WhatsApp Status Edit | వాట్సప్‌ యూజర్లకు గుడ్ న్యూస్.. ఇకపై పోస్ట్ చేసిన ‘స్టేటస్’ను కూడా ఎడిట్ చేసుకోవచ్చు!

WhatsApp Status Edit | త్రినేత్ర.న్యూస : స్మార్ట్‌ఫోన్ ఉన్న ప్రతి ఒక్కరి జీవితంలో వాట్సప్ (WhatsApp) అంతర్భాగమైపోయింది. మనం ఎక్కడికి వెళ్లినా, ఏం చేసినా వెంటనే 'స్టేటస్' (Status) రూపంలో స్నేహితులతో పంచుకోవడం మనకు కామన్ అయిపోయింది. అయితే ఒక్కోసారి హడావిడిగా స్టేటస్ పెట్టినప్పుడు స్పెల్లింగ్ తప్పులు దొర్లుతుంటాయి. అలాంటప్పుడు ఆ స్టేటస్‌ను వెంటనే డిలీట్ చేసి మళ్లీ కొత్తగా పెడుతుంటాం. కానీ యూజర్ల ఈ చిన్న ఇబ్బందిని గుర్తించిన వాట్సప్.. త్వరలోనే పోస్ట్ చేసిన స్టేటస్‌ను కూడా ఎడిట్ చేసుకునే (Status Edit) సరికొత్త ఫీచర్‌ను అందుబాటులోకి తీసుకురానుంది.

ఎలా పని చేస్తుందంటే?

ప్రస్తుతం ఉన్న వాట్సప్ నిబంధనల ప్రకారం, మనం ఏదైనా స్టేటస్ పోస్ట్ చేసిన తర్వాత అందులోని క్యాప్షన్ (Caption) గానీ, ఇతర ఎలిమెంట్స్‌ను గానీ ఎడిట్ చేసే అవకాశం లేదు. కానీ కొత్తగా రాబోతున్న ఈ ఎడిట్ ఫీచర్ అందుబాటులోకి వస్తే.. స్టేటస్‌లో ఏవైనా స్పెల్లింగ్ మిస్టేక్స్ (Spelling mistakes) ఉంటే వెంటనే కరెక్ట్ చేసుకోవచ్చు. అంతేకాకుండా, స్టేటస్‌లో ఏదైనా ముఖ్యమైన విషయాన్ని రాయడం మర్చిపోతే, దాన్ని కూడా సులభంగా యాడ్ చేయొచ్చు.

గమనించాల్సిన కండిషన్

ఈ కొత్త ఫీచర్‌కు సంబంధించి ఒక ముఖ్యమైన టైమ్ లిమిట్ కూడా ఉంది. యూజర్లు తమ స్టేటస్‌ను పోస్ట్ చేసిన మొదటి 15 నిమిషాల వ్యవధిలో మాత్రమే దాన్ని ఎడిట్ చేసుకునే అవకాశం ఉంటుంది. ఆ సమయం దాటితే మాత్రం ఎలాంటి మార్పులు చేయడం కుదరదు. ఈ ఫీచర్ ప్రస్తుతం టెస్టింగ్ దశలో (Testing phase) ఉందని, త్వరలోనే యూజర్లందరికీ అందుబాటులోకి వస్తుందని సమాచారం.