju Yadav | త్రినేత్ర.న్యూస్ : తెలంగాణ (Telangana) రాష్ట్రవ్యాప్తంగా ప్రస్తుత కాంగ్రెస్ (Congress) ప్రభుత్వంలో రియల్ ఎస్టేట్ మాఫియా నడుస్తోందని బీఆర్ఎస్ (BRS) నేత దూదిమెట్ల బాలరాజుయాదవ్ (Dudimetla Balaraju Yadav) మండిపడ్డారు. భూ భారతితో పారదర్శకత తీసుకువస్తాం అని గొప్పలు చెప్పిన ప్రభుత్వం ఇప్పుడు రాష్ట్రంలో ఏం జరుగుతుందో చెప్పాలని డిమాండ్ చేశారు. ధరణిపై అనేక ఆరోపణలు చేసిన ప్రభుత్వం ఇవాళ భూ భారతి ద్వారా అక్రమాలకు అడ్డాగా మార్చారని ధ్వజమెత్తారు. తెలంగాణ భవన్ (Telangana Bhavan)లో నిర్వహించిన విలేకరుల సమావేశంలో బాలరాజుయాదవ్ మాట్లాడుతూ 52 లక్షల స్లాట్ బుక్ చేస్తే 4300స్లాట్ ల డబ్బులు ఎవరి ఖాతాలోకి వెళ్ళాయని ప్రశ్నించారు. ప్రభుత్వ సొమ్ము ఎటు పోతుంది, ఆ సొమ్ము ఇప్పుడు ఎవరి ఖాతాలోకి పోయిందో బహిర్గతం చేయాలని డిమాండ్ చేశారు. యాదాద్రి, రంగారెడ్డి జిల్లా, జనగామ జిల్లాల్లో అక్రమ లావాదేవీలు జరిగాయని ఆరోపించారు. ట్రెజరీ జమకావాల్సిన సొమ్ము ఎవరి ఖాతాలోకి పోతుందో రెవెన్యూ మంత్రి పొంగులేటి శ్రీనివాస్ రెడ్డి సమాధానం ఇవ్వాలని అన్నారు. రంగారెడ్డి జిల్లాలో లక్షల ఎకరాల భూమిని నిషేధిత జాబితాలో చేర్చి అక్రమ రిజిస్ట్రేషన్ చేయించుకున్నారని దుయ్యబట్టారు. రైతులు రుణమాఫీ కాలేదని న్యాయస్థానాన్ని ఆశ్రయించారని ఆవేదన వ్యక్తం చేశారు. న్యాయస్థానం యాదాద్రి జిల్లా కలెక్టర్, వ్యవసాయ శాఖ అధికారులకు నోటీసులు జారీ చేసిందని చెప్పారు. రాష్ట్రంలో రైతులు ఆత్మహత్య చేసుకుంటున్నారని వాపోయారు. ఫ్యూచర్ సిటీలో అసైన్డ్ భూములను ప్రభుత్వమే లాక్కుంటోందని మండిపడ్డారు. అది ఫ్యూచర్ సిటీ కాదు రియల్ ఎస్టేట్ సిటీగా మారిందని ఎద్దేవా చేశారు. భూ భారతిలో అక్రమాలపై వెంటనే విచారణ చేపట్టాలని డిమాండ్ చేశారు.