Donald Trump India Visit | భారత్ పర్యటనకు ట్రంప్: “మాకు ఇండియా తప్ప మరే దేశం ముఖ్యం కాదు” – యూఎస్ సంచలన ప్రకటన!

Donald Trump India Visit | అమెరికాకు భారతదేశం కంటే ముఖ్యమైన భాగస్వామి మరొకరు లేరని భారత్లో నియమితులైన అమెరికా నూతన రాయబారి సెర్గియో గోర్ (Sergio Gor) స్పష్టం చేశారు. సోమవారం ఢిల్లీలోని అమెరికా రాయబార కార్యాలయంలో బాధ్యతలు చేపట్టిన గోర్.. రెండు దేశాల మధ్య సంబంధాలపై కీలక వ్యాఖ్యలు చేశారు. 2026లో అమెరికా అధ్యక్షుడు డొనాల్డ్ ట్రంప్ భారత్లో పర్యటించే అవకాశం ఉందని ఆయన సూచనప్రాయంగా వెల్లడించారు. వచ్చే ఏడాది డొనాల్డ్ ట్రంప్ పర్యటన? ప్రధాని నరేంద్ర మోదీ, అధ్యక్షుడు ట్రంప్ మధ్య ఉన్న స్నేహం చాలా గొప్పదని గోర్ కొనియాడారు. "ట్రంప్ తన గత భారత పర్యటనను, ప్రధాని మోదీతో ఉన్న అనుబంధాన్ని ఎప్పుడూ గుర్తు చేసుకుంటూ ఉంటారు. బహుశా వచ్చే ఏడాది లేదా ఆ తర్వాత ఏడాది ప్రెసిడెంట్ భారత్లో పర్యటించే అవకాశం ఉంది" అని ఆయన వెల్లడించారు. మోదీ, ట్రంప్ నిజమైన స్నేహితులు. స్నేహితుల మధ్య అభిప్రాయభేదాలు ఉన్నప్పటికీ వాటన్నింటినీ సామరస్యంగా పరిష్కరించుకుంటారు.. అని గోర్ ధీమా వ్యక్తం చేశారు. వాణిజ్య చర్చల పునఃప్రారంభం భారత్-అమెరికా మధ్య కొన్నాళ్లుగా నిలిచిపోయిన వాణిజ్య ఒప్పంద చర్చలు మంగళవారం (జనవరి 13) నుండి తిరిగి ప్రారంభం కానున్నాయి. టారిఫ్స్, ఇతర వాణిజ్య అడ్డంకులపై ఇరు దేశాలు చర్చిస్తాయని గోర్ తెలిపారు. భారత్ అతిపెద్ద దేశం కావడంతో చర్చలు కొంచెం సవాలుగా ఉన్నప్పటికీ, ఖచ్చితంగా ఒక ఒప్పందానికి వస్తామని ఆయన స్పష్టం చేశారు. అత్యంత కీలక భాగస్వామి "వాషింగ్టన్కు భారత్ కంటే అత్యవసరమైన భాగస్వామి మరొకరు లేరు. కేవలం వాణిజ్యం మాత్రమే కాదు.. భద్రత, ఉగ్రవాద వ్యతిరేక పోరాటం, ఇంధనం, సాంకేతికత, విద్య, ఆరోగ్య రంగాల్లో కూడా మేము కలిసి పని చేస్తాం" అని గోర్ స్పష్టం చేశారు. అమెరికా, భారత్ కేవలం ప్రయోజనాల కోసమే కాకుండా, ఉన్నత స్థాయి సంబంధాలతో ముడిపడి ఉన్నాయన్నారు. 'పాక్స్ సిలికా' కూటమిలో భారత్కు చోటు ఈ సందర్భంగా సెర్గియో గోర్ ఒక కీలక ప్రకటన చేశారు. అమెరికా నేతృత్వంలోని వ్యూహాత్మక కూటమి 'పాక్స్ సిలికా'(Pax Silica)లో భారత్ పూర్తిస్థాయి సభ్య దేశంగా చేరబోతోందని ప్రకటించారు. వచ్చే నెలలో పాక్స్ సిలికా కూటమిలో భాగస్వామ్యానికి సంబంధించిన ఆహ్వానం భారత్కు అందుతుందని తెలిపారు. పాక్స్ సిలికా అనేది సెమీ కండక్టర్లు, సిలికాన్ సప్లై చైన్, ఆర్టిఫిషియల్ ఇంటెలిజెన్స్ (AI) రంగాల్లో భద్రత, ఆవిష్కరణలను ప్రోత్సహించే అమెరికా నేతృత్వంలోని అంతర్జాతీయ కూటమి. ట్రంప్ రెండోసారి బాధ్యతలు చేపట్టిన తర్వాత భారత్తో సంబంధాలను మరింత బలోపేతం చేసుకోవాలని నిర్ణయించుకున్నట్లు సెర్గియో గోర్ మాటలను బట్టి తెలుస్తోంది. ముఖ్యంగా చైనాకు పోటీగా గ్లోబల్ సప్లై చైన్ను నిర్మించడంలో భారత్ పాత్రను అమెరికా గుర్తించినట్లు స్పష్టమవుతోంది.